1Jo 4 | KaaIBT22L | STEP | Súyikli tuwısqanlarım, hár qanday ruwxqa isene bermeńler. Biraq ruwxlardıń Qudaydan bolǵanın yamasa bolmaǵanın biliw ushın, olardı sınap kórińler. Óytkeni dúnyada kóp jalǵan payǵambarlar payda boldı.

‏ 1 John 4

Ruwxlardı sınańlar!

1 Súyikli tuwısqanlarım, hár qanday ruwxqa isene bermeńler. Biraq ruwxlardıń Qudaydan bolǵanın yamasa bolmaǵanın biliw ushın, olardı sınap kórińler. Óytkeni dúnyada kóp jalǵan payǵambarlar payda boldı. 2 Qudaydıń Ruwxın mınadan bilesizler: Iysa Masiyxtıń adam denesinde kelgenin tán alǵan hár qanday ruwx Qudaydan. 3 Iysanı tán almaǵan hár bir ruwx Qudaydan emes. Bul – Masiyxqa qarsı turıwshınıń ruwxı. Sizler onıń keletuǵının esitken edińler. Mine, ol álle qashan dúnyada.

4 Perzentlerim, sizler Qudaydansızlar hám jalǵan payǵambarlardı jeńdińler. Sebebi sizlerdegi Muxaddes Ruwx dúnyadaǵı ruwxtan ullı. 5 Jalǵan payǵambarlar dúnyadan. Sol sebepli, olar dúnyaǵa tiyisli sózlerdi sóyleydi hám dúnya olardı tıńlaydı. 6 Al bizler Qudaydanbız. Kim de kim Qudaydı bilse, bizlerdi tıńlaydı. Al kim de kim Qudaydan bolmasa, bizlerdi tıńlamaydı. Haqıyqat Ruwxı menen jalǵan ruwxtı usınnan ayırıp alamız.

Quday – súyispenshilik

7 Súyikli tuwısqanlarım, bir-birimizdi súyeyik! Óytkeni súyispenshilik Qudaydan. Hár bir súyiwshi adam Qudaydan tuwılǵan hám Qudaydı biledi. 8 Súymeytuǵın adam Qudaydı bilmeydi. Sebebi Quday – súyispenshilik. 9 Quday bizlerge degen súyispenshiligin bılay kórsetti: Quday Óziniń jalǵız Ulın dúnyaǵa jiberip, bizlerge Ol arqalı ómir berdi. 10 Mine, súyispenshilik – usı: bizler Qudaydı emes, al Quday bizlerdi súyip, Óz Ulın bizlerdiń gúnalarımızdıń keshiriliwi ushın qurbanlıq qılıp jiberdi.

11 Súyikli tuwısqanlarım! Quday bizlerdi usılay súygen bolsa, bizler de bir-birimizdi súyiwge parızlımız. 12 Hesh kim hesh qashan Qudaydı kórgen emes. Biraq eger bir-birimizdi súysek, Quday bizlerde boladı hám Onıń súyispenshiligi bizlerde kámal tabadı.

13 Bizlerdiń Onda, Onıń bizlerde ekenin, Onıń bizlerge bergen Ruwxı arqalı bilemiz. 14 Áke Óz Ulın dúnyanıń Qutqarıwshısı qılıp jibergenin bizler kórdik hám bul tuwralı gúwalıq beremiz. 15 Kim de kim Iysanı Qudaydıń Ulı dep tán alsa, Quday onda, ol da Qudayda boladı. 16 Bizler Qudaydıń bizlerge degen súyispenshiligin bilemiz hám oǵan isenemiz.

Quday – súyispenshilik. Kim de kim súyispenshilik penen jasasa, ol Qudayda, Quday da onda boladı. 17 Solay etip, húkim shıǵarılatuǵın qıyamet-qayım kúninde márt bolıwımız ushın, Qudaydıń súyispenshiligi bizlerde kámal tabadı. Óytkeni bizler bul dúnyada Masiyx sıyaqlı bolamız. 18 Súyispenshilikte qorqıw joq. Kerisinshe, minsiz súyispenshilik qorqıwdı quwıp shıǵaradı. Sebebi qorqıw jaza menen baylanıslı boladı. Qorqatuǵın adam súyispenshilikte minsizlikke erispegen.

19 Bizler bir-birimizdi súyemiz ^{▼▼ Bizler bir-birimizdi súyemiz – Bazı qoljazbalarda «Bizler Qudaydı súyemiz».}, óytkeni dáslep Quday bizlerdi súydi. 20 Eger kim de kim: «Qudaydı súyemen» dep, tuwısqanın jek kórse, ol ótirikshi. Sebebi kózge kórinetuǵın tuwısqanın súymegen adam kózge kórinbeytuǵın Qudaydı qalay súye aladı? 21 «Qudaydı súyetuǵın adam óz tuwısqanın da súyiwi tiyis», – degen buyrıqtı bizler Masiyxtan alǵanbız.