1Ch 12 | KaaIBT22L | STEP | Dawıt Kish ulı Shauldan qashıp, Siklagta jasap júrgen waqıtları, ayırım áskerler kelip, oǵan qosıldı. Urıslarda Dawıtqa járdem bergen bul jawıngerler

‏ 1 Chronicles 12

Dawıttıń Siklagtaǵı járdemshileri

1 Dawıt Kish ulı Shauldan qashıp, Siklagta jasap júrgen waqıtları, ^{▼▼ 1Pat 27:1-6.} ayırım áskerler kelip, oǵan qosıldı. Urıslarda Dawıtqa járdem bergen bul jawıngerler 2 Benyamin urıwınan, Shauldıń aǵayinlerinen edi. Bul sadaqshılar oq jay menen qurallanǵan bolıp, oń qolı menen de, shep qolı menen de oq jay tartıp, saqpanda tas atatuǵın edi. 3 Olardıń basshısı gibalı Shemanıń ulı Axiezer bolıp, inisi Ioash onıń járdemshisi edi. Basqa jawıngerler: Azmawettiń ulları Eziel hám Pelet, sonday-aq, Beraxa hám anatotlı Ehu, 4 otız batırdıń birewi, yaǵnıy olardıń basshısı gibonlı Ishmaya, sonday-aq, Eremiya, Yaxaziel, Yuxanan, gederalı Iozabad, 5 Eluzay, Erimot, Bealiya, Shemariya, xaruflı Shefatiya, 6 Qoraxtıń urpaǵınan bolǵan Elqana, Ishshiya, Azarel, Ioezer, Yashobam, 7 gedorlı Eroxamnıń ulları Ioela hám Zebadiya.

8 Dawıt shóldegi qorǵanda bolǵanda, gadlılardıń birazı oǵan qosıldı. Olar urısqa tayar márt jawıngerler bolıp, qalqan hám nayzanı islete alatuǵın edi. Olardıń júzleri arıslanday aybatlı, ózleri tawlardaǵı jeyran kibi shaqqan edi.

9 Olardıń basshısı Ezer edi. Ekinshisi Obadiya, úshinshisi Eliab, 10 tórtinshisi Mishmanna, besinshisi Eremiya, 11 altınshısı Attay, jetinshisi Eliel, 12 segizinshisi Yuxanan, toǵızınshısı Elzabad, 13 onınshısı Eremiya, on birinshisi Maxbannay edi.

14 Usı gadlılar orda áskerbasıları edi. Olardıń eń hálsizleri júz adamǵa, eń kúshlileri mıń adamǵa bas keletuǵın edi. 15 Birinshi ayda, Iordan tolıp tasıp turǵan waqıtta, olar arǵı jaǵaǵa kesip ótip, oypatlıqtıń shıǵıs hám batıs tárepinde jasap atırǵanlardıń hámmesin bas sawǵalap qashıwǵa májbúr etti.

16 Benyamin hám Yahuda urıwlarındaǵı bazı adamlar da Dawıttıń janına, qorǵanǵa keldi. 17 Dawıt olardı kútip alıwǵa shıqtı hám olarǵa bılay dedi:

– Eger maǵan járdem beriw ushın jaqsı niyet penen kelgen bolsańız, qatarımızǵa qosılıwıńızǵa ırazıman. Al eger hesh kimge zorlıq islemegen bolsam da, meni dushpanlarıma uslap beriwge kelgen bolsańız, onda ata-babalarımızdıń Qudayı bunı kórip, húkim etsin.

18 Sonda keyinirek otız batırdıń sárdarı bolǵan Amasaydıń ústine Qudaydıń Ruwxı túsip, ol bılay dedi:

«Dawıt, bizler sizikimiz!
Ishay ulı, siz benen birgemiz!
Tınıshlıq hám amanlıq sizge yar bolsın!
Sizge járdem berip atırǵanlarǵa da amanlıq bolsın!
Sebebi sizdi qollap turǵan – Qudayıńızdıń Ózi».

Dawıt olardı jaqsı qabıl etti hám óziniń basqınshılar toparlarına basshılar etip qoydı.

