Luk 9:37-45 | KaaIBT22C | STEP | Келеси күни олар таўдан түскенде, Ийсаны көп халық күтип алды.

‏ Luke 9:37-45

Ийсаның жин урған баланы азат қылыўы

(Мат 17:14-21; Мрк 9:14-29)

37 Келеси күни олар таўдан түскенде, Ийсаны көп халық күтип алды. 38 Күтилмегенде халық арасынан биреў бақырып:

– Устаз, Сеннен өтинип сорайман, мениң балама бир нәзер сала гөр! Ол мениң жалғыз балам! 39 Баламды жаўыз руўх тутқанда, ол бирден қышқырып жибереди. Жаўыз руўх оны қалтыратып, аўзынан көбик ағызады да, азаплап болғаннан соң, зорға дегенде оннан кетеди. 40 Мен Сениң шәкиртлериңнен жаўыз руўхты қуўып шығарыўды өтинген едим, бирақ олардың қолынан келмеди, – деди.

41 Ийса жуўап берип:

– Ҳәй, исенбейтуғын, адасқан әўлад! Мен қашанға дейин сизлер менен бирге болып, сизлерге шыдайман? Балаңды бул жерге алып кел, – деди.

42 Бала киятырғанда жин оны жерге жығып, қалтырата баслады. Бирақ Ийса жаўыз руўхқа тыйым салып, балаға шыпа берди ҳәм оны әкесине тапсырды. 43 Ҳәмме Қудайдың уллылығына таң қалысты.

Халық Ийсаның барлық ислерине ҳайран қалып турғанда, Ийса Өз шәкиртлерине:

44 – Мына сөзлеримди қулақларыңызға қуйып алыңлар: Адам Улы адамлардың қолына услап бериледи, – деди.

45 Бирақ олар бул сөздиң мәнисин түсинбеди. Оның мәниси оларға жасырын болғанлықтан, олар оны уға алмады. Ал бул сөз туўралы Ийсадан сораўға қорқты.