1Ch 16 | KaaIBT22L | STEP | Qudaydıń sandıǵı alıp kelinip, Dawıttıń arnawlı túrde qurdırǵan shatırınıń ishine qoyıldı. Sońınan Qudayǵa arnap jandırılatuǵın hám tatıwlıq qurbanlıqların berdi.

‏ 1 Chronicles 16

1 Qudaydıń sandıǵı alıp kelinip, Dawıttıń arnawlı túrde qurdırǵan shatırınıń ishine qoyıldı. Sońınan Qudayǵa arnap jandırılatuǵın hám tatıwlıq qurbanlıqların berdi. 2 Jandırılatuǵın hám tatıwlıq qurbanlıqların berip bolǵannan keyin, Dawıt Jaratqan Iyeniń atı menen xalıqqa pátiya berdi. 3 Keyin ol pútkil izraillılarǵa – hár bir erkek hám hár bir hayalǵa bir shórek nan, bir uwıs xurma hám bir dana keptirip nıǵızlanǵan kishmishten tarqattı.

4 Dawıt lebiylilerdiń ayırımların Jaratqan Iyeniń sandıǵı aldında xızmet etip, Izraildıń Qudayı Jaratqan Iyege jalbarınıw hám Onı táriyiplep, alǵıs-maqtaw aytıw ushın tayınladı. 5 Olardıń basshısı Asaf, onıń járdemshisi Zexariya, keyingileri Eiel, Shemiramot, Exiel, Mattitiya, Eliab, Benaya, Obed-Edom hám Eiel edi. Olar arfa hám lira shertiwi, Asaf bolsa bálent dawıslı kimbal, 6 al ruwxaniy Benaya menen Yaxaziel Qudaydıń Kelisim sandıǵınıń aldında hár kúni belgilengen waqıtta kárnay shertiwi tiyis boldı.

