1Ch 20 | KaaIBT22L | STEP | Kelesi jılı báhárde, patshalar urısqa shıǵatuǵın waqıtta, Ioab áskerlerin baslap jolǵa shıqtı. Olar ammonlardıń elin wayran etip, Rabba qalasın qamal qıldı. Biraq Dawıt Erusalimde qalǵan edi. Ioab Rabba qalasına hújim jasap, onı jer menen jeksen etti.

‏ 1 Chronicles 20

Rabba qalasınıń iyelep alınıwı

1 Kelesi jılı báhárde, patshalar urısqa shıǵatuǵın waqıtta, Ioab áskerlerin baslap jolǵa shıqtı. Olar ammonlardıń elin wayran etip, Rabba qalasın qamal qıldı. Biraq Dawıt Erusalimde qalǵan edi. Ioab Rabba qalasına hújim jasap, onı jer menen jeksen etti. 2 Dawıt olardıń patshasınıń basındaǵı tajdı aldı. Hasıl taslar menen bezelgen, awırlıǵı bir talant keletuǵın altın taj Dawıttıń basına kiygizildi. Dawıt qaladan kóp muǵdarda olja da alıp qayttı. 3 Ol qala xalqın sırtqa shıǵarıp, olardı jarǵı, shókkish hám balta menen islenetuǵın jumıslardı islewge májbúr etti. Dawıt ammonlardıń qalalarınıń hámmesinde usılay isledi. Sońınan Dawıt pútkil áskerlerin ertip, Erusalimge qayttı.

Filistlerge qarsı sawash

4 Bir qansha waqıt ótkennen soń, Gezerde filistler menen urıs baslandı. Bul urısta xushalı Sibbexay dáw áwladlarınan ^{▼▼ Dáw áwladlarınan – yamasa «Refa áwladlarınan».} bolǵan Sippaydı óltirdi. Sonda filistler bas iydi.

5 Filistler menen bolǵan basqa sawashta, Yair ulı Elxanan gatlı Goliyattıń tuwısqanı Laxmiydi óltirdi. Laxmiydiń nayzasınıń sabı toqıw úskenesiniń qadasınday edi.

6 Keyinirek Gat qalasında jáne sawash boldı. Ol jerde dáwdey bir adam bar edi. Onıń qolları hám ayaqları altı barmaqlı bolıp, hámmesi bolıp jigirma tórt barmaǵı bar edi. Ol da dáw áwladlarınan edi. 7 Usı adam izraillılardı masqaralaǵanda, Dawıttıń ájaǵası Shimeanıń ulı Ionatan onı óltirdi.

8 Dawıt hám onıń adamları tárepinen óltirilgen usı adamlar da Gattaǵı dáw áwladlarınan edi.