Luk 18:35-43 | KaaIBT22C | STEP | Ийса Ерихо қаласына жақынлағанда, жолдың шетинде тиленшилик етип, бир соқыр адам отыр еди.

‏ Luke 18:35-43

35 Ийса Ерихо қаласына жақынлағанда, жолдың шетинде тиленшилик етип, бир соқыр адам отыр еди. 36 Қасынан адамлардың өтип баратырғанын еситкен ол:

– Не болып атыр? – деп сорады.

37 – Насыралы Ийса өтип баратыр, – деди адамлар оған.

38 Сонда ол:

– Даўыттың Урпағы ^{▼▼ Даўыттың Урпағы – Масийхтың басқа атағы.} Ийса! Маған реҳим ете гөр! – деп бақырып жиберди.

39 Алдында кетип баратырғанлар үнин шығармаўды айтып, оған кейиди. Бирақ ол оннан да бетер қатты бақырып:

– Даўыттың Урпағы! Маған реҳим ете гөр! – деди.

40 Сонда Ийса тоқтап, соқыр адамды қасына алып келиўди буйырды. Соқыр адам жақынлағанда, Ийса оннан:

41 – Сен ушын не ислеўимди қәлейсең? – деп сорады.

– Ийем, көзлерим көретуғын болсын, – деди ол.

42 Ийса оған:

– Көзлериң көретуғын болсын, исенимиң сени қутқарды, – деди.

43 Сол ўақытта-ақ соқыр адамның көзлери көре баслады ҳәм Қудайды алғыслап, Ийсаның изине ерди. Буны көрген пүткил халық та Қудайды мақтады.