Dawıttıń minnetdarshılıq jırı

7 Sol kúni Dawıt birinshi ret Asafqa hám onıń tuwısqanlarına Jaratqan Iyege arnap, mına alǵıslaw jırın aytıwdı tapsırdı:

8 «Jaratqan Iyeni alǵıslap, atın aytıp shaqırıń,
Xalıqlarǵa bildiriń Onıń islerin!
9 Onı jırlap, saz shertip alǵıs aytıń,
Bayan etiń barlıq ájayıp islerin!
10 Onıń muxaddes atı menen maqtanıń,
Jaratqan Iyeni izleytuǵınlardıń júrekleri shadlıqqa tolsın!
11 Jaratqan Iyeni hám Onıń qúdiretin izleń,
Bárqulla Onıń dárgayında bolıwǵa umtılıń!
12 Este saqlań Onıń islegen ájayıp islerin,
Káramatları menen awzınan shıqqan húkimlerin!
13 Háy, Onıń qulı bolǵan Izrail urpaqları,
Ol tańlap alǵan Yaqıptıń balaları!
14 Ol – Jaratqan Iye, bizlerdiń Qudayımız!
Húkimleri pútkil jer júzin qaplaǵan.
15 Máńgige este saqlań Onıń kelisimin,
Mıń-mıńlaǵan áwladlarǵa bergen sózin,
16 Ibrayım menen dúzgen kelisimin,
Ísaqqa bergen antın!
17 Bunı Yaqıp ushın bir qaǵıyda etip tastıyıqladı,
Izrail ushın máńgilik kelisim qılıp:
18 „Áwladlarıńnıń payına tiygen múlik etip,
Qanan jerin saǵan beremen“, – dedi. ^{▼▼ Jar 12:7; 17:8; 26:3; 28:13.}
19 Sol waqıtta olar sanı jaǵınan az edi,
Sol jerde az sanlı hám kelgindi edi.
20 Olar bir xalıqtan ekinshisine,
Bir patshalıqtan ekinshisine gezip júrgen edi.
21 Jaratqan Iye hesh kimniń olardı eziwine jol qoymadı,
Olar ushın patshalarǵa eskertiw berip:
22 „Meniń maylaǵanlarıma tiymeń,
Payǵambarlarıma jamanlıq qılmań!“– dedi.
23 Háy, pútkil dúnya, Jaratqan Iyege arnap qosıq aytıń!
Hár kúni járiyalań Onıń qutqarıwın!
24 Bayan etiń dańqın milletlerge,
Ájayıp islerin barlıq xalıqlarǵa!
25 Awa, Jaratqan Iye ullı, maqtawǵa júdá ılayıqlı,
Barlıq qudaylardan aybatlı.
26 Xalıqlardıń barlıq qudayları jalǵan,
Al Jaratqan Iye kóklerdi jaratqan.
27 Saltanat hám ullılıq Onıń dárgayında,
Qúdiret hám quwanısh Onıń mákanında.
28 Háy, pútkil xalıqlar, Jaratqan Iyeni maqtań,
Jaratqan Iyeniń saltanatın hám qúdiretin maqtań!
29 Jaratqan Iyeniń saltanatın atına ılayıqlı túrde maqtań,
Sıylar alıp, Onıń aldına kiriń!
Muxaddes sán-sawlatqa bólengen Jaratqan Iyege sıyınıń!
30 Titireń pútkil jer júzi Onıń aldında!
Dúnya bekkem ornatılǵan, ol terbelmeydi.
31 Quwansın kókler, yoshlansın jer júzi,
Milletler arasında: „Jaratqan Iye patshalıq qılmaqta!“– dep aytılsın.
32 Yoshlansın teńiz hám onı toltırıp turǵanlar!
Quwansın dala hám onıń ústindegiler!
33 Sonda toǵaydaǵı aǵashlar shadlanıp baqırısar,
Jaratqan Iyeniń aldında.
Óytkeni Ol jer júzin húkim etiw ushın kiyatır.
34 Jaratqan Iyeni táriyipleń, Ol iygilikli,
Sadıqlıǵı máńgi dawam etedi.
35 Oǵan bılay deńler:
„Qutqarıwshımız Quday, bizlerdi qutqar,
Bizlerdi jıynap, basqa xalıqlardan azat et.
Muxaddes atıńdı táriyipleyik,
Saǵan alǵıs ayta alǵanımız ushın maqtanayıq“.
36 Izraildıń Qudayı Jaratqan Iyege,
Áwel bastan, máńgige deyin alǵıslar bolsın!»

Pútkil xalıq: «Awmiyin!» – dep, Jaratqan Iyege alǵıs-maqtawlar ayttı.

Lebiylilerdiń xızmetke tayınlanıwı

37 Dawıt Asaftı hám onıń aǵayinlerin Jaratqan Iyeniń Kelisim sandıǵınıń aldında bolıp, sol jerde hár kúngi mútájliklerge qaray bárqulla xızmet etiw ushın bekitti. 38 Olar menen birge xızmet etiwi ushın Obed-Edomdı hám onıń alpıs segiz lebiyli aǵayinin de tayınladı. Edutunnıń ulı Obed-Edom menen Xosa dárwaza qarawılları boldı.

39 Dawıt ruwxaniy Sadoq penen onıń ruwxaniy tuwısqanların Gibondaǵı sıyınıw ornına qurılǵan Jaratqan Iyeniń Muxaddes shatırına xızmetke qoydı. 40 Olar Jaratqan Iyeniń Izrailǵa bergen Nızamında jazılǵan barlıq qaǵıydalarǵa say, hár kúni tańda hám keshte jandırılatuǵın qurbanlıqlar beriletuǵın qurbanlıq orında Jaratqan Iyege arnap, qurbanlıqlar beretuǵın boldı. 41 Olar menen birge Hemandı, Edutundı hám atları atalıp tańlap alınǵan basqa adamlardı Jaratqan Iyeniń sadıqlıǵınıń máńgi dawam etetuǵının táriyiplew ushın tayınladı. 42 Heman menen Edutun Qudayǵa alǵıs-maqtaw aytılǵanda, kárnay, kimbal, jáne de, basqa saz ásbaplarınıń shertiliwine juwapker edi. Edutunnıń ulları dárwaza qarawılları etip tayınlandı. 43 Sonnan keyin, pútkil xalıq óz úylerine tarqastı. Dawıt ta óz shańaraǵındaǵılarǵa pátiya beriw ushın, úyine qayttı.