1Cor 8 | KaaIBT22L | STEP | Endi butlarǵa berilgen qurbanlıqtıń góshine toqtayıq. Durıs, hámmemiz de bilimli ekenligimizdi bilemiz. Degen menen, bilim adamdı menmen qıladı, al súyispenshilik adamdı jigerlendiredi.

‏ 1 Corinthians 8

Butlarǵa berilgen qurbanlıqtıń góshi haqqında

1 Endi butlarǵa berilgen qurbanlıqtıń góshine toqtayıq.

Durıs, hámmemiz de bilimli ekenligimizdi bilemiz. Degen menen, bilim adamdı menmen qıladı, al súyispenshilik adamdı jigerlendiredi. 2 Adam bir nárseni bilemen dep oylasa, ol ele biliwi kerek nárseni bilmegeni boladı. 3 Biraq, Qudaydı súygen adamdı Quday biledi.

4 Al, butlarǵa berilgen qurbanlıq góshin jewge kelsek, negizinde buttıń dúnyada hesh qanday áhmiyetke iye emes ekenin hám tek ǵana jalǵız Quday bar ekenin bilemiz. 5 Adamlardıń oyı boyınsha jerde de, aspanda da «quday» dep atalatuǵınlar bar. Olar shınında da, kóp «qudaylar» hám «iyeler» bar dep esaplaydı. 6 Biraq, bizler ushın tek jalǵız ǵana Quday Ákemiz bar. Ol hámme nárseniń tiykarı hám bizler Ol ushın jasap atırmız. Jáne de, bizlerdiń tek jalǵız ǵana Iyemiz – Iysa Masiyx bar. Hámme nárse Ol arqalı jaratılǵan, bizler de Ol sebepli jasap atırmız.

7 Degen menen, iseniwshilerdiń hámmesi de usınday bilimge iye emes. Olardıń ayırımları bul góshti jegende, ózleriniń burınǵı butparazlıq ádeti boyınsha, elege deyin onı butqa berilgen qurbanlıqtıń góshi dep esaplaydı. Sonlıqtan olardıń hújdanı qıynalıp, ózlerin iplaslandıq dep oylaydı. 8 Awqat bizlerdi Qudayǵa jaqınlastırmaydı, Jemesek te, hesh nárse joytpaymız, jesek te, hesh nárse arttırmaymız. 9 Biraq, abaylı bolıńlar, bul azatlıǵıńız isenimi hálsizlerdiń azǵırılıwına sebep bolmasın. 10 Eger isenimi hálsiz bolǵan adam bilimge iye bolǵan seniń butxanada awqat jep otırǵanıńdı kórse, onda da butlarǵa berilgen qurbanlıqtıń góshin jewge qálew tuwılmay ma? 11 Solay etip, seniń bilimiń sebepli, bul isenimi hálsiz tuwısqanıń nabıt boladı. Biraq, Masiyx ol ushın da qurban bolǵan. 12 Sizler usı tárizde tuwısqanlarıńızǵa qarsı gúna islewińiz arqalı hám olardıń qıynalıp atırǵan hújdanın azapqa túsiriwińiz arqalı Masiyxqa qarsı gúna islegen bolasızlar. 13 Sonlıqtan meniń jep atırǵan nársem tuwısqanımnıń azǵırılıwına sebep bolatuǵın bolsa, men tuwısqanımdı azǵırmaw ushın, hesh qashan gósh jemeymen.