1Cor 10 | KaaIBT22L | STEP | Tuwısqanlarım! Sizlerdiń mınadan xabarsız qalıwıńızdı qálemeymen: Quday bizlerdiń, yaǵnıy yahudiylerdiń ata-babalarınıń hámmesin bulttıń jetelewi menen júrgizip, olardıń barlıǵın teńizden kesip ótkizdi .

‏ 1 Corinthians 10

Butqa tabınbańlar!

1 Tuwısqanlarım! Sizlerdiń mınadan xabarsız qalıwıńızdı qálemeymen: Quday bizlerdiń, yaǵnıy yahudiylerdiń ata-babalarınıń hámmesin bulttıń jetelewi menen júrgizip, olardıń barlıǵın teńizden kesip ótkizdi ^{▼▼ Shıǵ 13:21-22; 14:21-22.}. 2 Olardıń hámmesi bult astında hám teńizde suwǵa shomıldırıw rásiminen ótkendey bolıp, Muwsanıń izine eriwshiler boldı. 3 Hámmesi Quday káramatlı jol menen bergen birdey awqattı jedi ^{▼▼ Shıǵ 16:35.}. 4 Jáne de, olardıń hámmesi Quday káramatlı jol menen bergen birdey suwdı ishti ^{▼▼ Shıǵ 17:6.}. Sebebi olar ózleri menen birge bolǵan káramatlı jartastan suw ishken edi. Bul jartas – Masiyx edi. 5 Degen menen, olardıń kóbisine Qudaydıń kewli tolmaǵanlıqtan, súyekleri shólde qaldı.

6 Izraillılar sıyaqlı jaman nárselerdi qálemesin dep, bul waqıyalar bizlerge sabaq bolıwı ushın júz berdi. 7 Olardıń ayırımları sıyaqlı butparaz bolmańlar. Óytkeni Muxaddes Jazıwda bılay dep aytılǵan: «Xalıq iship-jew ushın otırdı hám keyin orınlarınan turıp, oyınǵa tústi». ^{▼▼ Shıǵ 32:6.} 8 Olardıń ayırımları sıyaqlı buzıqshılıq islemeyik. Usılay islep, bir kúnniń ishinde jigirma úsh mıń adam nabıt boldı ^{▼▼ San 25:1-9.}. 9 Olardıń bazıları sıyaqlı Iyemizdi ^{▼▼ Iyemizdi – Bazı qoljazbalarda «Masiyxtı».} sınamayıq. Usılay islegenlerdi jılan shaǵıp óltirgen edi ^{▼▼ San 21:4-6.}. 10 Olardıń ayırımları sıyaqlı nalımańlar. Usılay islegenlerdi nabıt qılıwshı perishte óltirgen edi ^{▼▼ San 16:41-49.}.

11 Olardıń basınan keshken bul waqıyalar basqalarǵa sabaq bolıwı ushın júz berdi hám sońǵı zamanlarda jasap atırǵan bizlerge eskertiw bolıwı ushın jazıldı. 12 Sonlıqtan isenimde bekkem turman dep esaplaytuǵın adam usınday gúnalardı islewden saq bolsın! 13 Sizlerdiń basıńızǵa hámme adamlardıń basına túsetuǵın sınaqlardan basqa sınaqlar túsken joq. Quday sadıq, Ol kúshińizden artıq sınaqlarǵa túsiwińizge jol qoymaydı. Sınaqlarǵa shıdawıńız ushın, Ol sınaqlar menen birlikte olardan shıǵıw jolın da beredi.

14 Sonlıqtan súyikli tuwısqanlarım, butparazlıqtan qashıńlar! 15 Men sizlerge aqıllı adamlarǵa sóylegendey, sóylep atırman. Sózlerimdi ózlerińiz aqılǵa salıp kórińler. 16 Bizler shúkirlik bildirip ishetuǵın jarılqaw kesesi arqalı Masiyxtıń qanına sherikles bolmaymız ba? Sındırıp jegen nanımız arqalı da Masiyxtıń denesine sherikles bolmaymız ba? 17 Nan bir bolǵanlıqtan, bizler kóp bolsaq ta, bir denemiz. Sebebi hámmemiz bir nandı bólisemiz. 18 Izrail xalqına qarańlar: qurbanlıqqa berilgenlerdi jegen adamlar qurbanlıq orındaǵı xızmetke sherikles bolmay ma? 19 Endi men ne demekshimen? Butqa shalınǵan qurbanlıq ayrıqsha ma? Buttıń qanday da bir áhmiyeti bar ma? 20 Yaq, olay emes! Meniń aytatuǵınım mınaw: butqa tabınıwshılar qurbanlıqların Qudayǵa emes, al jinlerge beredi. Men sizlerdiń jinlerge sherikles bolıwıńızdı qálemeymen. 21 Sizler hám Iyemizdiń kesesinen, hám jinlerdiń kesesinen ishe almaysızlar. Jáne de, hám Iyemizdiń dasturxanına, hám jinlerdiń dasturxanına sherik bola almaysızlar. 22 Iyemizdi qızǵandırıwǵa qalay batılımız baradı? Bizler ne, Onnan kúshlimiz be?

Hár bir is-háreketińiz arqalı Qudaydı dańqqa bóleńler!

23 Sizler: «Ne islesem de erklimen», – deysizler, biraq hámme nárse de paydalı emes. «Ne islesem de erklimen», – deysizler, biraq hámme nárse de isenimdi jetilistirmeydi. 24 Hár bir adam óziniń emes, al basqalardıń paydasın gózlesin. 25 Hújdanıńızdıń tınısh bolıwı ushın, bazarda satılatuǵın hár qanday góshtiń qanday gósh ekenin soramastan jeńler. 26 Óytkeni: «Jer júzi hám jer júzindegi pútkil barlıq Jaratqan Iyege tiyisli». ^{▼▼ Zab 23:1.}

27 Eger iseniwshi emes bir adam seni awqatqa shaqırsa hám sen de barıwdı qáleseń, hújdanıńnıń tınısh bolıwı ushın, aldıńa qoyılǵan hár bir nárseni soramastan je. 28 Biraq, birew saǵan: «Bul butqa berilgen qurbanlıqtıń góshi» dese, aytqan adamnıń húrmeti ushın hám onıń hújdanı ushın awqattı jeme ^{▼▼ Bazı qoljazbalarda mına sózler de bar: «Sebebi jer Iyemizdiki, onı toltırıp turǵanlar da».}. 29 Men hújdan dep, seniń emes, al basqa adamnıń hújdanın názerde tutıp atırman. Sebebi nege meniń azatlıǵımdı basqa birewdiń hújdanı húkim etiwi kerek? 30 Eger men awqattı shúkirlik penen qabıl etsem, men nege shúkirlik etip jegen awqatım sebepli ayıplanıwım kerek?

31 Solay etip, jeseńiz de, ishseńiz de, ne nárseni isleseńiz de, hámme nárseni Qudaydıń dańqqa bóleniwi ushın isleńler. 32 Yahudiylerdiń de, greklerdiń de, Qudaydıń jámáátleriniń de azǵırılıwına sebep bolmańlar. 33 Men de ózimniń paydamdı emes, al kóplerdiń qutqarılıwı ushın olardıń paydasın gózlep, hár bir iste hár bir adamnıń kewlinen shıǵıwǵa tırısıp atırman.