Mat 1:18-25 | KaaIBT22C | STEP | Ийса Масийхтың туўылыўы былай болды: Оның анасы Мәриям Юсупке атастырылғаннан кейин, олар қосылмастан бурын, Мәриямның Мухаддес Руўхтан ҳәмиледар екенлиги билинди.

‏ Matthew 1:18-25

Ийса Масийхтың туўылыўы

(Лук 2:1-7)

18 Ийса Масийхтың туўылыўы былай болды: Оның анасы Мәриям Юсупке атастырылғаннан кейин, олар қосылмастан бурын, Мәриямның Мухаддес Руўхтан ҳәмиледар екенлиги билинди. 19 Оның күйеўи Юсуп ҳақ адам болып, Мәриямды уятқа қалдырмайын деп, оған үйлениўден жасырын түрде бас тартыўды ойлады. 20 Ол усылай ойлап жүргенде, Жаратқан Ийениң бир периштеси оның түсине енип:

– Ҳәй, Даўыттың урпағы Юсуп! Сен Мәриямды өзиңе ҳаяллыққа алыўға қорқпа. Оның ишиндеги баласы Мухаддес Руўхтан. 21 Мәриям ул туўады. Сен оның атын Ийса ^{▼▼ Ийса – «Жаратқан Ийе қутқарады» дегенди билдиреди.} деп қоясаң, себеби Ол Өз халқын гүналарынан қутқарады, – деди.

22 Булардың ҳәммеси Жаратқан Ийениң пайғамбар арқалы алдын ала айтқан мына сөзлериниң орынланыўы ушын болды:

23 «Мине, қыз ҳәмиледар болып Ул туўады. Оның атын Иммануел деп қояды» ^{▼▼ Ийш 7:14.}.

Иммануел – «Қудай бизлер менен бирге» деген мәнисте.

24 Юсуп уйқыдан турғаннан соң, Жаратқан Ийениң периштесиниң буйырғанын ислеп, Мәриямға үйленди. 25 Бирақ Мәриям улын ^{▼▼ улын – Базы қолжазбаларда «туңғыш улын».} туўғанша, Юсуп оған жақынлаған емес. Бала туўылғаннан кейин, ол баланың атын Ийса деп қойды.