Luk 23:13-25 | KaaIBT22C | STEP | Пилат бас руўханийлерди, басшыларды ҳәм халықты шақыртып алып,

‏ Luke 23:13-25

Өлим ҳүкими

(Мат 27:15-26; Мрк 15:6-15; Юхн 18:39-40; 19:1-16)

13 Пилат бас руўханийлерди, басшыларды ҳәм халықты шақыртып алып, 14 оларға:

– Сизлер маған бул адамды халықты жолдан азғырып жүр деп, алып келдиңлер. Мине, мен сизлердиң көз алдыңызда Оны тергесем де, сизлердиң қойған айыпларыңыздың биреўин де оннан таппадым. 15 Ҳирод та ҳеш нәрсе таппай, оны бизлерге қайтарып жиберди. Көрип турғаныңыздай, ол өлим жазасына ылайық ҳеш нәрсе ислемеген. 16 Сонлықтан оны жазалап, босатып жиберемен, – деди. [ 17 ^{▼▼ Базы қолжазбаларда 17-аят та бар: «Пилат ҳәр Қутқарылыў байрамында олар ушын бир тутқынды босатып жибериўи керек еди».}]

18 Бирақ халықтың ҳәммеси бир аўыздан:

– Бул адамды жоқ қыл! Бизлерге Бараббаны босатып бер! – деп бақырысты.

19 Барабба қалада жүз берген қозғалаңға қатнасып, адам өлтиргени ушын қамалған еди.

20 Пилат Ийсаны босатып жибермекши болып, оларға қарата және сөйледи.

21 Бирақ олар:

– Оны атанақ ағашқа шегелет! Шегелет! – деп бақырысты.

22 Пилат үшинши рет оларға:

– Ол қандай жаманлық иследи? Мен оннан өлимге ылайықлы ҳеш айып таппадым. Солай екен, Оны жазалап, босатып жиберейин, – деди.

23 Бирақ олар даўысларының барынша бақырыўды даўам етип, Ийсаны атанақ ағашқа шегелетиўди талап қылды ҳәм ақырында өз дегенлерине еристи. 24 Солай етип, Пилат олардың талапларын орынлаўға қарар етти. 25 Олардың сораған адамын, қозғалаң көтергени ҳәм адам өлтиргени ушын қамақта отырған адамды босатып, Ийсаны олардың еркине тапсырды.