1Cor 15 | KaaIBT22L | STEP | Tuwısqanlarım, men sizlerge járiyalaǵan Xosh Xabardı esińizge túsiriwdi qáleymen. Sizler onı qabıl ettińler hám onıń tiykarında isenimińizdi bekkemlep aldıńız.

‏ 1 Corinthians 15

Masiyxtıń qayta tiriliwi haqqında

1 Tuwısqanlarım, men sizlerge járiyalaǵan Xosh Xabardı esińizge túsiriwdi qáleymen. Sizler onı qabıl ettińler hám onıń tiykarında isenimińizdi bekkemlep aldıńız. 2 Eger sizler men ózlerińizge járiyalaǵan usı Xosh Xabardı isenim menen bekkem tutsańız, ol arqalı qutqarılasız. Bolmasa, biykarǵa isenip júrgen bolasızlar.

3 Ózim alǵan eń áhmiyetli nárseni men sizlerge jetkizgen edim. Yaǵnıy, Muxaddes Jazıwlar boyınsha, Masiyx bizlerdiń gúnalarımız ushın óldi ^{▼▼ Iysh 53:5-12.}. 4 Jáne de, Muxaddes Jazıwlar boyınsha, Ol qábirge qoyıldı hám úshinshi kúni ólimnen qayta tirildi ^{▼▼ Zab 15:8-10.}. 5 Ol Kifaǵa, keyin on eki shákirtine kórindi. 6 Sońınan bir waqıttıń ózinde bes júzden aslam iseniwshi tuwısqanlarǵa kórindi. Olardıń kóbisi ele tiri, bazıları qaytıs boldı. 7 Bunnan soń, Ol Yaqıpqa ^{▼▼ Yaqıp – Iysanıń inisi.}, keyninen barlıq elshilerge kórindi. 8 Al eń sońında shala tuwılǵan balaǵa megzes bolǵan maǵan da kórindi. 9 Sebebi men elshiler ishindegi eń arzımaǵanıman. Qudaydıń jámáátin quwdalaǵanım ushın, men elshi dep atalıwǵa da ılayıqlı emespen. 10 Biraq, men házir kim bolǵan bolsam, Qudaydıń miyrimi menen boldım. Onıń maǵan degen miyrimi bosqa ketpedi. Men elshilerdiń hámmesinen kóp miynet ettim. Negizinde men emes, al meniń menen birge bolǵan Qudaydıń miyrimi miynet etti. 11 Solay etip, men bolayın yamasa basqa elshiler bolsın, bizler usı nárse haqqında járiyalaymız. Sizler de usıǵan isendińiz.

Ólilerdiń tiriliwi haqqında

12 Masiyx ólimnen qayta tirildi, dep járiyalap atırǵan bolsaq ta, qalay arańızdaǵı bazı adamlar ólimnen tiriliw joq deydi? 13 Eger óliler tirilmeytuǵın bolsa, onda Masiyx ta tirilmegen boladı. 14 Masiyx tirilmegen bolsa, onda bizlerdiń járiyalaǵanlarımız da, sizlerdiń isenimińiz de biykar boladı. 15 Hátte, bizler Quday haqqında jalǵan gúwalıq bergen adamlar bolıp qalamız. Óytkeni bizler Quday Masiyxtı tiriltti, dep gúwalıq bergen edik. Eger óliler haqıyqattan da qayta tirilmeytuǵın bolsa, onda Quday da Masiyxtı tiriltpegen boladı. 16 Eger óliler tirilmeytuǵın bolsa, onda Masiyx ta tirilmegen boladı. 17 Masiyx tirilmegen bolsa, onda sizlerdiń isenimińiz biykar boladı hám sizler ele gúnalarıńızdıń biyligi astında jasap atırǵan bolasızlar. 18 Olay bolsa, Masiyxqa tiyisli bolıp dúnyadan ótken adamlar da nabıt bolǵan boladı. 19 Eger bizler tek bul dúnyadaǵı ómirimizde ǵana Masiyxtan úmit etetuǵın bolsaq, onda bizler hámme adamlar ishindegi eń ayanıshlı adamlar bolǵanımız.

