Mat 15:1-20 | KaaIBT22C | STEP | Сонда Ийсаның қасына Ерусалимнен парисейлер менен диний муғаллимлер келип, Оған:

‏ Matthew 15:1-20

Адамларды не ҳарамлайды?

(Мрк 7:1-13)

1 Сонда Ийсаның қасына Ерусалимнен парисейлер менен диний муғаллимлер келип, Оған:

2 – Не ушын Сениң шәкиртлериң ата-бабалардан қалған дәстүрлерди бузып жүр? Олар нан жеўден алдын қолларын жуўмайды, – деди.

3 Ийса оларға жуўап берип, былай деди:

– Сизлер не ушын дәстүрлериңиз себепли Қудайдың буйрығын бузасызлар? 4 Себеби Қудай: «Ата-анаңды ҳүрметле» ^{▼▼ Шығ 20:12; Нзм 5:16.} ҳәм «Ким де ким әкесине ямаса анасына жаман сөз айтса, ол сөзсиз өлтирилсин» ^{▼▼ Шығ 21:17; Леб 20:9.} деп буйрық берген. 5 Ал сизлер: «Ким де ким әкесине ямаса анасына: „Саған беретуғынымды Қудай жолына қурбан етип бағышлайман“, десе, 6 ол әкесин ямаса анасын сыйламаса да болады», – дейсизлер. Солай етип, дәстүрлериңиз себепли, сизлер Қудайдың сөзин бийкар етип атырсызлар. 7 Ҳәй, еки жүзлилер! Ийшая пайғамбар сизлер туўралы алдын ала дурыс айтқан: 8 «Бул халық сыйлар Мени тили менен ^{▼▼ Бул халық сыйлар Мени тили менен – Базы қолжазбаларда «Бул халық аўзы менен маған жақынлап, тили менен мени сыйлар».},
Бирақ жүреги Меннен алыс.
9 Олар Маған босқа сыйынып,
Адам ойлап тапқан парызларды үйретер» ^{▼▼ Ийш 29:13.}.

10 Соңынан Ийса халықты шақырып алып, оларға:

– Тыңлап, түсинип алыңлар: 11 адамды оның аўзына енген нәрсе емес, ал аўзынан шыққан нәрсе ҳарамлайды, – деди.

12 Сонда Оның шәкиртлери қасына келип, Оннан:

– Бул сөзди еситкенде, парисейлердиң ашыўланып қалғанын билдиң бе? – деп сорады.

13 Ийса оларға:

– Аспандағы Әкем екпеген ҳәр бир өсимлик түп-тамыры менен жулып тасланады. 14 Оларды қойыңлар. Олар – соқырлардың соқыр жетелеўшилери. Егер соқырды соқыр жетелесе, екеўи де шуқырға қулап түседи, – деди.

15 Петр Оған:

– Бул тымсалды бизлерге түсиндирип бер, – деди.

16 Ийса оларға:

– Сизлер еле түсинбей турсызлар ма? 17 Аўызға енгенниң ҳәммеси қарынға баратуғынын, оннан соң сыртқа шығып кететуғынын түсинбейсизлер ме? 18 Аўыздан шыққан кеўилден шығады. Адамды ҳарамлайтуғын усы. 19 Өйткени жаманлық ойлаў, адам өлтириў, неке ҳадаллығын бузыў, бузықшылық қылыў, урлық ислеў, жалған гүўалық бериў ҳәм масқаралаў кеўилден шығады. 20 Адамды ҳарамлайтуғын усылар. Ал қол жуўмай аўқат жеў адамды ҳарамламайды, – деди.