‏ 1 Chronicles 2

Izraildıń ulları

1Izraildıń ulları mınalar: Ruben, Shimon, Lebiy, Yahuda, Issaxar, Zebulon, 2Dan, Yusup, Benyamin, Naftaliy, Gad hám Asher.

Yahudanıń urpaqları

3Yahudanıń ulları: Er, Onan hám Shela. Yahudaǵa bul úsh uldı qananlı Shuanıń qızı tuwıp berdi. Yahudanıń tuńǵısh ulı Er Jaratqan Iyeniń názerinde jawız is islegeni ushın, Jaratqan Iye onı óltirdi. 4Yahudanıń kelini Tamara da oǵan Peres penen Zeraxtı tuwıp berdi. Yahudanıń barlıǵı bolıp bes ulı boldı. 5Perestiń ulları: Xesron hám Xamul.
6Zeraxtıń ulları: Zimriy, Etan, Heman, Kalkol hám Dara. Olar barlıǵı bolıp besew edi.
7Karmiydiń ulı: baǵıshlanǵan nárselerge qıyanet islep, Izrailǵa apat ákelgen Axar.
8Etannıń ulı: Azariya.
9Xesronnıń ulları: Eraxmeel, Ram hám Kelubay.
10Ramnan Amminadab, Amminadabtan Yahuda urıwınıń kósemi Naxshon tuwıldı. 11Naxshonnan Salma, Salmadan Boaz, 12Boazdan Obid, Obidten Ishay tuwıldı.

13Ishaydıń jeti ulı boldı: tuńǵıshı Eliab, ekinshisi Abinadab, úshinshisi Shimea, 14tórtinshisi Netanel, besinshisi Radday, 15altınshısı Osem, jetinshisi Dawıt. 16Olardıń Seruya hám Abigayıl degen qarındası boldı. Seruyanıń úsh ulı bar edi: Abishay, Ioab hám Asahel. 17Ismayıl urpaǵınan bolǵan Eterge turmısqa shıqqan Abigayıl Amasanı tuwdı.
18Xesronnıń ulı Kalebtiń Azuba hám Eriot degen hayalları boldı. Onıń Azubadan tuwılǵan ulları: Esher, Shobab hám Ardon. 19Azuba ólgennen keyin, Kaleb Efrataǵa úylendi. Efrata oǵan Xurdı tuwıp berdi. 20Xurdan Uriy tuwıldı. Uriyden Besalel tuwıldı.

21Bunnan soń, Xesron Giladtıń ákesi Maxir degen adamnıń qızı menen jattı hám alpıs jasında úylengen bul hayalı oǵan Segubtı tuwıp berdi. 22Yair Segubtıń ulı edi. Yairdiń Gilad jerinde jigirma úsh qalası bar edi. 23Biraq Geshur menen Aram Yairge tiyisli qalalardı, sonday-aq, Kenattı hám onıń aylanasındaǵı alpıs qalanı basıp aldı. Bul jerlerde jasap atırǵan barlıq xalıq Giladtıń ákesi Maxirdiń urpaǵınan edi.

24Xesron Kaleb-Efratada qaytıs bolǵannan soń, hayalı Abiya Ashxurdı tuwdı. Ashxur Teqoa qalasınıń tiykarın salǵan edi.

Xesronnıń ulı Eraxmeeldiń urpaqları

25Xesronnıń tuńǵısh ulı Eraxmeeldiń ulları: tuńǵısh ulı Ram, keyin Buna, Oren, Osem hám Axiya. 26Eraxmeeldiń Atara degen basqa bir hayalı bolıp, ol Onamnıń anası edi. 27Eraxmeeldiń tuńǵısh ulı Ramnıń ulları: Maas, Yamin hám Eker.
28Onamnıń ulları: Shammay, Yada.
Shammaydıń ulları: Nadab, Abishur. 29Abishurdıń Abihayıl degen hayalı bolıp, usı hayalı oǵan Axban menen Molidti tuwıp berdi.
30Nadabtıń ulları: Seled hám Appayım. Seled biyperzent dúnyadan ótti.
31Appayımnıń ulı: Ishiy.
Ishiydiń ulı: Sheshan.
Sheshannıń ulı: Axlay.
32Shammaydıń tuwısqanı Yadanıń ulları: Eter hám Ionatan. Eter biyperzent dúnyadan ótti.
33Ionatannıń ulları: Pelet hám Zaza. Bular Eraxmeeldiń urpaqları edi.

34Sheshannıń ulı bolmay, tek qızları bar edi. Sheshannıń Yarxa degen mısırlı bir qulı bar edi. 35Sheshan qızın qulı Yarxaǵa hayallıqqa berdi. Hayalı oǵan Attaydı tuwıp berdi. 36Attaydan Natan tuwıldı. Natannan Zabad, 37Zabadtan Eflal, Eflaldan Obid, 38Obidten Ehu, Ehudan Azariya, 39Azariyadan Xeles, Xelesten Elasa, 40Elasadan Sismay, Sismaydan Shallum, 41Shallumnan Eqamiya, Eqamiyadan Elishama tuwıldı.

Xesron ulı Kalebtiń urpaqları

42Eraxmeeldiń inisi Kalebtiń ulları: tuńǵısh ulı Ziftiń ákesi Mesha hám ekinshisi Xebronnıń ákesi Maresha boldı. 43Xebronnıń ulları: Qorax, Tappuax, Rekem hám Shema. 44Shemadan Raxam, Raxamnan Iorqoam tuwıldı. Shemanıń ájaǵası Rekemnen Shammay tuwıldı. 45Shammaydan Maon, Maonnan Beyt-Sur tuwıldı.

46Kalebtiń toqalı Efa oǵan Xaran, Mosa hám Gazezdi tuwıp berdi. Xarannıń ulınıń atı da Gazez edi. 47Yahadaydıń ulları: Regem, Iotam, Geshan, Pelet, Efa hám Shaaf.
48Kalebtiń Maaxa atlı basqa toqalı oǵan Sheber menen Tirxananı tuwıp berdi. 49Maaxa Madmannanıń ákesi Shaaftı hám Maxbena menen Gibanıń ákesi Shewanı da tuwdı. Kalebtiń Axsa degen bir qızı boldı. 50Bulardıń hámmesi Kalebtiń urpaqları edi.

Kalebtiń hayalı Efratadan tuwılǵan tuńǵısh ulı Xurdıń ulları: Kiryat-Yarimniń tiykarın salǵan Shobal, 51Beytlehemniń tiykarın salǵan Salma, Beyt-Gaderdiń tiykarın salǵan Xaref.

52Kiryat-Yarimniń tiykarın salǵan Shobaldan Haroe tiyresi, Menuxotta jasaytuǵın xalıqtıń yarımı hám 53Kiryat-Yarimde mákan basqan iter, put, shumat, mishra tiyreleri payda boldı. Bul tiyrelerden Sora menen Eshtaol turǵınları kelip shıqtı.

54Salmadan taraǵan urpaqlar: Beytlehem, Netofa, Atrot-Beyt-Yoab, Manaxattıń yarımı hám Sora turǵınları, 55Yabeste jasaytuǵın xatkerlerdiń tirat, shimeat hám suxat tiyreleri. Bular Rexab urpaqlarınıń babası Xammattıń násilinen kelip shıqqan ken xalqı boladı.