‏ 1 Kings 12

Izraillılardıń Rexabamǵa qarsı kóteriliwi

1Rexabam Shexemge ketti. Óytkeni pútkil izraillılar Rexabamdı patsha etip qoyıw ushın Shexemge toplanǵan edi. 2Patsha Sulaymannan qashıp, Mısırda jasap atırǵan Nabat ulı Yarobam bunı esitkende, ele Mısırda edi. 3Izraillılar Yarobamdı shaqırttı. Sonda Yarobam hám pútkil Izrail jámiyeti Rexabamǵa kelip:

4– Ákeńiz moynımızǵa awır moyıntırıq salǵan edi. Siz ákeńiz júklegen awır júkti hám ol salǵan moyıntırıqtı jeńilletiń. Sonda sizge xızmet etemiz, – dedi.

5Rexabam olarǵa:

– Endi barıp, úsh kúnnen keyin qaytıp kelińler, – dedi. Solay etip, xalıq tarqastı.

6Patsha Rexabam ákesi Sulaymannıń kóziniń tirisinde oǵan xızmet etken aqsaqallar menen oylasıp:

– Mına xalıqqa ne dep juwap bereyin, qanday másláhát beresizler? – dep soradı.

7Aqsaqallar oǵan:

– Eger búgin siz bul xalıqqa qul bolıp, xızmet etseńiz hám olarǵa juwap bergende, jaqsı sózińizdi ayamasańız, olar sizge bir ómir qul boladı, – dep juwap berdi.

8Degen menen, Rexabam aqsaqallardıń másláhátine qulaq aspay, ózi menen birge ósken jas xızmetshileri menen keńesip, 9olardan:

– «Ákeńizdiń bizlerge salǵan moyıntırıǵın jeńilletseńiz», – dep atırǵan bul xalıqqa ne dep juwap bersem eken? Sizler qanday másláhát beresiz? – dep soradı.

10Sonda ózi menen birge ósken jas jigitler oǵan bılay dep juwap berdi:

– Sizge: «Ákeńiz moynımızǵa awır moyıntırıq salǵan edi, siz onı jeńilletseńiz», – dep atırǵan xalıqqa: «Meniń shunatay barmaǵım ákemniń belinen de juwanıraq. 11Ákem sizlerge awır moyıntırıq salǵan bolsa, men moyıntırıǵıńızdı onnan da awırlataman. Ákem sizlerdi qamshı menen jazalaǵan bolsa, men sizlerdi sım qosıp órilgen qamshı menen jazalayman», – dep aytıń.

12Patshanıń: «Úsh kúnnen keyin qaytıp kelińler», – degen sózi boyınsha, úshinshi kúni Yarobam hám pútkil xalıq Rexabamǵa keldi. 13Patsha aqsaqallardıń ózine bergen keńesine qulaq aspay, xalıqqa qatal juwap berdi. 14Ol jas jigitlerdiń másláháti boyınsha xalıqqa:

– Ákem sizlerge awır moyıntırıq salǵan bolsa, men moyıntırıǵıńızdı onnan da awırlataman. Ákem sizlerdi qamshı menen jazalaǵan bolsa, men sizlerdi sım qosıp órilgen qamshı menen jazalayman, – dedi. 15Patsha xalıqqa qulaq salmadı. Sebebi Jaratqan Iye shilolı Axiya arqalı Nabat ulı Yarobamǵa aytqan sózlerin orınlaw ushın usılay isledi.

16Pútkil izraillılar patshanıń ózlerine qulaq salmaǵanın kórgende, patshaǵa bılay dep juwap berdi:

«Dawıt penen biziń ne baylanısımız bar,
Ishaydıń ulında alatuǵın úlesimiz de joq.
Háy, Izrail xalqı, úylerińizge qaytıńlar!
Háy Dawıt, óz úyiń ózińe ardana bolsın!»

Usılardı aytıp, izraillılar óz úylerine qaytıp ketti.

