Mar 11:1-11 | KaaIBT22C | STEP | Олар Ерусалимге жақынлап, Зәйтүн таўының етегиндеги Бетфаге ҳәм Бетания деген аўылларға келгенде, Ийса шәкиртлериниң екеўин жумсап,

‏ Mark 11:1-11

Ийсаның Ерусалимге салтанатлы түрде кириўи

(Мат 21:1-11; Лук 19:28-40; Юхн 12:12-19)

1 Олар Ерусалимге жақынлап, Зәйтүн таўының етегиндеги Бетфаге ҳәм Бетания деген аўылларға келгенде, Ийса шәкиртлериниң екеўин жумсап, 2 оларға былай деди:

– Қарсы алдыңыздағы аўылға барыңлар. Оған кириўден-ақ, еле ҳеш ким минбеген, байлаўлы турған бир гүррени табасызлар. Оны шешип, алып келиңлер. 3 Егер биреў сизлерден: «Неге бундай ислеп атырсызлар?» – деп сораса, сизлер: «Бул Ийемизге керек. Ол буны тез қайтарып жибереди», – деп жуўап бериңлер.

4 Олар барып, көшедеги дәрўаза қасында байланған гүррени тапты ҳәм оны шешип алды. 5 Сол жерде турған гейбиреўлер оларға:

– Гүррени шешип алып не қылажақсызлар? – деп сорады.

6 Олар Ийсаның айтқанындай жуўап бергенде, адамлар оларға рухсат берди. 7 Гүррени Ийсаға алып келип, өзлериниң шапанларын оның үстине жапты, Ийса гүрреге минип алды. 8 Көп адамлар шапанларын жолға төсеп, ал гейбиреўлер даладағы тереклерден шақа кесип алып, жолға жайды. 9 Алдында ҳәм изде ерип киятырғанлар былай деп бақырысты: – «Ҳосанна! ^{▼▼ Ҳосанна! – «Қутқара гөр!» деген мәнисте. Қудайды алғыслағанда айтылады.}
Жаратқан Ийениң аты менен келетуғын жарылқансын!
10 Бабамыз Даўыттың жақынлап киятырған Патшалығы жарылқанған!
Ең жоқарыда ҳосанна!» ^{▼▼ Заб 117:25-26.}

11 Ийса Ерусалимге келип, Ибадатханаға кирди. Ол жерде ҳәмме нәрсени көзден кеширип болып, кеш болғанлықтан, он еки шәкирти менен Бетанияға кетти.