1Cor 5 | KaaIBT22L | STEP | Sizlerdiń arańızda buzıqshılıq islenip atırǵanı haqqında anıq xabarlar bar. Hátte, Qudayǵa isenbeytuǵınlar arasında da ushıraspaytuǵın buzıqshılıq islenipti: arańızdaǵı birińiz ákesiniń hayalı, yaǵnıy ógey anası menen jasaytuǵın qusaydı.

‏ 1 Corinthians 5

Buzıqshılıq islegenge shara kóriw haqqında

1 Sizlerdiń arańızda buzıqshılıq islenip atırǵanı haqqında anıq xabarlar bar. Hátte, Qudayǵa isenbeytuǵınlar arasında da ushıraspaytuǵın buzıqshılıq islenipti: arańızdaǵı birińiz ákesiniń hayalı, yaǵnıy ógey anası menen jasaytuǵın qusaydı. 2 Usılay bolsa da, sizler menmenlikke berilip ketipsizler. Bunıń ornına qayǵırıp, usınday is qılǵandı arańızdan quwıp shıǵarıwıńız kerek emes pe edi?

3 – 4 Meniń ózim arańızda bolmasam da, ruwxım sizler menen birge. Sonlıqtan ózim arańızda bolǵanday, usınday isti islegendi Iyemiz Iysanıń atı menen álle qashan húkim qıldım. Sizler jıynalǵanıńızda, Iyemiz Iysanıń qúdireti menen meniń ruwxım da sizler menen birge boladı. 5 Sonda bul adamnıń gúnakar tábiyatı nabıt bolıp, ruwxı Iyemizdiń kúni qutqarılıwı ushın onı jámáátten quwıp shıǵarıp, shaytanǵa tapsırıń.

6 Sizlerdiń maqtanǵanıńız durıs emes. Azǵantay ashıtqı pútkil qamırdı ashıtatuǵının bilmeysizler me? 7 Sonlıqtan sizler eski ashıtqıdan tazalanıp, jańa qamır bolıńlar. Sizler negizinde ashıtqısız qamırsızlar. Óytkeni Masiyx, yaǵnıy Qutqarılıw bayramına ^{▼▼ Qutqarılıw bayramı – sózlikke qarań.} arnalǵan Qozımız shalındı. 8 Sonlıqtan eski ashıtqı menen, yaǵnıy jawızlıq hám jamanlıq penen emes, al páklik hám haqıyqatlıq penen, yaǵnıy ashıtqısız nan menen bayramlayıq.

9 Men óz xatımda buzıqshılıq isleytuǵınlar menen qatnas jasamań, dep sizlerge jazǵan edim. 10 Degen menen, men ulıwma bul dúnyadaǵı buzıq, nápsiqaw, tonawshı yamasa butparaz adamlardı názerde tutqan joqpan. Eger olay bolǵanda, sizler bul dúnyadan shıǵıp ketiwge májbúr bolar edińler! 11 Biraq, ózin iseniwshi tuwısqanıńızban dep atap turıp, buzıq, nápsiqaw, butparaz, jalaxor, máskúnem yamasa tonawshı bolǵan adam menen qatnas jasamawıńızdı, hátte, sonday adam menen birge awqat ta jemewińizdi jazǵan edim. 12 Iseniwshiler jámáátiniń sırtındaǵı adamlardı húkim qılıw meniń jumısım emes. Sizler iseniwshiler jámáátiniń ishindegi adamlardı húkim qılıwıńız kerek. 13 Al iseniwshiler jámáátiniń sırtındaǵı adamlardı Qudaydıń Ózi húkim qıladı. Muxaddes Jazıwda aytılǵanday: «Jaman adamdı arańızdan quwıp shıǵarıńlar». ^{▼▼ Nzm 19:19; 21:21; 22:21, 24; 24:7.}