19 Dawıt filistler menen birge Shaulǵa qarsı urısıw ushın barǵanda, ^{▼▼ 1Pat 29:1-11.} Menashshe urıwınıń bazı adamları Dawıttıń tárepine ótken edi. Degen menen, sol urısta Dawıt hám onıń adamları filistlerge járdem bermedi. Óytkeni filist húkimdarları keńesip: «Dawıt mırzası Shaul tárepke ótip ketip, basımızdan ayırılarmız», – dep, onı keyin qaytarǵan edi. 20 Dawıt Siklagqa qaytıp ketip baratırǵanda, Menashshe urıwınan onıń tárepine ótkenler mınalar edi: Adnax, Iozabad, Ediael, Mixail, Iozabad, Elihu hám Silletay. Bulardıń barlıǵı menashshelilerdiń mıńbasıları edi. 21 Olar márt jawıngerler bolıp, Dawıttıń ordasında láshkerbasılıq xızmetin atqardı hám qaraqshılar toparına qarsı gúresiwde Dawıtqa járdem berdi. 22 Dawıtqa járdem beriw ushın hár kúni adamlar kelip qosılatuǵın edi. Nátiyjede, Dawıt Qudaydıń láshkerleri sıyaqlı úlken hám kúshli ordaǵa iye boldı.

Dawıttıń Xebrondaǵı ordası

23 Jaratqan Iyeniń bergen wádesi boyınsha, Shauldıń patshalıǵın Dawıtqa beriw ushın Xebronǵa, Dawıttıń janına kelgen láshkerler sanı mınaday edi:

24 Yahuda urıwınan: urısqa tayar, qalqan hám nayza menen qurallanǵan altı mıń segiz júz adam.

25 Shimon urıwınan: urısqa tayar, jeti mıń bir júz márt jawınger.

26 Lebiy urıwınan: tórt mıń altı júz adam.

27 Xaron násiliniń basshısı Ehoyada hám onıń menen birge bolǵanlar úsh mıń jeti júz adam.

28 Jas hám márt jawınger Sadoq hám onıń tiyresinen jigirma eki áskerbası.

29 Shauldıń urıwlasları bolǵan Benyamin urıwınan: úsh mıń adam. Benyaminlilerdiń kópshiligi sol waqıtqa deyin Shauldıń shańaraǵına sadıq bolıp qaldı.

30 Efrayım urıwınan: óz áwladı arasında ataǵı shıqqan jigirma mıń segiz júz márt jawınger.

31 Dawıttı patsha etip qoyıw ushın, Menashshe urıwınıń yarımınan arnawlı túrde shaqırılǵanlar on segiz mıń adam.

32 Issaxar urıwınan: dáwir talabın túsinetuǵın, Izraildıń ne islew kerekligin biletuǵın eki júz láshkerbası hám olardıń qol astındaǵı adamlar.

33 Zebulon urıwınan: eliw mıń adam. Olar urıs qurallarınıń hámme túri menen qurallanǵan bolıp, Dawıtqa shın júrekten járdem beriw ushın keldi.

34 Naftaliy urıwınan: mıń áskerbası hám olar menen birge qalqan hám nayza menen qurallanǵan otız jeti mıń adam.

35 Dan urıwınan: urısqa tayar jigirma segiz mıń altı júz adam.

36 Asher urıwınan: urısqa tayar, tájiriybeli qırıq mıń ásker.

37 Iordan dáryasınıń shıǵısında jasaytuǵın Ruben hám Gad urıwları menen Menashshe urıwınıń yarımınan: urıs qurallarınıń hámme túri menen qurallanǵan bir júz jigirma mıń adam.

38 Bulardıń hámmesi sap tartıp, urısqa shıǵıwǵa tayar áskerler edi. Olar qattı qálew menen, Dawıttı pútkil Izrail ústinen patsha etip qoyıw ushın Xebronǵa keldi. Qalǵan izraillılar da Dawıttı patsha etiw niyetinde edi. 39 Xebronǵa kelgenler Dawıttıń janında úsh kún qaldı hám tuwısqanları tayarlap bergen azıq-awqatlardı iship-jedi. 40 Sonday-aq, Issaxar, Zebulon hám Naftaliy urıwlarınıń alıs aymaqlarınan da adamlar eshek, túye, ǵashır hám ógizlerge azıq-awqat tiyep keldi. Olar mol etip un, keptirip nıǵızlanǵan ánjir menen kishmish, sharap, záytún mayın, iri hám mayda mallardı kóp etip alıp keldi. Sebebi Izrailda shadlıq húkim súrgen edi.