1Ch 10 | KaaIBT22L | STEP | Filistler izraillılar menen urısıp atırǵan edi. Izraillılar filistlerdiń aldına túsip qashıp, kópshiligi Gilboa tawında nabıt boldı.

‏ 1 Chronicles 10

Shaul hám onıń ullarınıń ólimi

1 Filistler izraillılar menen urısıp atırǵan edi. Izraillılar filistlerdiń aldına túsip qashıp, kópshiligi Gilboa tawında nabıt boldı. 2 Filistler Shaul menen onıń ullarınıń izine túsip, Shauldıń ulları Ionatandı, Abinadabtı hám Malkiy-Shuanı óltirdi. 3 Shauldıń átirapında sawash háwij alǵan edi. Sonda sadaqshılar tárepinen atılǵan oq Shaulǵa tiyip, ol jaraqatlandı. 4 Shaul óz nókerine:

– Qılıshıńdı qınabınan suwırıp al da, meni óltir. Bolmasa, mına súnnetsizler keledi de, meni xorlaydı, – dedi.

Biraq nókeri qattı qorqıp, bunı islemedi. Sonlıqtan Shaul qılıshın qınınan suwırıp alıp, ózin qılıshtıń ústine tasladı. 5 Nókeri Shauldıń ólgenin kórgende, ol da qılıshınıń ústine ózin taslap óldi.

6 Solay etip, Shaul menen onıń úsh ulı da qaza taptı hám pútkil shańaraǵı olar menen birge qurıp ketti.

7 Oypatlıqta jasaytuǵın barlıq izraillılar Izrail áskerleriniń qashqanın hám Shaul menen onıń ullarınıń ólgenin kórgende, óz qalaların taslap, qasha basladı. Filistler kelip, sol qalalarǵa ornalasıp aldı.

8 Erteńine filistler ólgenlerdi tonaw ushın kelgende, Gilboa tawında Shauldıń hám onıń ullarınıń óligin taptı. 9 Olar Shauldı talan-taraj etip, basın hám qural-jaraqların aldı. Sońınan bul xabardı ózleriniń butlarına hám xalqına jetkeriw ushın, filistlerdiń jerleriniń hámmesine xabarshılar jiberdi. 10 Olar Shauldıń qural-jaraqların óz qudaylarınıń butxanasına qoyıp, basın Dagonnıń butxanasına ildirip qoydı.

11 Giladtaǵı pútkil Yabesh xalqı filistlerdiń Shaulǵa islegen hámme isleri haqqında esitkende, 12 olardıń barlıq márt jawıngerleri barıp, Shaul menen onıń ullarınıń denelerin Yabeshke alıp keldi. Keyin olardıń súyeklerin Yabeshtegi terebinf aǵashınıń astına kómip, jeti kún oraza tutıp, azaladı.

13 Shaul Jaratqan Iyege qıyanet etkeni ushın ólgen edi. Ol Jaratqan Iyeniń sózine boysınbay, hátte, árwaq shaqırıwshıǵa da másláhát saldı. 14 Al Jaratqan Iyeden másláhát soramadı. Sol sebepli Jaratqan Iye Shauldı óltirtip, onıń patshalıǵın Ishay ulı Dawıtqa berdi.