20 Biraq, Masiyx haqıyqattan da ólimnen qayta tirildi! Ol óliler ishinen birinshi bolıp tiriliwi arqalı ólilerdiń tiriletuǵının dálilledi. 21 Bir adam arqalı ólim kelgeni sıyaqlı, bir Adam arqalı ólimnen tiriliw keldi. 22 Yaǵnıy, Adam-ata menen qatnası bolǵan pútkil adamzat óletuǵını sıyaqlı, Masiyx penen qatnası bolǵan barlıq adamlar tirilip, ómirge erisedi. 23 Biraq, hár biri óz gezegi boyınsha tiriledi: eń aldı menen Masiyx tirildi, sońınan Masiyx qaytıp kelgende, Oǵan tiyisli bolǵanlar tiriledi. 24 Bunnan keyin, Masiyx hár bir hákimshilikti, hár bir biylikti hám qúdiretti saplastırıp, patshalıqtı Ákemiz Qudayǵa tapsırǵanda, aqırzaman boladı. 25 Sebebi Quday barlıq dushpanların Masiyxtıń ayaǵınıń astına bastırmaǵansha, Masiyx patshalıq etiwi tiyis. 26 Joq qılınatuǵın sońǵı dushpan – ólim boladı. 27 Óytkeni Muxaddes Jazıwda: «Quday hámme nárseni Onıń ayaqlarına bas urǵızdı», – delingen ^{▼▼ Zab 8:7.}. Biraq, bul «hámme nárseni» degen sózdiń ishinde hámme nárseni Masiyxqa boysındırǵan Quday názerde tutılmaǵanı anıq. 28 Barlıǵı Ulǵa boysınǵanda, Ul da barlıǵın Ózine boysındırǵan Qudayǵa boysınadı. Usılay etip, Quday hámme nárse ústinen tolıq biylik júrgizedi.

29 Eger qayta tiriliw joq bolsa, óliler ushın suwǵa shomıldırılǵanlar ne boladı? Óliler hesh qashan tirilmeytuǵın bolsa, adamlar ne sebepten óliler ushın suwǵa shomıldırıladı? 30 Jáne de, bizler ne ushın hár saat sayın ózimizdi qáwip astına qoyamız? 31 Tuwısqanlarım, sizlerdiń Iyemiz Masiyx Iysa menen bolǵan baylanısıńızdı maqtanısh etip, ant ishemen: men hár kúni ólim menen júzbe-júz ushıraspaqtaman. 32 Eger tek bul dúnyaǵa úmit baylaǵan bolsam, onda nege ólilerdiń tiriletuǵının járiyalap, Efeste ómirimdi qáwip astına qoydım? Eger óliler tirilmeytuǵın bolsa, onda: «Kelińler, iship-jep qalayıq, sebebi erteń ólemiz-ǵo!» ^{▼▼ Iysh 22:13.} – degenimiz orınlı bolar edi. 33 Biraq aldanıp qalmańlar: jaman doslar jaqsı ádetlerden ayıradı. 34 Esińizdi jıyıp, ózińizge kelińler hám endi qaytıp gúna islemeńler. Ayırımlarıńız Qudaydı bilmeysiz. Bulardı sizlerdi uyaltıw ushın aytıp atırman.

Tirilgen dene haqqında

35 Biraq, birew: «Óliler qalay tiriledi? Qanday dene menen keledi?» – dep sorawı múmkin. 36 Ne degen aqılsızlıq! Seniń ekken tuqımıń ólmese, kógerip shıqpaydı-ǵo. 37 Sen ekkenińde, kógerip turǵan ósimliktiń ózin emes, al onıń tek tuqımın, biyday yamasa basqa bir ósimliktiń tuqımın egeseń. 38 Quday tuqımǵa Óz qálewi boyınsha dene beredi. Tuqımlardıń hár birine óz aldına bir dene beredi. 39 Tiri janlardıń denesi birdey emes. Adamlardıń denesi basqa, haywanlardıń denesi basqa, quslardıń hám balıqlardıń denesi basqa boladı. 40 Aspan deneleri bar, jer deneleri de bar. Aspandaǵı denelerdiń sulıwlıǵı basqa, jerdegi denelerdiń sulıwlıǵı basqa. 41 Quyashtıń sulıwlıǵı basqa, aydıń sulıwlıǵı basqa, juldızlardıń sulıwlıǵı basqa. Sulıwlıǵı boyınsha, juldız juldızdan parıq qıladı.

