Mat 22:23-33 | KaaIBT22C | STEP | Қайта тирилиў жоқ, деўши саддукейлер сол күни Ийсаға келип, былай деп сораў қойды:

‏ Matthew 22:23-33

Қайта тирилиў туўралы сораў

(Мрк 12:18-27; Лук 20:27-40)

23 Қайта тирилиў жоқ, деўши саддукейлер сол күни Ийсаға келип, былай деп сораў қойды:

24 – Устаз! Муўса: «Биреў баласы болмай өлсе, изинде қалған жесирине иниси үйленип, ағасының урпағын даўам еттирсин», ^{▼▼ Нзм 25:5-6.} – деген-ғо. 25 Бизде ағайинли жети жигит бар еди. Олардың бириншиси үйленип, қайтыс болды, баласы болмағанлықтан, ҳаялы инисине қалды. 26 Екиншисине де, үшиншисине де, ҳәтте, жетиншисине де солай болды. 27 Бәринен кейин ҳаялдың өзи де қайтыс болды. 28 Ал енди қайта тирилгенде ҳаял жетеўиниң қайсысының ҳаялы болады? Ол олардың ҳәммесине де ҳаял болған еди-ғо.

29 Ийса оларға жуўап қайтарып былай деди:

– Сизлер Мухаддес Жазыўларды да, Қудайдың қүдиретин де билмегенликтен алжасып турсызлар. 30 Өйткени адамлар қайта тирилиўде үйленбейди де, турмысқа да шықпайды, ал аспандағы периштелер сыяқлы болады. 31 Өлгенлердиң қайта тирилиўи туўралы Қудайдың сизлерге айтқанларын оқымағансызлар ма? 32 Қудай: «Мен Ибрайымның Қудайыман, Ысақтың Қудайыман, Яқыптың Қудайыман» ^{▼▼ Шығ 3:6.}, – деген. Қудай өлилердиң емес, ал тирилердиң Қудайы.

33 Буны еситкен халық Оның тәлиматына таң қалды.