1Ki 14 | KaaIBT22L | STEP | Sol waqıtları Yarobamnıń ulı Abiya nawqaslanıp qaldı.

‏ 1 Kings 14

Yarobamnıń ulınıń ólimi

1 Sol waqıtları Yarobamnıń ulı Abiya nawqaslanıp qaldı. 2 Sonda Yarobam hayalına bılay dedi:

– Tur, meniń hayalım ekenińdi bilmewi ushın, kiyimlerińdi ózgertip al da, Shiloǵa bar. Meniń usı xalıqtıń patshası bolatuǵınım tuwralı aldın ala aytqan payǵambar Axiya sol jerde jasaydı. 3 On shórek, bir neshe qıtırlaq nan hám bir gúze pal alıp, oǵan apar. Ulımızǵa ne bolatuǵının ol saǵan aytadı.

4 Hayalı Yarobamnıń aytqanınday islep, Shiloǵa, Axiyanıń úyine ketti. Axiya qartayǵanlıqtan, kózi kórmeytuǵın bolıp qalǵan edi. 5 Jaratqan Iye Axiyaǵa: «Mine, Yarobamnıń hayalı kiyatır. Ol keselge shalınǵan ulına ne bolatuǵının sennen soramaqshı. Sen oǵan mınaday-mınaday dep ayt. Ol ózin basqa hayal etip kórsetiw ushın sırtqı kórinisin ózgertip alǵan», – dedi.

6 Axiya qapıdan kirip kiyatırǵan hayaldıń ayaq sestin esitkende bılay dedi:

– Yarobamnıń hayalı, ishke kir! Nege sırtqı kórinisińdi ózgertip, basqasha kiyinip aldıń? Saǵan jaman xabarlarım bar. 7 Yarobamǵa barıp, bılay dep ayt: «Izraildıń Qudayı Jaratqan Iye bılay deydi: Men seni xalqım arasınan tańlap alıp, Óz xalqıma, izraillılarǵa húkimdar etip qoydım. 8 Patshalıqtı Dawıttıń urpaǵınan tartıp alıp, saǵan berdim. Biraq sen qulım Dawıtqa uqsamadıń. Ol buyrıqlarıma boysındı hám Meniń názerimde durıs bolǵan islerdi islep, shın júrekten Meniń izimnen júrdi. 9 Sen ózińnen aldın jasaǵanlardıń hámmesinen de beter jamanıraq jamanlıqlar islediń. Ózińe basqa qudaylardıń, yaǵnıy tana músinlerin soǵıp alıp, Meniń ǵázebimdi keltirdiń. Sen Mennen júz burdıń.

10 Sol sebepli Men seniń xojalıǵıńdı apatshılıqqa ushıratıp, Izrailda seniń urpaǵıńnan bolǵan pútkil erkek zatın: qul bolsa da, azat adam bolsa da, hámmesin tezektiń túyirin de qaldırmay órtegendey etip órtep, kúlin kókke suwıraman. 11 Seniń xojalıǵıńnan qalada ólgenleri iytlerge, dalada ólgenleri kóktegi quslarǵa jem boladı». Bunı Jaratqan Iye ayttı.

12 Sen endi úyińe qayt. Qalaǵa ayaǵıńdı basıwdan-aq ulıń óledi. 13 Pútkil Izrail xalqı joqlaw aytıp, onı jerleydi. Yarobamnıń xojalıǵınan jalǵız ol ǵana jerlenedi. Sebebi Izraildıń Qudayı Jaratqan Iye Yarobamnıń urpaǵınan jalǵız onda ǵana Ózine unaǵan bir nárselerdi taptı. 14 Endi Jaratqan Iye Ózi ushın Izrailǵa bir patsha qoyadı. Bul patsha sol kúni-aq, awa, házir-aq Yarobamnıń urpaǵın qırıp taslaydı. 15 Jaratqan Iye Izrail xalqın jazalaydı hám ol suwda terbelip turǵan qamısqa uqsap qaladı. Jaratqan Iye olardı ata-babalarına bergen bul jaqsı jerlerden quwıp shıǵarıp, Evfrat dáryasınıń arǵı tárepine shashıratıp jiberedi. Óytkeni olar ózlerine kiyeli aǵashlardı islep alıp, Jaratqan Iyeniń ǵázebin keltirdi. 16 Yarobamnıń islegen hám Izrailǵa isletken gúnaları sebepli Jaratqan Iye Izraildı tárk etedi.

