1Ch 19 | KaaIBT22L | STEP | Aradan bir qansha waqıt ótkennen soń, ammonlardıń patshası Naxash ólip, onıń ornına ulı patsha boldı.

‏ 1 Chronicles 19

Dawıttıń ammonlar menen aramlardı jeńiwi

1 Aradan bir qansha waqıt ótkennen soń, ammonlardıń patshası Naxash ólip, onıń ornına ulı patsha boldı. 2 Sonda Dawıt: «Ákesi maǵan jaqsılıq etkeni ushın, men de Naxash ulı Xanunǵa jaqsılıq eteyin», – dep oylap, ákesiniń ólimine kewil aytıw ushın Xanunǵa elshilerin jiberdi.

Dawıttıń xızmetshileri Xanunǵa kewil bildiriw ushın ammonlardıń jerine barǵanda, 3 ammon basshıları Xanunǵa:

– Dawıt bul adamlardı ákeńizdiń húrmeti ushın, sizge kewil aytıwǵa jibergen dep oylaysız ba? Yaq, olar eldi kózden ótkerip, bilip alıw hám qıyratıw ushın kelgen, – dedi.

4 Solay etip, Xanun Dawıttıń xızmetshilerin tutqınǵa alıp, saqalların qırqtırdı, shapanların jambasına keletuǵın etip kestirip, olardı izine qaytarıp jiberdi.

5 Solay etip, olar qaytıp ketti. Dawıt elshileri tuwralı esitkende, olardı kútip alıw ushın adam jiberdi. Óytkeni elshiler qattı xorlanǵan edi. Patsha olarǵa: «Saqalıńız óskenshe, Erixoda qalıńlar, sońınan qaytıp kelesizler», – dedi.

6 Ammonlar Dawıttı ózlerine qarsı óshegistirip alǵanın túsindi. Sonlıqtan Xanun menen ammonlar Aram-Naharayım, Aram-Maaxa hám Sobadan sawash arbaları menen arbalı áskerlerdi jallap alıw ushın mıń talant ^{▼▼ Mıń talant – bir talant shama menen 34 kg.} gúmis jiberdi. 7 Xanun otız eki mıń sawash arbasın hám Maaxa patshası menen onıń áskerlerin jalladı. Maaxa patshası áskerleri menen kelip, Medeba qalasınıń aldına orda qurdı. Ammonlar da qalalarınan shıǵıp, urısqa atlandı.

8 Dawıt bunı esitkende, Ioabtı hám márt jawıngerlerden ibarat bolǵan pútkil áskerler toparın olarǵa qarsı atlandırdı. 9 Ammonlar shıǵıp, óz qalasınıń dárwazası aldında sap tartıp turdı. Járdemge kelgen patshalar dalada bólek sap tartıp turdı.

10 Ioab aldıdan da, arttan da urısıwǵa tuwrı kelip turǵanın kórgende, Izraildıń aǵla áskerlerinen bazıların tańlap, aramlarǵa qarsı sapqa turǵızdı. 11 Qalǵan toparlardı inisi Abishaydıń qolına tapsırdı. Olar ammonlarǵa qarsı sap tartıp turdı. 12 Ioab inisine bılay dedi:

– Eger aramlar mennen basım kelse, sen maǵan járdemge keleseń. Al ammonlar sennen basım kelse, men saǵan járdemge baraman. 13 Márt bol! Xalqımız ushın hám Qudayımızdıń qalaları ushın mártlershe gúreseyik! Jaratqan Iye neni maqul tapsa, sonı islesin.

14 Ioab áskerleri menen birge aramlarǵa táp bergende, aramlar olardıń aldına túsip qashtı. 15 Aramlardıń qashqanın kórgen ammonlar da Ioabtıń inisi Abishaydan qashıp, qalaǵa kirip ketti. Bunnan keyin, Ioab Erusalimge qaytıp keldi.

16 Aramlar ózleriniń izraillılardan jeńilgenin kórgende, Evfrat dáryasınıń arǵı jaǵasındaǵı aramlarǵa elshiler jiberip, Hadadezerdiń sárkárdası Shofaxtıń qol astındaǵı aramlardı shaqırdı.

17 Bul Dawıtqa málim bolǵanda, ol pútkil Izrail ordasın topladı da, Iordan dáryasın kesip ótip, olarǵa qarsı áskerlerin sapqa turǵızdı. Dawıt aramlarǵa hújimge ótip, olar menen urıstı. 18 Aramlar izraillılardıń aldına túsip qashtı. Dawıt olardıń jeti mıń sawash arbasınıń arbakeshlerin, qırıq mıń piyada áskerin hám olardıń sárkárdası Shofaxtı da óltirdi. 19 Hadadezerdiń qol astındaǵı patshalar ózleriniń izraillılardan jeńilgenin kórgende, Dawıt penen tınıshlıq kelisimin dúzdi hám oǵan baǵınıshlı boldı.

Bunnan keyin, aram xalqı ammon xalqına járdem beriwden bas tartatuǵın boldı.