1Ch 14 | KaaIBT22L | STEP | Tir patshası Xiram Dawıtqa elshiler, sonıń menen birge saray qurılısı ushın kedr aǵashların, tas qalawshılardı hám aǵash ustaların jiberdi.

‏ 1 Chronicles 14

Dawıttıń shańaraǵı

1 Tir patshası Xiram Dawıtqa elshiler, sonıń menen birge saray qurılısı ushın kedr aǵashların, tas qalawshılardı hám aǵash ustaların jiberdi. 2 Sonda Dawıt Jaratqan Iyeniń ózin Izrailǵa patsha etip tayınlaǵanın hám Óz xalqı Izrail ushın onıń patshalıǵın ullı dańqqa eristirgenin túsindi.

3 Dawıt Erusalimde jáne bir neshe hayallar aldı hám olardan da ul hám qızlar kórdi. 4 Dawıttıń Erusalimde tuwılǵan perzentleriniń atları mınalar: Shammua, Shobab, Natan, Sulayman, 5 Ibxar, Elishua, Elpelet, 6 Nogah, Nefeg, Yafia, 7 Elishama, Beliyada hám Elifelet.

Filistlerdiń jeńiliske ushırawı

8 Filistler Dawıttıń maylanıp, pútkil Izrailǵa patsha etip qoyılǵanın esitkende, pútkil filist áskerleri Dawıttı qolǵa túsiriw ushın izlep ketti. Bunı esitken Dawıt olardı qarsı alıwǵa shıqtı. 9 Filistler kelip, Refaim oypatlıǵına shabıwıl jasadı. 10 Dawıt Qudaydan:

– Filistlerge qarsı júris qılayın ba? Olardı maǵan táslim eteseń be? – dep soradı.

Jaratqan Iye oǵan:

– Awa, júris qıl. Olardı saǵan táslim etemen, – dedi.

11 Sonda Dawıt áskerleri menen birge Baal-Perasimge ^{▼▼ Baal-Perasim – «Qıyratıw Mırzası» degendi bildiredi.} ketti hám ol jerde filistlerdi qıyrattı. Keyin ol: «Hár bir bógetti jaypap ótetuǵın suw tasqını sıyaqlı, Quday dushpanlarımdı meniń qolım menen qıyratıp tasladı», – dedi. Sonlıqtan sol jerge Baal-Perasim degen at berildi. 12 Filistler butların sol jerge taslap qashqan edi. Dawıttıń buyrıǵı boyınsha, butlar jaǵıp jiberildi.

13 Kóp ótpey, filistler qaytadan sol oypatlıqqa shabıwıl jasadı. 14 Dawıt jáne Qudaydan soradı hám Quday oǵan bılay dep juwap berdi:

– Olarǵa bul jerden hújim qılma. Olardı aylanıp ótip, art jaǵınan, tut aǵashları tárepten hújim qıl. 15 Sen tut aǵashlarınıń joqarısınan ayaq sesleri sıyaqlı dawıstı esitiwden-aq, olarǵa hújimge ót. Sebebi sol waqıtta Men seniń aldıńda filist ordasın qıyratıw ushın baratırǵan bolaman.

16 Dawıt Qudaydıń buyırǵanınday qıldı hám filist ordasın Gibonnan Gezerge deyin qıyratıp bardı.

17 Solay etip, Dawıttıń dańqı dógerektegi ellerdiń hámmesine jayıldı. Jaratqan Iye barlıq xalıqlardı onnan qorqatuǵın qıldı.