1Ch 4 | KaaIBT22L | STEP | Yahudanıń urpaqları: Peres, Xesron, Karmiy, Xur hám Shobal.

‏ 1 Chronicles 4

Yahudanıń urpaqları

1 Yahudanıń urpaqları: Peres, Xesron, Karmiy, Xur hám Shobal. 2 Shobaldıń ulı Reaya Yaxattıń ákesi edi. Yaxat Axumay menen Lahadtıń ákesi edi. Bular Sora turǵınlarınıń tiyreleri edi.

3 Izreel, Ishma, Idbash hám olardıń qarındası Haselelponiydiń ákesi Etamnıń tiykarın salǵan edi. 4 Penuel Gedordıń hám Ezer Xushanıń tiykarın salǵan edi. Bular Beytlehemniń tiykarın salıwshılar hám Efratanıń tuńǵısh ulı Xurdıń urpaqları edi.

5 Teqoa qalasınıń tiykarın salǵan Ashxurdıń Xela hám Naara degen eki hayalı bar edi. 6 Naara Ashxurǵa Axuzzam, Xefer, Temeni hám Axashtariydi tuwıp berdi. Bular Naaranıń ulları edi.

7 Ashxurdıń Xeladan tuwılǵan ulları: Seret, Soxar, Etnan 8 hám Qos. Qos Anub penen Hassobebanıń ákesi hám Harum ulı Axarxel tiyreleriniń túp babası edi.

9 Yabes degen bir adam tuwısqanlarına qaraǵanda abıraylıraq edi. Anası: «Onı azap shegip tuwdım», – dep, atın Yabes ^{▼▼ Yabes – bul attıń aytılıwı evrey tilindegi «azap» sózine únles keledi.} qoyǵan edi. 10 Yabes Izraildıń Qudayına: «Qánekey, Sen meni jarılqap, jerlerimdi keńeytkenińde edi! Qolıń meniń ústimde bolıp, azap shekpewim ushın, meni jamanlıqtan saqlasań edi!» – dep jalbarındı. Quday onıń tilegin orınladı.

11 Shuxanıń tuwısqanı Kelub Mexirdiń ákesi, Mexir Eshtonnıń ákesi edi. 12 Eshtonnan Beyt-Rafa, Paseax hám Texinna tuwıldı. Texinna Ir-Naxashtıń tiykarın saldı. Bular burın Rexada jasaytuǵın edi.

13 Kenazdıń ulları: Otniel hám Seraya.

Otnieldiń ulları: Xatat hám Meonotay ^{▼▼ hám Meonotay – Áyyemgi grekshe awdarmanıń bazı qoljazbalarınan hám latınsha awdarmadan. Evreyshe qoljazbalarda bul sózler joq.}. 14 Meonotay Ofranıń ákesi edi. Seraya Ge-Xarashimniń ^{▼▼ Ge-Xarashim – «ónermentshiler oypatlıǵı» degendi bildiredi.} tiykarın salǵan Ioabtıń ákesi edi. Bulay atalıwınıń sebebi, sol jerdiń turǵınları ónermentshilik penen shuǵıllanatuǵın edi.

15 Efunne ulı Kalebtiń ulları: Iru, Ela hám Naam. Elanıń ulı: Kenaz.

16 Ehalleleldiń ulları: Zif, Zifa, Tiriya hám Asarel.

17 Ezranıń ulları: Eter, Mered, Efer, Yalon. Mered faraonnıń qızı Biteaǵa úylenip, ol Meredke Máriyamdı, Shammaydı hám Eshtemoanıń tiykarın salǵan Ishbaxtı tuwıp berdi. 18 Mered jáne yahudalı qızǵa úylendi. Bul hayalı oǵan Gedordıń tiykarın salǵan Eredti, Soxonıń tiykarın salǵan Xeberdi hám Zanoaxtıń tiykarın salǵan Equtieldi tuwıp berdi.

19 Hodiya Naxamnıń qarındasına úylendi. Onnan tuwılǵan ullar Keilada jasaytuǵın Garm tiyresiniń hám Eshtemoada jasaytuǵın Maaxa tiyresiniń túp babası edi.

