1Cor 16 | KaaIBT22L | STEP | Endi muxaddeslerge beriletuǵın aqshalay járdemge kelsek, sizler de bunı Galatiyadaǵı iseniwshi jámáátlerge tapsırǵanımday isleńler.

‏ 1 Corinthians 16

Mútájlikte jasap atırǵan iseniwshilerge járdem beriw haqqında

1 Endi muxaddeslerge beriletuǵın aqshalay járdemge kelsek, sizler de bunı Galatiyadaǵı iseniwshi jámáátlerge tapsırǵanımday isleńler. 2 Hár ekshembi kúni hár birińiz óz jaǵdayıńızǵa qarap, aqshanı bólek jıynap qoyıń. Sonda men sizlerge barǵanımda, aqshanı jıynap júriwdiń zárúrligi bolmaydı. 3 Sizlerge barǵanımda, bergen sadaqalarıńızdı aparıwǵa kimlerdi ılayıqlı kórseńiz, men sol adamlarǵa xatlar berip, Erusalimge jiberemen. 4 Eger meniń de ketiwim kerek bolsa, olar meniń menen birge ketedi.

Paveldiń jobaları

5 Men sizlerge Makedoniya arqalı baraman. Sebebi men usı úlke arqalı júrmekshimen. 6 Qasıńızda bir qansha waqıt qalıwım, hátte, sizler menen qıstı da birge ótkiziwim múmkin. Sonnan keyin, men qay jerge ketejaq bolsam da, sizler maǵan járdem etersiz. 7 Men bul saparı sizlerdi jol-jónekey kórip ketiwdi qálemeymen. Eger Iyemiz ruxsat etse, sizler menen birge bir qansha waqıt qalaman, dep úmit etemen. 8 Biraq, men Efeste Eliwinshi kúni bayramına ^{▼▼ Eliwinshi kúni bayramı – grekshe «Pentikost». Qutqarılıw bayramınan soń, eliw kún tolǵanda bolatuǵın bayram. Leb 23:15-16 qarań.} deyin qalajaqpan. 9 Óytkeni bul jerde ónimli miynet etiwim ushın maǵan keń jol ashıldı. Degen menen, maǵan qarsı shıǵıp atırǵanlar da kóp.

10 Timofey sizlerge barǵanda, arańızda qáwipsiz júriwi ushın kózqulaq bolıńlar. Sebebi ol da men sıyaqlı Iyemizge xızmet etedi. 11 Sonlıqtan onı hesh kim pás kórmesin. Meniń qasıma keliwi ushın onı aman-esen shıǵarıp salıńlar. Óytkeni men onıń tuwısqanlarımız benen birge keliwin kútip otırman.

12 Tuwısqanımız Apollosqa kelsek, tuwısqanlarımız benen birge sizlerge barıwın onnan kóp ótingen edim. Biraq, ol házir sizlerge barıwdı hesh qálemey atır. Qolaylı jaǵday tuwılǵanda, ol sizlerge baradı.

Paveldiń sońǵı aqıl-násiyatları

13 Sergek bolıńlar, isenimde bekkem turıńlar, márt hám jigerli bolıńlar. 14 Hár bir nárseni súyispenshilik penen isleńler.

15 Axaya úlkesinde birinshi bolıp isengen hám ózlerin muxaddeslerdiń xızmetine baǵıshlaǵan Stepannıń xojalıǵın bilesizler. Sizlerden ótinish, tuwısqanlarım: 16 sizler de usınday adamlarǵa hám olar menen birge miynet etetuǵın adamlardıń hámmesine boysınıńlar. 17 Men Stepannıń, Fortunatustıń hám Axayktıń kelgenine quwanıshlıman. Olar sizlerdiń ornıńızdı basıp, sizlerdiń joqlıǵıńızdı umıttırdı. 18 Olar meniń ruwxımdı da, sizlerdiń ruwxıńızdı da kóterdi. Bunday adamlardıń qádirin bilińler.

Sońǵı sálemnama

19 Aziya úlkesindegi ^{▼▼ Aziya úlkesi – házirgi Turkiya eliniń qubla-batıs bóleginde bolǵan bir úlke.} jámáátler sizlerge sálem aytıp atır. Akila menen Priskilla hám olardıń úyindegi iseniwshiler jámááti Iyemiz benen qatnasta bolǵan sizlerge kóp-kóp sálem aytıp atır. 20 Usı jerdegi barlıq tuwısqanlar da sizlerge sálem aytıp atır. Bir-birińizdi muxaddes posa menen súyip sálemlesińler.

21 Men, Pavel, bul sálemnamanı óz qolım menen jazıp atırman. 22 Iyemizdi súymeytuǵın adamǵa nálet bolsın! O Iyemiz, kele gór! 23 Iyemiz Iysanıń miyrimi sizlerge yar bolsın! 24 Men sizlerdiń hámmeńizdi Masiyx Iysanıń súyispenshiligi menen súyemen. Awmiyin.