1Ch 13 | KaaIBT22L | STEP | Dawıt barlıq basshıları, mıńbasıları hám júzbasıları menen másláhátlesti.

‏ 1 Chronicles 13

Kelisim sandıǵınıń Kiryat-Yarimnen alıp keliniwi

1 Dawıt barlıq basshıları, mıńbasıları hám júzbasıları menen másláhátlesti. 2 Sońınan ol pútkil Izrail jámiyetine bılay dedi:

– Eger bul sizlerge maqul bolsa hám Qudayımız Jaratqan Iyeniń erkine say bolsa, onda Izrail jeriniń hár tárepinde jasap atırǵan tuwısqanlarımızǵa hám qalaları menen jaylawları átirapında jasap atırǵan ruwxaniyler menen lebiylilerge xabarshılar jibereyik. Olar da kelip, bizlerge qosılsın. 3 Qudayımızdıń sandıǵın ózlerimizge qaytarıp alıp keleyik. Óytkeni Shauldıń dáwirinde Qudaydıń erkin biliwde onnan paydalanbadıq.

4 Bul usınıs pútkil jámiyetke maqul tústi, sebebi pútkil xalıq názerinde bul is tuwrı edi.

5 Solay etip, Dawıt Qudaydıń Kelisim sandıǵın Kiryat-Yarimnen alıp keliw ushın, Mısırdaǵı Shixor dáryasınan Lebo-Xamatqa deyingi jerlerde jasaytuǵın barlıq izraillılardı jıynadı. 6 Keyin Dawıt hám barlıq izraillılar kerublar ^{▼▼ Kerub – qanatlı ruwxıy barlıq.} arasında taxtta otırǵan Jaratqan Iyeniń atı menen atalǵan Qudaydıń Kelisim sandıǵın alıp keliw ushın, Yahudadaǵı Baala qalasına, yaǵnıy Kiryat-Yarimge ketti.

7 Olar Qudaydıń sandıǵın Abinadabtıń úyinen alıp, taza bir arbaǵa qoydı. Arbaǵa jegilgen ógizlerdi Uzza menen Axyo jeteklep júrdi. 8 Al Dawıt hám pútkil Izrail xalqı Qudaydıń aldında qosıqlar aytıp, lira ^{▼▼ Lira – barmaq penen shertiletuǵın tarlı saz ásbabı.}, arfa, dáp, kimbal hám kárnay shertip, bar kúshi menen shadlıqqa bólenip kiyatırǵan edi.

9 Olar Kidonnıń qırman jerine jetkende, ógizler súrnigip ketti hám qulap ketpewi ushın Uzza qolın sozıp, sandıqtı usladı. 10 Sonda Uzzaǵa qarsı Jaratqan Iyeniń ǵázebi lawladı hám sandıqqa qolın sozǵanı ushın, onı óltirdi. Uzza sol jerde, Qudaydıń aldında jan tapsırdı.

11 Jaratqan Iyeniń Uzzanı jazalaǵanı ushın, Dawıt qattı ashıwlandı. Sol kúnnen baslap, házirge deyin bul orın Peres-Uzza ^{▼▼ Peres-Uzza – «Uzzanıń qıyralıwı» degendi bildiredi.} dep ataladı.

12 Dawıt sol kúni Qudaydan qorqıp: «Qudaydıń sandıǵın janıma qalay alıp kele alaman?» – dedi. 13 Sol kúni Dawıt sandıqtı óziniń janına, Dawıttıń qalasına alıp barmay, gatlı Obed-Edomnıń úyine apardı. 14 Qudaydıń sandıǵı gatlı Obed-Edomnıń úyinde úsh ay turdı. Jaratqan Iye Obed-Edomnıń shańaraǵın hám oǵan tiyisli hár bir nárseni jarılqadı.