1Ch 15 | KaaIBT22L | STEP | Dawıt óz atı menen atalǵan qalaǵa ózi ushın úyler saldırdı. Ol Qudaydıń Kelisim sandıǵı ushın da bir orın tayarlap, shatır qurdı.

‏ 1 Chronicles 15

Kelisim sandıǵınıń Erusalimge alıp keliniwi

1 Dawıt óz atı menen atalǵan qalaǵa ózi ushın úyler saldırdı. Ol Qudaydıń Kelisim sandıǵı ushın da bir orın tayarlap, shatır qurdı. 2 Keyin Dawıt: «Qudaydıń Kelisim sandıǵın tek ǵana lebiyliler kóterip júredi. Óytkeni Jaratqan Iye sandıqtı alıp júriw hám máńgige Ózine xızmet etiw ushın lebiylilerdi tańlap aldı», – dedi.

3 Dawıt Jaratqan Iyeniń sandıǵın ózi tayarlaǵan jerge alıp keliw ushın, pútkil Izrail xalqın Erusalimge jıynadı. 4 Keyin tómende atı atalǵan Xaronnıń urpaqların hám lebiylilerdi bir jerge topladı: 5 Qohat urpaǵınan: basshı Urieldi hám onıń bir júz jigirma aǵayinin;
6 Merariy urpaǵınan: basshı Asayanı hám onıń eki júz jigirma aǵayinin;
7 Gershom urpaǵınan: basshı Ioeldi hám onıń bir júz otız aǵayinin;
8 Elisafan urpaǵınan: basshı Shemayanı hám onıń eki júz aǵayinin;
9 Xebron urpaǵınan: basshı Elieldi hám onıń seksen aǵayinin;
10 Uzziel urpaǵınan: basshı Amminadabtı hám onıń bir júz on eki aǵayinin.

11 Sonnan keyin, Dawıt ruwxaniyler Sadoq penen Abiyatardı, lebiyliler Uriel, Asaya, Ioel, Shemaya, Eliel hám Amminadabtı shaqırıp alıp, 12 olarǵa bılay dedi:

– Sizler lebiylilerdiń tiyre basshılarısız. Sonlıqtan lebiyli tuwısqanlarıńız benen birge tazalanıw rásiminen ótińler. Keyin Izraildıń Qudayı Jaratqan Iyeniń sandıǵın men tayarlaǵan orınǵa alıp kelińler. 13 Ótken sapar sandıqtı sizler, lebiyliler kóterip júrmegenińiz ushın, Qudayımız Jaratqan Iye bizlerge ǵázebin shashqan edi. Sonda bizler onı qaǵıydaǵa say, qalay alıp júriw kerekligin Qudaydan soramaǵan edik.

14 Solay etip, ruwxaniyler menen lebiyliler Izraildıń Qudayı Jaratqan Iyeniń sandıǵın alıp keliw ushın, tazalanıw rásiminen ótti. 15 Jaratqan Iyeniń Muwsa arqalı bergen buyrıǵı boyınsha, lebiyliler Qudaydıń sandıǵınıń qadaların iyinlerine qoyıp, kóterip júrdi.

16 Dawıt lebiylilerdiń basshılarına tuwısqanları arasınan arfa, lira hám kimbal saz ásbapları hawazı astında quwanıshlı qosıqlar aytatuǵın qosıqshılardı tayınlawdı tapsırdı. 17 Lebiyliler Ioel ulı Hemandı, onıń tuwısqanlarınan Berexiya ulı Asaftı hám Merariy urpaǵınan Qushaya ulı Etandı tayınladı. 18 Olardan keyingi ekinshi dárejege tuwısqanlarınan mınalar tayınlandı: Zexariya, Ben, Yaziel, Shemiramot, Exiel, Unniy, Eliab, Benaya, Maaseya, Mattitiya, Elifelehu, Mikneya, sonday-aq, dárwaza qarawılları Obed-Edom hám Eiel. 19 Sazendeler Heman, Asaf hám Etanǵa qoladan islengen kimbaldı dańǵırlatıw, 20 Zexariya, Aziel, Shemiramot, Exiel, Unniy, Eliab, Maaseya hám Benayaǵa arfanı joqarǵı dawısta shertiw, 21 al Mattitiya, Elifelehu, Mikneya, Obed-Edom, Eiel hám Azaziyaǵa tómengi dawısta lira shertip, sazda jetekshilik etiw tapsırıldı. 22 Lebiylilerdiń basshısı Kenaniya qosıqshılarǵa juwapker boldı, sebebi ol bul istiń mamanı edi.

23 Berexiya menen Elqana Kelisim sandıǵına qarawıl etip tayınlandı. 24 Shebaniya, Ioshafat, Netanel, Amasay, Zexariya, Benaya, Eliezer atlı ruwxaniyler Qudaydıń Kelisim sandıǵınıń aldında kárnay shertip turatuǵın boldı. Obed-Edom menen Exiya da Kelisim sandıǵın qarawıllap turatuǵın boldı.

25 Solay etip, Dawıt, Izrail aqsaqalları hám mıńbasılar Jaratqan Iyeniń Kelisim sandıǵın Obed-Edomnıń úyinen alıp keliw ushın quwanıshlı túrde jolǵa shıqtı. 26 Jaratqan Iyeniń Kelisim sandıǵın alıp kiyatırǵan lebiylilerge Qudaydıń Ózi yar bolǵanlıqtan, jeti buǵa menen jeti qoshqar qurbanlıqqa shalındı. 27 Dawıt hám sandıqtı kóterip alıp kiyatırǵan lebiyliler, qosıqshılar hám qosıqshılardıń basshısı Kenaniya hasıl zıǵırdan tigilgen kiyim kiygen edi. Bunıń sırtınan Dawıt zıǵır efod ^{▼▼ Efod – ádette ruwxaniyler kiygen kiyim.} ta kiyip alǵan edi. 28 Usılayınsha, pútkil Izrail xalqı hár túrli kárnaylar, kimbal, arfa hám lira naması astında quwanıshlı túrde baqırısıp, Jaratqan Iyeniń Kelisim sandıǵın alıp kiyatırǵan edi. 29 Jaratqan Iyeniń Kelisim sandıǵı Dawıttıń qalasına kirip kiyatırǵanda, Shauldıń qızı Mixal terezeden qarap turǵan edi. Ol shadlanıp oyınǵa túsip kiyatırǵan Dawıt patshanı kórgende, onı óz kewlinde pás kórip ketti.