1Ch 5 | KaaIBT22L | STEP | Izraildıń tuńǵısh ulı Rubenniń ulları. Ruben Izraildıń tuńǵısh ulı edi. Biraq ol ákesiniń tósegin haramlaǵanı ushın, tuńǵıshlıq huqıqı Izraildıń ulı Yusuptiń ullarına berildi. Sol sebepli Ruben shejirede tuńǵısh ul sıpatında dizimge alınbaǵan.

‏ 1 Chronicles 5

Rubenniń urpaqları

1 Izraildıń tuńǵısh ulı Rubenniń ulları. Ruben Izraildıń tuńǵısh ulı edi. Biraq ol ákesiniń tósegin haramlaǵanı ushın, tuńǵıshlıq huqıqı Izraildıń ulı Yusuptiń ullarına berildi. Sol sebepli Ruben shejirede tuńǵısh ul sıpatında dizimge alınbaǵan. ^{▼▼ Jar 35:22; 49:3-4.} 2 Yahuda tuwısqanları ishinde eń kúshlisi bolıp, húkimdar onıń urpaǵınan shıqsa da, tuńǵıshlıq huqıqı Yusupke tiyisli boldı.

3 Izraildıń birinshi ulı Rubenniń ulları: Xanox, Pallu, Xesron hám Karmiy.

4 Ioeldiń urpaǵı: Ioeldiń ulı Shemaya, Shemayanıń ulı Gog, Gogtıń ulı Shimey, 5 Shimeydiń ulı Mixa, Mixanıń ulı Reaya, Reayanıń ulı Baal hám 6 Baaldıń ulı Beera. Assiriya patshası Tilgat-Pilneser ^{▼▼ Tilgat-Pilneser – kóbinese «Tiglat-Pileser» dep jazılǵan.} Beeranı súrgin qılıp alıp ketkende, ol Ruben urıwınıń kósemi edi. 7 Beeranıń aǵayinleri shejirede tiyreleri boyınsha bılay dizimge alınǵan: jetekshi Eiel, Zexariya 8 hám Bela. Bela Azazdıń ulı, Shemanıń aqlıǵı hám Ioeldiń shawlıǵı edi. Olar Aroerden baslap Nebo menen Baal-Meonǵa deyin sozılǵan jerlerde jasadı. 9 Olardıń Gilad jerindegi padaları kóbeyip ketkenlikten, shıǵıs táreptegi Evfrat dáryasına qaray sozılǵan shólge deyingi jerlerdi iyelep aldı.

10 Shauldıń patshalıq qılǵan dáwirinde, Ruben urpaǵı Ajar urpaǵına qarsı urıs ashtı. Olardı jeńip, Giladtıń shıǵıs tárepindegi olarǵa tiyisli barlıq jerlerdi iyelep aldı.

Gadtıń urpaǵı

11 Gad urıwı Ruben urıwına qońsılas Bashan aymaǵında Salkaǵa deyin sozılǵan jerlerde jasadı. 12 Bashan jerinde Ioel basshı edi, Shafam ekinshi dárejeli basshı, Yanay hám Shafat olardan keyingiler edi.

13 Olardıń aǵayinleri, basqa jeti tiyreniń basshıları mınalar: Mixail, Meshullam, Sheba, Ioray, Yakan, Zia hám Eber. 14 Bular Abixayıldıń ulları bolıp, Abixayıl Xuriydiń, Xuriy Yaroaxtıń, Yaroax Giladtıń, Gilad Mixaildiń, Mixail Eshishaydıń, Eshishay Yaxdonıń, Yaxdo Buzdıń ulı edi.

15 Guniydiń aqlıǵı, Abdieldiń ulı Axiy usı tiyrelerdiń basshısı edi. 16 Gadlılar Giladta, Bashanda, olarǵa tiyisli awıllarda hám Sharonnıń barlıq jaylawlarınıń shegaralarına deyingi jerlerde jasadı. 17 Bulardıń hámmesi Yahuda patshası Iotamnıń hám Izrail patshası Yarobamnıń patshalıq etken dáwirinde shejirege kirgizilgen.

18 Ruben hám Gad urıwları menen Menashshe urıwınıń yarımında urısqa jaramlı qırıq tórt mıń jeti júz alpıs adam bar edi. Olardıń hámmesi qalqan hám qılısh uslap, oq jay tartıp, urısa alatuǵın batırlar edi. 19 Olar Ajar urpaqlarına, Etur, Nafish hám Nodab qáwimlerine qarsı urıs alıp bardı. 20 Olardı jeńiwde Ruben, Gad urıwları menen Menashshe urıwınıń yarımına járdem berildi hám Quday Ajar urpaqları menen onıń awqamlasların olarǵa táslim etti. Sebebi olar urısıp atırıp, dawıslap Qudaydı shaqırǵan edi. Quday da olardıń duwasına juwap berdi, óytkeni olar Oǵan úmit baylaǵan edi. 21 Olar Ajar urpaqlarınıń malların: eliw mıń túye, eki júz eliw mıń qoy, eki mıń eshekti olja qılıp, júz mıń adamdı tutqınǵa aldı. 22 Olarǵa qarsı Qudaydıń Ózi urısqanlıǵı sebepli, dushpanlardıń kópshiligi sawashta qırılıp ketti. Ruben hám Gad urıwları menen Menashshe urıwınıń yarımı súrginge deyin sol jerlerde jasadı.

Menashshe urıwınıń yarımı

23 Menashshe urıwınıń yarımı kóp sanlı edi. Olar Bashannan Baal-Xermonǵa, Senir hám Xermon tawına deyin sozılǵan jerlerde jasadı. 24 Olardıń áwlad basshıları mınalar:

Efer, Ishiy, Eliel, Azriel, Eremiya, Hodawiya hám Yaxdiel. Bular márt jawıngerler, abıraylı erler hám áwlad basshıları edi. 25 Degen menen, olar ata-babalarınıń Qudayına opasızlıq etti. Qudayǵa qıyanet etip, ózleriniń aldında qırıp jiberilgen sol ellerdiń xalıqlarınıń butlarına tabındı. 26 Sol sebepli Izraildıń Qudayı Assiriya patshası Puldı, yaǵnıy Tilgat-Pilneserdi háreketke keltirdi. Assiriya patshası Ruben hám Gad urıwları menen Menashshe urıwınıń yarımın jeńip, olardı tutqınǵa aldı. Olardı Xalaxqa, Xaborǵa, Haraǵa hám Gozandaǵı dárya boyına súrgin qıldı. Olar búgin de sol jerlerde jasap kelmekte.