17Biraq Rexabam Yahuda qalalarında jasaytuǵın izraillılarǵa patshalıq etiwin dawam etti. 18Patsha Rexabam márdikarǵa alınǵanlar ústinen qadaǵalawshı Adoniramdı Izrail xalqına jiberdi. Xalıq onı tas boran qılıp óltirdi. Sonda patsha Rexabam tez sawash arbasına mindi de, Erusalimge qashıp ketti. 19Sol kúnnen baslap házirge deyin, Izrail xalqı Dawıttıń urpaǵına qarsı kóterilip kelmekte. 20Pútkil izraillılar Yarobamnıń Mısırdan qaytıp kelgenin esitkende adam jiberip, onı ózleriniń jıyınına shaqırdı hám pútkil Izrail ústinen patsha etip qoydı. Yahuda urıwınan basqa hesh biri Dawıttıń urpaǵınıń qol astında qalmadı.

Shemayanıń payǵambarshılıǵı

21Sulaymannıń ulı Rexabam Erusalimge bardı da, Izrail urıwları menen urısıp, óz patshalıǵın qaytarıp alıw ushın, pútkil Yahuda hám Benyamin urıwınan bir júz seksen mıń aǵla jawıngerdi áskerlikke topladı. 22Biraq sol arada Qudaydıń adamı bolǵan Shemayaǵa Qudaydan mınaday sóz tústi:

23– Yahuda patshası Sulaymannıń ulı Rexabamǵa, pútkil Yahuda, Benyamin urıwlarına hám sol jerde jasaytuǵın basqa xalıqlarǵa bılay dep ayt: 24«Jaratqan Iye bılay deydi: „Izraillılarǵa, óz tuwısqanlarıńızǵa qarsı urıs ashıp, urıstı baslamańlar. Hár birińiz óz úyińizge qaytıńlar. Óytkeni bul islerdi islep atırǵan Men bolaman“».

Jaratqan Iyeniń bul sózlerin esitken xalıq Onıń buyrıǵına boysınıp, úylerine qayttı.

Beyt-El hám Dandaǵı altın buzawlar

25Yarobam Efrayımnıń tawlı úlkesindegi Shexem qalasın bekkemlep, sol jerde jasay basladı. Sońınan ol jerden ketip, Penuel qalasına qorǵan saldı. 26Yarobam ishinen: «Patshalıq jáne Dawıttıń urpaqlarına ótiwi múmkin. 27Eger bul xalıq Erusalimge, Jaratqan Iyeniń Úyine qurbanlıq beriw ushın bara berse, júrekleri húkimdarına, Yahuda patshası Rexabamǵa awıp keter hám meni óltirip, patshası Rexabam tárepke ótip keter», – dep oyladı.

28Patsha keńesgóyleri menen keńeskennen soń, altınnan eki tananı isletip, xalıqqa: «Háy, Izrail xalqı, sıyınıw ushın endi Erusalimge barıwıńızdıń hájeti joq. Mine, sizlerdi Mısırdan alıp shıqqan qudaylarıńız!» – dedi. 29Ol tanalardıń birewin Beyt-Elge, ekinshisin Dan qalasına qoydı. 30Bul awır gúnaǵa alıp keldi. Sebebi xalıq tanalardıń birewine tabınıw ushın, hátte, Danǵa qaray kete basladı.

31Yarobam sıyınıw orınlarına butxanalar qurdırdı hám xalıq arasınan lebiylilerden bolmaǵan adamlardı ruwxaniyler etip qoydı. 32Yarobam segizinshi aydıń on besinshi kúni Yahudadaǵı bayramǵa eliklep bir bayram shólkemlestirdi. Ol Beyt-Eldegi qurbanlıq orında ózi soqtırǵan tanalarına atap qurbanlıqlar berdi hám sol jerde ózi qurdırǵan sıyınıw orınlarınıń ruwxaniylerin xızmetke qoydı. 33Ol óz qálewi menen belgilep alǵan kúni, segizinshi aydıń on besinshi kúni qurbanlıqtı jaǵıp tútetiw ushın Beyt-Elde ózi qurdırǵan qurbanlıq orınǵa bardı. Sol kúndi Izrail urpaqları ushın bayram kúni dep belgiledi.