1Cor 2 | KaaIBT22L | STEP | Tuwısqanlarım, men sizlerge barıp, Qudaydıń sırın járiyalaǵanımda, sheshen sózler yamasa artıqmash danalıq qollanbadım.

‏ 1 Corinthians 2

Atanaqqa shegelengen Masiyx haqqında járiyalaw

1 Tuwısqanlarım, men sizlerge barıp, Qudaydıń sırın ^{▼▼ sırın – Bazı qoljazbalarda «gúwalıǵın».} járiyalaǵanımda, sheshen sózler yamasa artıqmash danalıq qollanbadım. 2 Sebebi arańızda bolǵan waqtımda, tek Iysa Masiyxqa hám Onıń atanaq aǵashqa shegeleniwine ǵana ayrıqsha dıqqat awdarıwǵa qarar ettim. 3 Men sizlerge hálsizlik hám qorqınısh penen qaltırap bardım. 4 Sóylegen sózim hám aytqan wazım isendiriwshi danalıqqa emes, al Muxaddes Ruwxtıń Óz qúdireti menen kórsetken dáliline tiykarlanǵan edi. 5 Meniń bundaǵı maqsetim – isenimińizdiń adamnıń aqılına emes, al Qudaydıń qúdiretine tiykarlanıwı edi.

Muxaddes Ruwx beretuǵın Qudaydıń danalıǵı

6 Degen menen, bizler ruwxıy jetilisken adamlar arasında dana sózler sóyleymiz. Biraq bul danalıq usı dúnyanıń hám onıń ótkinshi húkimdarlarınıń danalıǵı emes. 7 Bizler Qudaydıń jasırın hám sırlı bolǵan danalıǵı haqqında sóz etip atırmız. Quday dúnyanı jaratpastan burın onı bizlerdiń dańqqa erisiwimiz ushın arnap qoyǵan edi. 8 Bul danalıqtı usı dúnyadaǵı húkimdarlardıń hesh biri túsinbedi. Eger túsingende, ullı Iyemizdi atanaq aǵashqa shegelemegen bolar edi. 9 Muxaddes Jazıwda aytılǵanday: «Kóz kórip, qulaq esitpegen,
Adamnıń oyına kirip te shıqpaǵan nárselerdi,
Quday Ózin súyetuǵınlar ushın tayarlap qoyıptı». ^{▼▼ Iysh 64:4.}

10 Biraq, Quday bunı bizlerge Óziniń Muxaddes Ruwxı arqalı ashıp berdi. Óytkeni Muxaddes Ruwx hámme nárseni, hátte, Qudaydıń tereń oy-pikirlerin de biledi. 11 Adamnıń oyların onıń ishindegi ruwxtan basqa kim bile aladı? Sol sıyaqlı, Qudaydıń oy-pikirlerin de Onıń Muxaddes Ruwxınan basqa hesh kim bile almaydı. 12 Qudaydıń bizlerge bergen miyrimli sıyların biliwimiz ushın, bizler bul dúnyanıń ruwxın emes, al Qudaydıń Ruwxın qabıl etkenbiz. 13 Bizler bul sıylar haqqında adamnıń aqılı úyretken sózler menen emes, al Muxaddes Ruwx úyretken sózler menen sóyleymiz. Yaǵnıy, ruwxıy nárselerdi ruwxıy sózler menen túsindiremiz.

14 Óz tábiyatı boyınsha jasaytuǵın adam Qudaydıń Ruwxı beretuǵın nárselerdi qabıl etpeydi. Sebebi ol bulardı aqmaqlıq dep sanaydı. Olardı tek Muxaddes Ruwxtıń járdeminde túsiniw kerek bolǵanlıqtan, ol túsine almaydı. 15 Muxaddes Ruwxqa boysınatuǵın adam Muxaddes Ruwx tárepinen berilgen hámme nárseni túsine aladı, biraq onı Muxaddes Ruwxqa boysınbaytuǵın adamlar túsine almaydı. 16 «Jaratqan Iyeniń oy-pikirlerin kim bile aladı?
Kim Oǵan másláhátshi bolǵan?» ^{▼▼ Iysh 40:13.}

Biraq, bizler Masiyxtıń aqıl-oyına iyemiz.