20 Shimonnıń ulları: Amnon, Rinna, Ben-Xanan hám Tilon.

Ishiydiń urpaqları: Zoxet hám Ben-Zoxet.

21 Yahudanıń ulı Shelanıń ulları: Lexanıń tiykarın salǵan Er, Mareshanıń tiykarın salǵan Laada, Beyt-Ashbeadaǵı hasıl zıǵır toqıwshılardıń áwladları, 22 Iokim, Kozeba turǵınları, Moab penen Yashubiy-Lexemdi basqarǵan Ioash penen Saraf. Bul maǵlıwmatlar áyyemgi jazbalardan alınǵan. 23 Olar Netaim hám Gederada jasaytuǵın hám gúlalshılıq etip, patsha ushın xızmet etetuǵın edi.

Shimonnıń urpaǵı

24 Shimonnıń urpaqları: Nemuel, Yamin, Yarib, Zerax hám Shaul. 25 Shauldan Shallum, Shallumnan Mibsam, Mibsamnan Mishma tuwıldı.

26 Mishmanıń urpaqları: Mishmadan Xammuel, Xammuelden Zakkur, Zakkurdan Shimey tuwıldı.

27 Shimeydiń on altı ulı, altı qızı bar edi. Biraq onıń tuwısqanlarınıń perzentleri az bolǵanlıqtan, olardıń urıwı Yahuda urıwınday úlken bolmadı. 28 Shimonnıń urpaqları Beer-Sheba, Molada, Xasar-Shual, 29 Bilha, Esem, Tolad, 30 Betuel, Xorma, Siklag, 31 Beyt-Markabot, Xasar-Susim, Beyt-Biriy hám Shaarayım qalalarında jasadı. Dawıttıń patshalıǵına deyin usı qalalar Shimonnıń urpaqlarına tiyisli boldı. 32 Olardıń áwladları Etam, Ayın, Rimmon, Toxen hám Ashan atlı bes qalada da jasadı. 33 Baalǵa deyin sozılǵan bul qalalardıń dógeregindegi barlıq awıllar da olarǵa tiyisli boldı. Olar sol jerlerde jasap, ózleriniń shejiresin jazıp bardı.

34 Shimonnıń basqa urpaqları: Meshobab, Yamlex, Amasiya ulı Iosha, 35 Ioel, Asieldiń shawlıǵı Serayanıń aqlıǵı Ioshibiyanıń ulı Ehu, 36 Elyoenay, Yaaqoba, Eshoxaya, Asaya, Adiel, Esimiel, Benaya 37 hám Shemayanıń jawlıǵı Shimriydiń quwlıǵı Edayanıń shawlıǵı Allonnıń aqlıǵı Shifiy ulı Ziza. 38 Joqarıda atı atalǵanlardıń hár biri tiyre basshıları edi. Olardıń násilleri kóbeyip, keńnen taradı. 39 Olar mallarına jaylaw izlep, Gedordıń janına, oypatlıqtıń shıǵısına deyin bardı. 40 Ol jerde mol hám jaqsı jaylawlar bolıp, úlke keń, tınısh hám qáwipsiz edi. Burın ol jerde Xamnıń urpaqlarınıń ayırımları jasaǵan edi.

41 Yahuda patshası Xizkiyanıń dáwirinde, joqarıda atı atalǵan Shimon urpaqları Xam urpaqlarına hám sol jerde jasap atırǵan Meunim urpaqlarına hújim jasap, olardı tolıq qırıp tasladı. Sońınan ózleri sol jerge jaylasıp aldı, olar búgin de sol jerde jasaydı. Sebebi ol jerde súriwleri ushın jaylaw bar edi. 42 Keyin Ishiydiń ulları Pelatiya, Neariya, Refaya hám Uzziel basshılıǵında Shimonnıń urpaǵınan bes júz adam tawlı Seir jerine barıp, 43 Amalek násilinen aman qalǵanlardı qırıp tasladı. Shimon urpaqları búgin de sol jerlerde jasap kelmekte.