1Cor 4 | KaaIBT22L | STEP | Solay etip, adamlar Masiyxtıń elshileri bolǵan bizlerdi Masiyxtıń xızmetshileri hám Qudaydıń sırların ayan etiwshi xızmetkerler dep esaplasın.

‏ 1 Corinthians 4

Masiyxtıń elshileriniń xızmeti haqqında

1 Solay etip, adamlar Masiyxtıń elshileri bolǵan bizlerdi Masiyxtıń xızmetshileri hám Qudaydıń sırların ayan etiwshi xızmetkerler dep esaplasın. 2 Al xızmetkerlerden talap etiletuǵın eń baslı nárse – sadıqlıq. 3 Meni sizlerdiń yamasa basqa adamlardıń qalay húkim etiwi men ushın áhmiyetli emes. Hátte, men ózim de ózimdi húkim etpeymen. 4 Sebebi meniń hújdanım taza. Biraq, men usı sebepten aqlanbayman. Meni húkim etetuǵın – Iyemizdiń Ózi. 5 Sonlıqtan Iyemiz keliwge deyin, belgilengen waqıttan burın hesh qanday húkim etpeńler. Ol qarańǵılıqta jasırılǵan nárselerdi jaqtıǵa shıǵarıp, adamlardıń kewillerindegi niyetlerin ashıp kórsetedi. Sonda hár bir adam Qudaydan ózine ılayıq maqtaw aladı.

6 Tuwısqanlarım! Aldında aytılǵanlardı túsiniwińiz ushın, men ózimdi hám Apollostı mısal etip kórsettim. Bunı men Muxaddes Jazıwda aytılǵanlardan shetke shıǵıp ketpewdi bizlerden úyreniwińiz ushın hám hesh qaysısıńız bir adamdı ekinshi adamnan joqarı qoyıp, menmensip ketpewińiz ushın isledim. 7 Hesh kim seni basqalardan ústin qılıp qoyǵan joq. Seniń Qudaydan almaǵan nárseń bar ma? Qudaydan hámmesin alǵan bolsań, Onnan almaǵanday bolıp maqtanǵanıń qalay bolǵanı?

8 Sizler endi kerekli hámme nársemiz bar dep oylaysızlar. Sizler bayıp ketipsizler, bizlersiz patshalıq etpektesizler! Qáne endi, sizler haqıyqattan da, patsha bolǵanıńızda edi, bizler de sizler menen birge patshalıq eter edik! 9 Meniń oyımsha, Quday biz elshilerdi eń áhmiyetsiz adamlar qılıp, hámmeniń kóz aldına shıǵardı. Bizler ólimge húkim etilgen adamlar sıyaqlı bolǵanımız sebepli, perishteler ushın da, adamlar ushın da, yaǵnıy pútkil dúnya ushın bir tamasha boldıq. 10 Bizler Masiyx ushın aqılsız boldıq, biraq sizler Masiyx penen qatnasta bolıp aqıllı boldıńlar! Bizler hálsizbiz, biraq sizler kúshlisiz! Sizler húrmetli adamlarsız, biraq bizler izzetsiz adamlarmız! 11 Bizler usı waqıtqa deyin ashlıqqa hám shólge shıdap kelemiz, jalańashpız, tayaq jeymiz, úy-jaysız sergizdanbız. 12 Óz qollarımız benen awır miynet isleymiz. Bizlerge jaman sóz aytqanlarǵa jaqsı tilek tileymiz. Quwdalansaq, shıdaymız. 13 Kewlimizge tiygende, múláyimlilik penen juwap beremiz. Usı waqıtqa deyin dúnyanıń sıpırındısı, pútkil adamzattıń taslandısı boldıq.

14 Bulardı sizlerdi uyaltıw ushın emes, al súyikli balalarım bolǵan sizlerdi aqıllandırıw ushın jazıp atırman. 15 Óytkeni Masiyxtıń jolın úyretetuǵın mıń-mıńlaǵan ustazıńız bar bolsa da, ákeńiz birew. Masiyx Iysa menen qatnasta bolıwıńız ushın, sizlerge Xosh Xabardı járiyalawım arqalı men sizlerdiń ákeńiz boldım. 16 Sol sebepten sizlerden ótinish etemen: mennen órnek alıńlar ^{▼▼ mennen órnek alıńlar – Bazı qoljazbalarda «meniń Masiyxtan órnek alǵanım sıyaqlı, mennen órnek alıńlar».}. 17 Iyemizge sadıq bolǵan súyikli balam Timofeydi usı maqset penen sizlerge jiberdim. Hámme jerde, iseniwshilerdiń hár bir jámáátinde bergen tálimime say bolǵan, meniń Masiyx penen birge basıp ótken jolımdı ol sizlerdiń esińizge túsiredi.

18 Meni kelmeydi dep, arańızdaǵı bazılarıńız menmensip ketipti. 19 Biraq, Iyemiz qálese, jaqın arada sizlerge baraman. Sonda menmensip ketken sol adamlardıń tek sózlerin emes, al olarda Qudaydıń kúshi bar ma ya joq pa, sonı da sınap kóremen. 20 Sebebi Qudaydıń Patshalıǵı sózden emes, al Qudaydıń kúshinen ibarat. 21 Sizler neni qáleysizler? Sizlerge tayaq penen barayın ba yamasa súyispenshilik hám múláyimlilik penen be?