Mar 10:46-52 | KaaIBT22C | STEP | Олар Ерихоға келди. Ийса Өз шәкиртлери ҳәм көп халық пенен Ериходан шығып баратырғанда, Тимейдиң улы соқыр Бартимей жол бойында тиленшилик етип отыр еди.

‏ Mark 10:46-52

Ийсаның соқыр Бартимейге шыпа бериўи

(Мат 20:29-34; Лук 18:35-43)

46 Олар Ерихоға келди. Ийса Өз шәкиртлери ҳәм көп халық пенен Ериходан шығып баратырғанда, Тимейдиң улы соқыр Бартимей жол бойында тиленшилик етип отыр еди. 47 Ол насыралы Ийсаның сол жерде екенин еситкенде:

– Даўыттың Урпағы ^{▼▼ Даўыттың Урпағы – Масийхтың басқа атағы.} Ийса! Маған реҳим ете гөр! – деп бақыра баслады.

48 Көп адамлар үнин шығармаўын айтып, оған кейиди. Бирақ ол оннан да бетер қатты бақырып:

– Даўыттың Урпағы! Маған реҳим ете гөр! – деди.

49 Ийса тоқтап:

– Оны шақырың, – деди.

Адамлар соқырды шақырып:

– Жигерли бол, орныңнан тур! Ол сени шақырып атыр, – деди.

50 Ол шапанын шешти де, орнынан ушып турып, Ийсаға келди.

51 Ийса оннан:

– Сен ушын не ислеўимди қәлейсең? – деп сорады.

Соқыр адам Оған:

– Устаз! Көзлерим көретуғын болсын, – деди.

52 Ийса оған:

– Бар, исенимиң сени қутқарды, – деди.

Сол ўақытта-ақ соқырдың көзи қайтадан көретуғын болды ҳәм ол Ийсаның изине ерип, жолға түсти.