1Ch 27 | KaaIBT22L | STEP | Tómende Izrail xalqınıń áwlad basshıları, mıńbasıları, júzbasıları hám patshalıq islerin alıp baratuǵın olardıń basqarıwshılarınıń dizimi berilgen. Olar hár biri jigirma tórt mıń adamnan ibarat bolǵan, gezek penen jılına bir ay xızmet etetuǵın áskeriy toparlarǵa juwapker boldı.

‏ 1 Chronicles 27

Ordadaǵı áskeriy bólimler

1 Tómende Izrail xalqınıń áwlad basshıları, mıńbasıları, júzbasıları hám patshalıq islerin alıp baratuǵın olardıń basqarıwshılarınıń dizimi berilgen. Olar hár biri jigirma tórt mıń adamnan ibarat bolǵan, gezek penen jılına bir ay xızmet etetuǵın áskeriy toparlarǵa juwapker boldı.

2 Birinshi ay ushın qoyılǵan birinshi bólimge Zabdiel ulı Yashobam basshılıq etti. Oǵan tiyisli bólimde jigirma tórt mıń adam bar edi. 3 Yashobam Perestiń urpaǵınan bolıp, ol birinshi ayda xızmet etetuǵın barlıq áskerbasılarǵa basshı boldı.

4 Ekinshi ay ushın qoyılǵan ekinshi bólimge axoxlı Doday basshılıq etti. Miklot onıń sárkárdası boldı. Oǵan tiyisli bólimde jigirma tórt mıń adam bar edi.

5 Úshinshi ay ushın qoyılǵan úshinshi bólimge ruwxaniy Ehoyadanıń ulı Benaya basshılıq etti. Oǵan tiyisli bólimde jigirma tórt mıń adam bar edi. 6 Otız batırdıń biri hám otız batırdıń jetekshisi bolǵan Benaya usı edi. Onıń ulı Ammizabad ta onıń bóliminde oǵan járdemshi edi.

7 Tórtinshi ay ushın qoyılǵan tórtinshi bólimge Ioabtıń tuwısqanı Asahel basshılıq etti. Sońınan onıń ornın ulı Zebadiya iyeledi. Oǵan tiyisli bólimde jigirma tórt mıń adam bar edi.

8 Besinshi ay ushın qoyılǵan besinshi bólimge izraxlı Shamhut basshılıq etti. Oǵan tiyisli bólimde jigirma tórt mıń adam bar edi.

9 Altınshı ay ushın qoyılǵan altınshı bólimge teqoalı Ikkesh ulı Ira basshılıq etti. Oǵan tiyisli bólimde jigirma tórt mıń adam bar edi.

10 Jetinshi ay ushın qoyılǵan jetinshi bólimge Efrayım urıwınan pelonlı Xeles basshılıq etti. Oǵan tiyisli bólimde jigirma tórt mıń adam bar edi.

11 Segizinshi ay ushın qoyılǵan segizinshi bólimge Zerax urpaǵınan xushalı Sibbexay basshılıq etti. Oǵan tiyisli bólimde jigirma tórt mıń adam bar edi.

12 Toǵızınshı ay ushın qoyılǵan toǵızınshı bólimge Benyamin urıwınan anatotlı Abiezer basshılıq etti. Oǵan tiyisli bólimde jigirma tórt mıń adam bar edi.

13 Onınshı ay ushın qoyılǵan onınshı bólimge Zerax urpaǵınan netofalı Maharay basshılıq etti. Oǵan tiyisli bólimde jigirma tórt mıń adam bar edi.

14 On birinshi ay ushın qoyılǵan on birinshi bólimge Efrayım urıwınan piratonlı Benaya basshılıq etti. Oǵan tiyisli bólimde jigirma tórt mıń adam bar edi.

15 On ekinshi ay ushın qoyılǵan on ekinshi bólimge Otnieldiń urpaǵınan netofalı Xelday basshılıq etti. Oǵan tiyisli bólimde jigirma tórt mıń adam bar edi.

Izrail urıwlarınıń kósemleri

16 Izrail urıwların basqaratuǵın kósemler mınalar boldı: Ruben urıwın Zixriy ulı Eliezer, Shimon urıwın Maaxa ulı Shefatiya, 17 Lebiy urıwın Kemuel ulı Xashabiya, Xaronnıń urpaqların Sadoq, 18 Yahuda urıwın Dawıttıń ájaǵası Elihu, Issaxar urıwın Mixail ulı Omriy, 19 Zebulon urıwın Obadiya ulı Ishmaya, Naftaliy urıwın Azriel ulı Erimot, 20 Efrayım urıwın Azaziya ulı Hoshea, Menashshe urıwınıń yarımın Pedaya ulı Ioel, 21 Giladtaǵı Menashshe urıwınıń basqa yarımın Zexariya ulı Iddo, Benyamin urıwın Abner ulı Yasiel, 22 Dan urıwın Eroxam ulı Azarel basqaratuǵın boldı.

Izrail urıwlarınıń kósemleri usılar edi.

23 Dawıt jigirma hám onnan tómen jastaǵılardı sanamadı. Sebebi Jaratqan Iye Izraildı aspandaǵı juldızlar kibi kóp qılıwǵa wáde bergen edi. 24 Seruya ulı Ioab ta xalıqtı sanaqtan ótkeriwdi baslaǵanı menen, onı aqırına jetkermegen edi. Sol sanaqtıń kesirinen Jaratqan Iye Izrailǵa ǵázebin shashqan edi. Sonlıqtan sanaqtıń nátiyjesi Dawıt patshanıń jılnama kitabına kirgizilmedi.

Patshanıń xızmetkerleri

25 Patshaǵa tiyisli qaznalarǵa qaraw Adiel ulı Azmawetke, al qala átirapındaǵı, qalalardaǵı, awıllardaǵı hám minaralardaǵı qaznalarǵa qaraw Uzziya ulı Ionatanǵa tapsırıldı. 26 Egislik jerlerdi tárbiyalaytuǵın diyxanlarǵa Kelub ulı Ezriy, 27 júzim baǵlarına ramalı Shimey, júzim baǵlarındaǵı sharap saqlanatuǵın orınlarǵa shifamlı Zabdiy, 28 batıstaǵı taw eteklerindegi záytún hám jabayı ánjir aǵashlarına gederli Baal-Xanan, záytún mayı saqlanatuǵın orınlarǵa Ioash, 29 Sharonda otlaytuǵın mallarǵa sharonlı Shitray, oypatlıqlarda baǵılatuǵın mallarǵa Adlay ulı Shafat, 30 túyelerge Ismayıl urpaǵınan Obil, esheklerge meronotlı Exdeya, 31 mayda mallarǵa Ajar urpaǵınan Yaziz juwapker edi.

Bulardıń hámmesi Dawıt patshanıń mal-múlki ústinen qaraytuǵın xızmetkerler edi.

32 Dawıttıń ákesiniń tuwısqanı Ionatan másláhátshi boldı. Ol dana másláhátshi hám xatker edi.

Xaxmon ulı Exiel patshanıń ullarınıń tárbiyashısı boldı.

33 Axitofel patshanıń másláhátshisi, al Ark tiyresinen bolǵan Xushay patshanıń dostı edi.

34 Axitofelden keyin, onıń ornın Benaya ulı Ehoyada menen Abiyatar iyeledi.

Ioab patsha ordasınıń sárkárdası edi.