Gen 32:22-30 | KaaIBT22C | STEP | Сол күни түнде Яқып орнынан турып, еки ҳаялын, еки шорысын ҳәм он бир улын жанына алып, Яббоқ дәрьясының өткелинен өтти.

‏ Genesis 32:22-30

Яқыптың Израил деп аталыўы

22 Сол күни түнде Яқып орнынан турып, еки ҳаялын, еки шорысын ҳәм он бир улын жанына алып, Яббоқ дәрьясының өткелинен өтти. 23 Оларды дәрьядан өткизгеннен соң, өзиниң барлық затларын да өткизди. 24 Кейин Яқып жалғыз өзи қалды. Сонда бир адам оның менен таң атқанша гүрести. 25 Ол Яқыпты жеңе алмайтуғынын билгенде, Яқыптың жамбасына урып жиберди ҳәм оның жамбас сүйеги шығып кетти.

26 Сонда Ол адам:

– Мени жибер, таң атып киятыр, – деди.

Бирақ Яқып Оған:

– Маған пәтияңды бермегениңше, Сени жибермеймен! – деди.

27 Ол адам Яқыптан:

– Атың ким? – деп сорады.

Ол:

– Яқып, – деп жуўап берди.

28 Сонда Ол адам:

– Буннан былай, сен Яқып емес, ал Израил ^{▼▼ Израил – «Қудай гүреседи» ямаса «Қудай менен гүреседи» дегенди билдиреди.} деп аталасаң. Өйткени сен Қудай ҳәм адамлар менен гүресип, жеңип шықтың, – деди.

29 Яқып Оған:

– Өтиниш, атыңызды айтыңыз? – деди.

Бирақ Ол адам:

– Не ушын Мениң атымды сорап атырсаң? – деди.

Соңынан Ол сол жерде Яқыпқа пәтиясын берди.

30 Яқып: «Мен Қудайды жүзбе-жүз көрдим, бирақ тири қалдым», – деп сол жерди Пенуел ^{▼▼ Пенуел – «Қудайдың жүзи» дегенди билдиреди.} деп атады.