1Ch 18 | KaaIBT22L | STEP | Aradan biraz waqıt ótkennen keyin, Dawıt filistlerdi jeńip, olardı boysındırdı. Gat qalasın hám onıń dógeregindegi awıllardı filistlerdiń qolınan tartıp aldı.

‏ 1 Chronicles 18

Dawıttıń jeńisleri

1 Aradan biraz waqıt ótkennen keyin, Dawıt filistlerdi jeńip, olardı boysındırdı. Gat qalasın hám onıń dógeregindegi awıllardı filistlerdiń qolınan tartıp aldı.

2 Sońınan moab xalqın da jeńiliske ushırattı. Olar Dawıtqa baǵınıshlı bolıp, salıq tóleytuǵın boldı.

3 Jáne de, Soba patshası Hadadezer Evfrat dáryası boylap óz patshalıǵın bekitiwge barǵanda, Dawıt oǵan Xamatqa deyin shabıwıl jasap, jeńip shıqtı. 4 Dawıt onıń mıń sawash arbasın, jeti mıń arbalı hám jigirma mıń piyada áskerin qolǵa túsirdi. Ol sawash arbasına jegiletuǵın barlıq atlardıń tirseklerin kesip mayırıp, onnan tek júz attı ǵana alıp qaldı.

5 Dawıt Soba patshası Hadadezerge járdemge kelgen Damaskte jasaytuǵın aramlardan jigirma eki mıń adamdı óltirdi. 6 Sońınan ol Damasktegi aramlardıń jerine óziniń saqshılar toparın ornalastırdı. Aramlar da Dawıtqa baǵınıshlı bolıp, salıq tóleytuǵın boldı. Dawıt qay jerge barsa da, Jaratqan Iye onı jeńiske eristirdi.

7 Dawıt Hadadezerdiń sárkárdaları alıp júrgen altın qalqanlardı alıp, Erusalimge ákeldi. 8 Jáne de, ol Hadadezerdiń qol astındaǵı Tibxat hám Kun qalalarınan kóp muǵdarda qola aldı. Keyin ala, Sulayman bunı Úy ushın háwiz, sútinler hám hár qıylı buyımlar isletiw ushın qollandı.

9 Xamat patshası Tow Dawıttıń Soba patshası Hadadezerdiń pútkil áskerlerin jeńip shıqqanınan xabar taptı. 10 Sonda Tow óz ulı Hadoramdı ^{▼▼ Hadoram – Ioramnıń basqa atı. 2Pat 8:10 qarań.} sálem beriw hám Hadadezer ústinen erisken jeńisi menen qutlıqlaw ushın Dawıt patshaǵa jiberdi. Sebebi Tow Hadadezer menen uzaq waqıttan beri urısıp kiyatırǵan edi. Hadoram Dawıtqa altın, gúmis hám qoladan islengen hár túrli sawǵalar alıp keldi. 11 Patsha Dawıt bul sawǵalardı barlıq milletlerden – edom, moab, ammon, filist hám amalek xalıqlarınan alıp kelgen gúmis hám altın menen birge Jaratqan Iyege baǵıshladı.

12 Seruya ulı Abishay Duz oypatlıǵında edom xalqınan on segiz mıń adamdı qırǵınǵa ushırattı.

13 Dawıt Edomǵa saqshılar toparın ornalastırdı. Pútkil edom xalqı Dawıtqa baǵınıshlı boldı. Dawıt qayda barsa da, Jaratqan Iye onı jeńiske eristirdi.

Dawıttıń xızmetkerleri

14 Dawıt pútkil Izrailda patshalıq etip, xalqına tuwrı hám ádillik penen húkimdarlıq etti. 15 Seruya ulı Ioab sárkárda, Axilud ulı Ehoshafat diywanbegi boldı. 16 Axitub ulı Sadoq penen Abiyatar ulı Abimelex ruwxaniy, al Shawsha ^{▼▼ Shawsha – 2Pat 8:17 de Seraya delingen.} xatker edi. 17 Ehoyada ulı Benaya keretler menen peletlerden alınǵan tán saqshılardıń ^{▼▼ Keretler menen peletlerden alınǵan tán saqshılar – shet elden jallap alınǵan tán saqshılar bolıwı múmkin.} sárkárdası edi. Dawıttıń ulları da patshanıń bas xızmetkerleri boldı.