1Cor 9 | KaaIBT22L | STEP | Men azat adam emespen be? Men elshi emespen be? Men Iyemiz Iysanı kórmedim be? Meniń Iyemiz ushın islegen miynetimniń jemisi sizler emessiz be?

‏ 1 Corinthians 9

Elshiniń huqıqları

1 Men azat adam emespen be? Men elshi emespen be? Men Iyemiz Iysanı kórmedim be? Meniń Iyemiz ushın islegen miynetimniń jemisi sizler emessiz be? 2 Meni basqalar elshi dep sanamasa da, sizler meni elshi dep sanawıńız tiyis! Óytkeni sizler – meniń Iyemizdiń elshisi ekenligimniń dálilisizler.

3 Meni sınǵa alıp atırǵanlardan ózimdi bılay qorǵayman: 4 sizlerge qılǵan xızmetimiz ushın, sizlerdiń esabıńızdan iship-jewimizge haqımız bar. 5 Basqa elshiler sıyaqlı, Iyemizdiń tuwısqanları hám Kifa sıyaqlı, bizler de qasımızǵa iseniwshi hayalımızdı ertip júriwge haqımız bar. 6 Basqa elshiler sıyaqlı, men hám Barnaba da kún kóriw ushın miynet etpew huqıqına iyemiz. 7 Kim óz esabınan áskerlik qıladı? Kim baǵ otırǵızıp, miywesin jemeydi? Kim súriwdi baǵıp, súriwdegi maldıń sútinen ishpeydi?

8 Men bulardı tek adamlardıń pikiri boyınsha aytıp atırǵan joqpan. Muwsanıń Nızamında da anıq usılar haqqında aytılǵan joq pa? 9 Onda: «Túyek aydap atırǵan ógizdiń awzın baylap qoymańlar», ^{▼▼ Nzm 25:4.} – dep jazılǵan-ǵo. Quday tek ógizlerdi qayǵıradı ma? 10 Qudaydıń xızmetkerleri bolǵan bizler ushın aytıp atırǵan joq pa? Awa, álbette, bul bizler ushın jazılǵan. Mısalı: jerdi súrgen adam da, túyek aydaǵan adam da óz úlesin alıwdan úmit etip, miynet isleydi. 11 Arańızda ruwxıy tuqım egip, sizlerden dúnyaǵa tiyisli zatlardı orıp alǵanımız orınsız ba? 12 Basqalar sizlerden usı zatlardı alıw huqıqına iye bolsa, bizler olardan da kóbirek huqıqqa iyemiz. Biraq, bizler usı huqıqımızdan paydalanǵan joqpız. Masiyxtıń Xosh Xabarına tosqınlıq jasamayıq dep, bizler hámme nársege shıdap atırmız. 13 Xabarıńız bar, Ibadatxanada xızmet etetuǵınlar Ibadatxanadan awqat alıp jeydi. Sizlerge málim, qurbanlıq orın átirapında xızmet etetuǵınlar da qurban etilgen nárselerden óz úlesin aladı. 14 Sol sıyaqlı, Iyemiz de Xosh Xabardı járiyalawshılar usı xızmeti arqalı kún kórsin dep buyırǵan.

15 Biraq, men bul huqıqlarımdı hesh qashan qollanǵan emespen. Maǵan usınday qılınsın, dep te jazıp atırǵan joqpan. Bunday islegenimnen góre, ólgenim abzalıraq. Meni usı maqtanıshımnan ayırıwǵa hesh kimge jol qoymayman! 16 Degen menen, Xosh Xabardı járiyalap atırǵanım sebepli maqtanıwǵa haqım joq. Sebebi bul – meniń minnetli wazıypam. Xosh Xabardı járiyalamasam, men hásiret shegemen! 17 Eger men Xosh Xabardı óz ıqtıyarım menen járiyalap atırǵan bolsam, onda miynetimniń haqısın alaman. Biraq eger men onı óz ıqtıyarım menen emes, al isenip tapsırılǵan minnetli wazıypam sıpatında orınlap atırǵan bolsam, 18 onda meniń miynet haqım qanday boladı? Xosh Xabardı járiyalaǵanımda huqıqlarımnan paydalanbay, onı esheyin járiyalawım – meniń miynet haqım boladı.

19 Men azat adamman, hesh kimniń qulı emespen. Biraq, kóp adamlardı Masiyxqa alıp keliw ushın, hámmeniń qulı boldım. 20 Yahudiylerdi Masiyxqa alıp keliw ushın, men yahudiylerge yahudiy sıyaqlı boldım. Muwsanıń Nızamınıń qol astında bolǵanlardı Masiyxqa alıp keliw ushın, ózim Nızamnıń qol astında bolmasam da, men olarǵa Nızamnıń qol astındaǵı adam sıyaqlı boldım. 21 Nızamǵa jat bolǵan basqa milletlerdi Masiyxqa alıp keliw ushın, men olarǵa Nızamǵa jat adamday boldım. Biraq, men Qudaydıń Nızamına jat adam emespen, óytkeni men Masiyxtıń Nızamınıń qol astındaman. 22 Isenimi kúshsizlerdiń Masiyx penen baylanısın bekkem qılıw ushın, men olardıń biri sıyaqlı boldım. Hesh bolmasa ayırım adamlardı bolsa da qutqarıw ushın, men hámmege hámme nárse boldım. 23 Xosh Xabar arqalı keletuǵın bereketten úles alayın dep, men bulardıń hámmesin Xosh Xabar ushın islep atırman.

24 Jarısqa qatnasatuǵınlardıń hámmesi juwırǵanı menen, tek bir adam ǵana sıylıq alatuǵının bilmeysizler me? Sizler de sıylıq alıwıńız ushın solay juwırıńlar. 25 Jarısqa qatnasatuǵınlardıń hámmesi ózlerin barlıq nárseden tıyadı. Olar bunı ótkinshi tajdı alıw ushın isleydi. Al bizler máńgilik tajdı alıw ushın háreket etemiz. 26 Sonlıqtan men maqsetsiz juwırǵan adam sıyaqlı juwırmayman. Judırıǵımdı biykarǵa siltep, hawanı urǵan adam sıyaqlı bolmayman. 27 Al, basqalarǵa Xosh Xabardı járiyalap, ózim ılayıqsız adam bolıp qalmawım ushın, ózimdi tıyıp, denemdi baǵındırıp atırman.