42 Ólilerdiń tiriliwi de sonday boladı. Shiriytuǵın dene kómiledi, biraq ol shirimeytuǵın bolıp tiriledi. 43 Dene xorlıq penen kómiledi, saltanat penen tiriledi. Hálsiz bolıp kómiledi, kúshli bolıp tiriledi. 44 Tábiyǵıy dene kómiledi, biraq ol ruwxıy dene bolıp tiriledi. Tábiyǵıy dene bar bolǵanı sıyaqlı, ruwxıy dene de bar. 45 Óytkeni Muxaddes Jazıwda bılay delingen: «Birinshi adam – Adam-ata tiri jan boldı». ^{▼▼ Jar 2:7.} Al sońǵı Adam – Iysa Masiyx ómir beriwshi ruwx boldı. 46 Biraq, birinshi bolıp ruwxıy dene emes, al tábiyǵıy dene keldi. Ruwxıy dene keyninen keledi. 47 Birinshi adam jerden, yaǵnıy topıraqtan boldı. Ekinshi adam ^{▼▼ Ekinshi adam – Iyemiz Iysa.} aspannan keldi. 48 Topıraqtan bolǵan Adam-ata qanday bolsa, topıraqtan bolǵan adamlar da sonday boladı. Aspannan kelgen Iysa Masiyx qanday bolsa, aspanǵa tiyisli bolǵan adamlar da sonday boladı. 49 Bizler topıraqtan bolǵan Adam-ataǵa qalay uqsaytuǵın bolsaq, aspannan kelgen Iysa Masiyxqa da solay uqsaytuǵın bolamız.

50 Tuwısqanlarım, meniń sizlerge aytıp atırǵanım mınaw: bizlerdiń et penen qannan ibarat bolǵan tábiyǵıy denemiz Qudaydıń Patshalıǵın miyras etip ala almaydı. Shirip ketetuǵın denemiz máńgilik ómirge erise almaydı. 51 Endi men sizlerge bir sırdı ashıp bermekshimen: bizlerdiń hámmemiz ólmeymiz, biraq hámmemiz ózgeremiz. 52 Birden kózdi ashıp-jumǵansha, sońǵı kárnay shalınǵanda, ózgerip ketemiz. Awa, kárnay shalınǵanda, ólgen iseniwshiler shirimeytuǵın denede tiriledi, tiri bolǵan bizler de ózgerip ketemiz. 53 Sebebi bizlerdiń bul shiriytuǵın hám óletuǵın denemiz shirimeytuǵın hám ólmeytuǵın dene bolıp ózgeriwi tiyis. 54 Shiriytuǵın hám óletuǵın denemiz shirimeytuǵın hám ólmeytuǵın bolıp ózgerse, Muxaddes Jazıwda aytılǵan mına sózler iske asadı: «Ólim joq etildi, ol jeńildi!» ^{▼▼ Iysh 25:8.}
55 «Háy ólim, jeńisiń qáne?
Háy ólim, uwlı iyneń qáne?» ^{▼▼ Hosh 13:14.}

56 Ólimniń uwlı iynesi – gúna. Gúna óz kúshin Muxaddes Nızamnan aladı. 57 Biraq, Qudayǵa shúkirler bolsın! Ol bizlerdi Iyemiz Iysa Masiyx arqalı jeńiske eristire beredi.

58 Solay etip, súyikli tuwısqanlarım, taysalmay bekkem turıńlar hám Iyemizdiń xızmetinde bárqulla ǵayratlı bolıńlar. Óytkeni Iyemizdiń jolında etken xızmetińizdiń bosqa ketpeytuǵının bilesizler.