1Cor 3 | KaaIBT22L | STEP | Tuwısqanlarım! Men sizlerge Muxaddes Ruwxqa boysınatuǵınlarǵa sóylegendey sóyley almadım. Men sizlerge gúnakar tábiyatqa boysınatuǵınlarǵa, yaǵnıy Masiyx penen bolǵan qatnasta ele gódeklik dárejesinde bolǵanlarǵa sóylegendey sóyledim.

‏ 1 Corinthians 3

Qudaydıń xızmetkerleri haqqında

1 Tuwısqanlarım! Men sizlerge Muxaddes Ruwxqa boysınatuǵınlarǵa sóylegendey sóyley almadım. Men sizlerge gúnakar tábiyatqa boysınatuǵınlarǵa, yaǵnıy Masiyx penen bolǵan qatnasta ele gódeklik dárejesinde bolǵanlarǵa sóylegendey sóyledim. 2 Men sizlerge kúshli awqat emes, al sút berdim. Óytkeni sizler ele kúshli awqattı jewge ázzilik qılatuǵın edińler. Hátte, házir de onı jewge ázzilik qılasızlar. 3 Sebebi sizler ele de gúnakar tábiyatıńızǵa boysınasızlar. Arańızda qızǵanshaqlıq hám tartıslardıń bolǵanı, sizlerdiń gúnakar tábiyatıńızǵa boysınıp, isenbeytuǵın adamlar sıyaqlı jasap atırǵanıńızdı kórsetpey me? 4 Birińiz: «Men Pavelge tiyislimen», basqa birińiz: «Men Apollosqa tiyislimen» deseńiz, sizler isenbeytuǵın adamlar sıyaqlı bolıp qalmaysızlar ma?

5 Olay bolsa, Apollos kim? Pavel kim? Apollos hám men – sizlerdiń tek isenimge keliwińiz ushın qoyılǵan Qudaydıń xızmetkerlerimiz ǵana. Iyemiz hár birimizge xızmet tapsırǵan. 6 Tuqımdı men ektim, Apollos suwǵardı. Biraq, egindi Quday ósirdi. 7 Solay etip, ekken adam da, suwǵarǵan adam da áhmiyetli emes, al egindi ósirgen Quday áhmiyetli. 8 Ekken adam menen suwǵarǵan adamnıń maqseti bir. Olardıń hár biri óz miynetiniń haqısın aladı. 9 Bizler Quday menen birge miynet etemiz. Al sizler – Qudaydıń atızı hám imaratısızlar.

10 Qudaydıń ózime bergen miyrimi menen, men usta qurıwshı sıyaqlı tiykar saldım. Basqaları usı tiykardıń ústine imarat salmaqta. Biraq, hár bir adam qalay salıp atırǵanına dıqqat awdarsın. 11 Óytkeni hesh bir adam salınǵan tiykardan basqa, yaǵnıy Iysa Masiyxtan basqa bir tiykar sala almaydı. 12 Usı tiykardıń ústine adamlar altınnan, gúmisten, hasıl taslardan, aǵashtan, qamıstan yamasa sabannan imarat saladı. 13 Degen menen, hár bir adamnıń islegen isi aqırzamanda ashılıp, otta belgili boladı. Sebebi hár bir adamnıń isiniń qanday ekenligin ot sınap beredi. 14 Kimniń salǵanı otqa shıdasa, ol sıylıq aladı. 15 Al shıdamay janıp ketse, zıyan kóredi. Onıń ózi qutıladı, biraq ottıń ishinen qashqanday bolıp qutıladı.

16 Ózlerińizdiń Qudaydıń ibadatxanası ekenińizdi hám Qudaydıń Ruwxı ishińizde jasap atırǵanın sizler haqıyqattan da bilmeysizler me? 17 Eger kim de kim Qudaydıń ibadatxanasın buzsa, onı Quday uradı. Óytkeni Qudaydıń ibadatxanası – muxaddes hám sol ibadatxana sizlersiz.

18 Hesh bir adam ózin ózi aldamasın. Eger arańızdaǵı birińiz ózin bul dúnyanıń kóz qarası boyınsha danaman dep esaplasa, Quday názerinde dana bolıw ushın, bul dúnyanıń kóz qarası boyınsha «aqılsız» bolsın. 19 Sebebi bul dúnyanıń danalıǵı Quday názerinde aqılsızlıq boladı. Muxaddes Jazıwda aytılǵanday: «Ol danalardı ózleriniń mákkarlıǵı arqalı qolǵa túsiredi». ^{▼▼ Ayup 5:13.} 20 Jáne de: «Danalardıń oy-pikirleriniń push ekenligin Jaratqan Iye biledi», ^{▼▼ Zab 93:11.} – dep jazılǵan. 21 Sonlıqtan hesh bir adam adamlar menen maqtanbasın. Óytkeni hámmesi sizlerge tiyisli: 22 Pavel de, Apollos ta, Kifa da, dúnya da, ómir hám ólim de, házirgi hám keleshek zaman da, hámmesi sizlerge tiyisli. 23 Sizler Masiyxqa tiyislisiz, al Masiyx Qudayǵa tiyisli.