1Ch 28 | KaaIBT22L | STEP | Dawıt Izraildaǵı barlıq hámeldarlardı – urıw basshıların, patshanıń xızmetindegi áskeriy bólimlerdiń basshıların, mıńbasılardı, júzbasılardı, patshaǵa hám onıń ullarına tiyisli múliklerdi hám súriwlerdi qadaǵalawshılardı, saray xızmetkerlerin, áhmiyetli adamlardı hám barlıq márt jawıngerlerdi Erusalimge jıynadı.

‏ 1 Chronicles 28

Dawıttıń Qudaydıń Úyi ushın jobası

1 Dawıt Izraildaǵı barlıq hámeldarlardı – urıw basshıların, patshanıń xızmetindegi áskeriy bólimlerdiń basshıların, mıńbasılardı, júzbasılardı, patshaǵa hám onıń ullarına tiyisli múliklerdi hám súriwlerdi qadaǵalawshılardı, saray xızmetkerlerin, áhmiyetli adamlardı hám barlıq márt jawıngerlerdi Erusalimge jıynadı.

2 Dawıt patsha ornınan turıp, olarǵa bılay dedi:

– Tuwısqanlarım hám xalqım, meni tıńlańlar! Qudaydıń ayaq qoyǵıshı bolǵan Jaratqan Iyeniń Kelisim sandıǵı ushın turaqlı orın bolatuǵın bir Úy qurmaqshı edim. Qurılıs ushın tayarlıq ta kórdim. 3 Biraq Quday maǵan: «Meniń atıma arnap Úy qurmaysań. Sebebi sen kóp urısıp, qan tókken adamsań», – dedi.

4 Degen menen, Izraildıń Qudayı Jaratqan Iye meniń urpaqlarımnıń máńgige Izrailda patsha bolıwı ushın, ákemniń pútkil násili arasınan meni tańladı. Ol Yahudanı basshı etip tańladı hám Yahuda urıwınan ákemniń shańaraǵın, al ákemniń ulları arasınan meni tańlap, pútkil Izraildıń patshası qılıwdı maqul taptı. 5 Jaratqan Iye maǵan kóp ullar berip, olardıń arasınan Izrail ústinen Jaratqan Iyeniń patshalıq taxtında otırıwı ushın ulım Sulaymandı tańladı. 6 Jaratqan Iye maǵan bılay dedi: «Meniń Úyimdi hám háwlilerimdi ulıń Sulayman quradı. Óytkeni Men onı Ózime ul etip tańladım. Men de oǵan Áke bolaman. 7 Eger ol Meniń buyrıq hám nızamlarımdı házirgidey buljıtpay orınlaytuǵın bolsa, onıń patshalıǵın máńgige bekkemleymen».

8 Endi Qudayımızdıń aldında hám Jaratqan Iyeniń jámiyeti bolǵan Izrail xalqınıń kózi aldında sizlerge tapsıraman: Qudayıńız Jaratqan Iyeniń barlıq buyrıqların muqıyatlı túrde orınlańlar. Sonda sizler usı bereketli jerdi máńgige iyelep, áwladlarıńızǵa máńgige miyras etip beresizler.

9 Al sen, ulım Sulayman, ákeńniń Qudayın tanıp bil hám shın júrekten, jan-tániń menen Oǵan xızmet et. Sebebi Jaratqan Iye hár bir júrekti sınaydı hám barlıq oy-qıyallardı túsinedi. Eger Onı izleseń, sen Onı tabasań. Biraq sen Onı tárk etseń, Ol sennen máńgige júz buradı. 10 Qulaq sal! Muxaddes mákan bolǵan Úydi qurıw ushın Jaratqan Iye seni tańlaǵan eken, sen de márt bolıp iske kiris!

11 Keyin Dawıt Úydiń aywanınıń, onıń imaratlarınıń, zatlar saqlanatuǵın bólmeleriniń, joqarǵı qabatınıń, ishki bólmeleriniń hám gúnadan páklenetuǵın orınnıń sızılmasın ulı Sulaymanǵa berdi. 12 Dawıt Muxaddes Ruwx arqalı ózine ayan bolǵan barlıq sızılmalardı: Jaratqan Iyeniń Úyiniń háwlisi menen dógeregindegi barlıq bólmelerdiń, Qudaydıń Úyiniń ǵáziynexanalarınıń, baǵıshlanǵan sawǵalar qoyılatuǵın bólmelerdiń sızılmalarınıń barlıǵın Sulaymanǵa tapsırdı. 13 Dawıt Sulaymanǵa ruwxaniyler menen lebiylilerdiń toparlarına, olardıń Jaratqan Iyeniń Úyindegi barlıq xızmetlerine hám xızmette qollanılatuǵın barlıq buyımlarǵa baylanıslı kórsetpeler berdi. 14 Ol hár túrli xızmetlerde qollanılatuǵın altın hám gúmis buyımlardı isletiwge kerek bolǵan altın hám gúmistiń muǵdarın da belgilep qoydı: 15 hár bir shıra hám shıra qoyǵıshtıń paydalanılatuǵın xızmetine qaray, hár bir altın shıra qoyǵısh penen onıń shıraları ushın qansha altın, hár bir gúmis shıra qoyǵısh penen onıń shıraları ushın qansha gúmis ketetuǵının ayttı. 16 Sonday-aq, usınılǵan nanlar qoyılatuǵın stollar ushın ketetuǵın altınnıń, gúmis stollar ushın ketetuǵın gúmistiń, 17 shanıshqı, qan sebetuǵın tabaqlar, gúze ushın ketetuǵın sap altınnıń, hár bir altın tostaǵan ushın jumsalatuǵın altınnıń, hár bir gúmis tostaǵan ushın isletiletuǵın gúmistiń, 18 tútetki tútetiletuǵın orın ushın ketetuǵın sap altınnıń mólsherin bildirdi. Bunnan tısqarı, Dawıt oǵan arbanıń, yaǵnıy qanatların jayıp, Jaratqan Iyeniń Kelisim sandıǵın jawıp turatuǵın altın kerublardıń sızılmasın da berdi. 19 Dawıt: «Bulardıń hámmesi Jaratqan Iyeniń kórsetpesi boyınsha jazılıp, jobalastırıldı. Ol maǵan jobanı tolıq túsiniwge qábilet berdi», – dedi.

20 Keyin Dawıt ulı Sulaymanǵa bılay dedi:

– Márt hám batır bolıp, iske kiris! Qorqpa, ruwxıń túspesin. Sebebi Quday Iye, yaǵnıy meniń Qudayım seniń menen birge. Jaratqan Iyeniń Úyiniń barlıq isleri tamam bolmaǵansha, Ol seni taslap ta qoymaydı, tárk te etpeydi. 21 Mine, ruwxaniyler menen lebiylilerdiń toparları Qudaydıń Úyindegi hár qanday jumıs ushın tayar tur. Hár túrli tarawdıń sheber ónermentleri bolǵan qálewshiler saǵan járdem beredi. Al basshılar menen pútkil xalıq seniń buyrıqlarıńa boysınadı.