17 Yarobamnıń hayalı ol jerden shıǵıp, Tirsaǵa keldi. Ol úyine ayaq basar-baspastan, bala qaytıs boldı. 18 Pútkil izraillılar onı jerlep, ol ushın aza tuttı. Solay etip, Jaratqan Iyeniń Óz qulı payǵambar Axiya arqalı aytqan sózi orınlandı.

Yarobamnıń ólimi

19 Yarobamnıń basqa isleri, yaǵnıy, qalay urısqanları hám eldi qalay basqarǵanı Izrail patshalarınıń jılnama kitabında jazılǵan. 20 Yarobam jigirma eki jıl patshalıq etti. Ol ólip, ata-babalarına qosılǵannan soń, onıń ornına ulı Nadab patsha boldı.

Yahuda patshası Rexabam

21 Sulaymannıń ulı Rexabam Yahudaǵa patsha bolǵanda qırıq bir jasta edi. Rexabam Jaratqan Iye Óz atın ornatıw ushın Izraildıń pútkil urıwları arasınan tańlap alǵan qalası Erusalimde on jeti jıl patshalıq etti. Onıń anası ammon xalqınan bolıp, atı Naama edi.

22 Yahudalılar Jaratqan Iyeniń názerinde jawız bolǵan islerdi isledi. Olar ata-babaları islegen gúnalardan da úlkenirek gúnalar islep, Jaratqan Iyeniń qızǵanıshlı ǵázebin oyattı. 23 Olar da arqa patshalıq sıyaqlı, ózleri ushın hár bir biyik tóbeshikke hám qoyıw japıraqlı terektiń astına sıyınıw orınların islep, kiyeli taslar menen kiyeli aǵashlar ornattı. 24 Hátte, úlkedegi sıyınıw orınlarında buzıqshılıq isi menen shuǵıllanatuǵın erkekler de boldı. Yahudalılar Jaratqan Iyeniń burın Izrail xalqınıń aldınan quwǵan xalıqları islegen barlıq jerkenishli islerdi isledi.

25 Rexabamnıń patshalıǵınıń besinshi jılında Mısır patshası Shishaq Erusalimge hújim jasadı. 26 Ol Jaratqan Iyeniń Úyindegi hám patsha sarayındaǵı ǵáziynelerdi tartıp alıp ketti. Ol hámme nárseni, Sulayman soqtırǵan altın qalqanlardı da alıp ketti. 27 Sońınan patsha Rexabam bulardıń ornına qoladan qalqanlar isletti hám olardı patsha sarayınıń kirer awzın qorǵaytuǵın saqshılardıń basshılarına berdi. 28 Patsha Jaratqan Iyeniń Úyine hár barǵanda, saqshılar bul qalqanlardı alıp júretuǵın, sońınan jáne saqshılardıń bólmesine aparıp qoyatuǵın edi.

29 Rexabamnıń basqa isleri hám ol islegen hár bir nárse Yahuda patshalarınıń jılnama kitabında jazılǵan. 30 Rexabam menen Yarobam pútkil ómiri dawamında urısıp keldi. 31 Rexabam ólip, ata-babalarına qosılǵanda, ol Dawıttıń qalasına, ata-babalarınıń janına qoyıldı. Rexabamnıń anası ammon xalqınan bolıp, atı Naama edi. Rexabamnıń ornına ulı Abiyam ^{▼▼ Abiyam – yamasa Abiya.} patsha boldı.