1Jo 5 | KaaIBT22L | STEP | Iysanıń Masiyx ekenine isenetuǵın hár bir adam Qudaydan tuwılǵan. Ákeni súygen hár bir adam Onıń balaların da súyedi.

‏ 1 John 5

Dúnyanı jeńetuǵın isenimimiz

1 Iysanıń Masiyx ekenine isenetuǵın hár bir adam Qudaydan tuwılǵan. Ákeni súygen hár bir adam Onıń balaların da súyedi. 2 Qudaydı súyip, Onıń buyrıqların orınlaǵanımızdan Qudaydıń balaların súyetuǵınımızdı bilemiz. 3 Óytkeni Qudaydıń buyrıqların orınlaǵanımız Onı súyetuǵınımızdı ańlatadı. Onıń buyrıqları awır emes. 4 Sebebi Qudaydan tuwılǵan hár bir adam dúnyanı jeńedi. Dúnya ústinen jeńiske erisken bizlerdiń isenimimiz boladı. 5 Iysanıń Qudaydıń Ulı ekenine isenetuǵın adamnan basqa, kim dúnyanı jeńe aladı?

Qudaydıń Ulı haqqında gúwalıq

6 Bul – suw hám qan menen kelgen ^{▼▼ Suw hám qan menen kelgen – shomıldırılıw rásiminen ótip, adamlardıń qutqarılıwı ushın atanaq aǵashta qan tókken.} Iysa Masiyx. Ol tek suw menen emes, al suw hám qan menen keldi. Jáne de, gúwalıq beriwshi Muxaddes Ruwx. Óytkeni Muxaddes Ruwx – haqıyqat. 7 Gúwalıq beretuǵınlar úshew: 8 Muxaddes Ruwx, suw hám qan ^{▼▼ Gúwalıq beretuǵınlar úshew: 8 Muxaddes Ruwx, suw hám qan. – Bazı keyinirektegi qoljazbalarda «Aspanda úsh nárse gúwalıq beredi: Áke, Sóz hám Muxaddes Ruwx. Bul úshewi birew. 8 Jerde de gúwalıq beretuǵın úshew: Ruwx, suw hám qan».}. Bulardıń úshewiniń gúwalıǵı bir. 9 Bizler adamnıń gúwalıǵın qabıl etemiz, al Qudaydıń gúwalıǵı onnan da ullı. Sebebi bul – Qudaydıń Óz Ulı tuwralı bergen gúwalıǵı. 10 Qudaydıń Ulına isenetuǵın adamnıń ózinde usı gúwalıq bar. Al Qudayǵa isenbeytuǵın adam Qudaydı ótirikshi qılǵan boladı. Óytkeni Qudaydıń Óz Ulı tuwralı bergen gúwalıǵına isenbeydi. 11 Sol gúwalıq mınaw: Quday bizlerge máńgilik ómir berdi hám bul ómir Onıń Ulında. 12 Qudaydıń Ulına iye bolǵan adam ómirge iye boladı, Qudaydıń Ulına iye bolmaǵan adam ómirge iye emes.

Máńgi ómir

13 Men bulardı Qudaydıń Ulına isengen sizlerge máńgilik ómirge iye ekenińizdi biliwińiz ushın jazıp atırman. 14 Bizlerde Oǵan degen mınaday batıllıq bar: Qudaydıń erkine say ne sorasaq ta, Ol bizlerdi esitedi. 15 Eger ne sorasaq ta, Onıń esitetuǵının biletuǵın bolsaq, Onnan soraǵanlarımızdı alatuǵınımızdı da bilemiz.

16 Eger kim de kim tuwısqanınıń ólimge aparmaytuǵın gúna islegenin kórse, duwa etsin. Quday oǵan ómir beredi. Bunı ólimge aparmaytuǵın gúna islegenler haqqında aytıp atırman. Ólimge aparatuǵın gúna da bar. Bul ushın duwa etsin, dep atırǵanım joq. 17 Hár qanday jamanlıq – gúna, biraq ólimge aparmaytuǵın gúna da bar.

18 Qudaydan tuwılǵan adam gúna islewdi dawam etpeytuǵının bilemiz. Sebebi Qudaydan tuwılǵan adam ózin ózi saqlaydı hám shaytan oǵan qol tiygize almaydı. 19 Ózlerimizdiń Qudayǵa tiyisli ekenimizdi hám pútkil dúnya shaytannıń qol astında ekenin bilemiz. 20 Jáne de, Qudaydıń Ulı kelip, haqıyqıy Qudaydı biliwimiz ushın aqıl-oy bergenin de bilemiz. Bizler haqıyqıy Qudayda, yaǵnıy Onıń Ulı Iysa Masiyxtamız. Ol – haqıyqıy Quday hám máńgilik ómir.

21 Perzentlerim, ózlerińizdi butlardan saqlańlar!