1Jo 3 | KaaIBT22L | STEP | Qarańlar, Qudaydıń balaları dep atalıwımız ushın, Áke bizlerdi qanday ullı súyispenshilik penen súydi! Haqıyqattan da, bizler Qudaydıń balalarımız. Dúnya Ákeni bilmegenlikten, bizlerdi de bilmey atır.

‏ 1 John 3

1 Qarańlar, Qudaydıń balaları dep atalıwımız ushın, Áke bizlerdi qanday ullı súyispenshilik penen súydi! Haqıyqattan da, bizler Qudaydıń balalarımız. Dúnya Ákeni bilmegenlikten, bizlerdi de bilmey atır. 2 Súyikli tuwısqanlarım, bizler endi Qudaydıń balalarımız. Biraq qanday bolatuǵınımız ele bizlerge kórsetilmedi. Masiyx kelgende, Ol sıyaqlı bolatuǵınımızdı bilemiz. Óytkeni Onı haqıyqattan qanday bolsa, sonday kóremiz. 3 Masiyxtan usılay úmit etken hár bir adam Ol pák bolǵanı sıyaqlı, ózin pákleydi.

4 Gúna islegen hár bir adam nızamsızlıq islegen boladı. Sebebi gúnanıń ózi – nızamsızlıq. 5 Al Masiyxtıń gúnalarımızdı alıp taslaw ushın kelgenin bilesizler. Onıń Ózinde gúna joq. 6 Onda jasaytuǵın adam gúna islemeydi. Gúna islewdi dawam etip atırǵan adam Onı kórmegen de, bilmegen de.

7 Perzentlerim! Hesh kimge ózlerińizdi aldatpańlar. Masiyxtıń haq bolǵanı sıyaqlı, haq is islegen adam da haq. 8 Gúna isley beretuǵın adam shaytannan. Óytkeni shaytan bastan baslap gúna islep kiyatır. Sonlıqtan Qudaydıń Ulı shaytannıń islerin joq qılıw ushın keldi. 9 Qudaydan tuwılǵan hár bir adam gúna islemeydi, sebebi Qudaydıń tuqımı onda boladı. Ol Qudaydan tuwılǵanlıqtan, gúna islewdi dawam ete almaydı. 10 Qudaydıń balaları menen shaytannıń balaların mınadan ayırıwǵa boladı: haq is islemegen hám tuwısqanın súymegen adam Qudaydan emes.

Bir-birimizdi súyeyik!

11 Sizler ázelden esitken xabar bul: bir-birimizdi súyeyik! 12 Shaytanǵa tiyisli bolıp, óz tuwısqanın óltirgen Kainǵa uqsamayıq. Ol ne ushın tuwısqanın óltirdi? Óytkeni óziniń isleri jawız, al tuwısqanınıń isleri haq edi ^{▼▼ Jar 4:3-8.}.

13 Tuwısqanlarım, dúnya sizlerdi jek kórip atırǵan bolsa, hayran qalmańlar. 14 Bizler ózlerimizdiń ólimnen ómirge ótkenimizdi bilemiz, sebebi tuwısqanlarımızdı súyemiz. Kim de kim tuwısqanın súymese, ol óli bolıp qala beredi. 15 Tuwısqanın jek kórgen hár bir adam – adam óltiriwshi. Adam óltiriwshi hesh bir adamnıń máńgilik ómirge iye emes ekenin bilesizler.

16 Súyispenshiliktiń ne ekenin Masiyxtıń bizler ushın Óz janın bergeninen bilemiz. Sonlıqtan bizler de tuwısqanlarımız ushın óz janımızdı beriwimiz shárt. 17 Kim de kim dúnya-malǵa bay bola tura, tuwısqanınıń joqshılıqta jasap atırǵanın kórse de tas bawırlıq etse, qalayınsha onday adamda Qudaydıń súyispenshiligi boladı?

18 Perzentlerim, tek sóz yamasa til menen emes, al is hám haqıyqatlıq penen súyeyik. 19 – 20 Haqıyqatqa tiyisli ekenimizdi usı arqalı bilemiz. Eger júregimiz bizlerdi ayıplap atırǵan bolsa da, Quday aldında júregimiz tınısh boladı. Óytkeni Quday júregimizden ullı hám Ol hámme nárseni biledi.

21 Súyikli tuwısqanlarım, eger júregimiz bizlerdi ayıplamasa, onda Qudaydıń aldında batır bolamız 22 hám Onnan ne sorasaq ta alamız. Sebebi bizler Onıń buyrıqların orınlap, Oǵan unaytuǵın nárselerdi islep atırmız. 23 Onıń buyrıǵı bul: Ulı Iysa Masiyxtıń atına isenip, Onıń bizlerge buyırǵanınday, bir-birimizdi súyiwimiz tiyis. 24 Qudaydıń buyrıqların orınlaǵan adam Qudayda, Quday da onda boladı. Onıń bizlerde ekenin Onıń bizlerge bergen Ruwxı arqalı bilemiz.