‏ 1 Kings 15

Yahuda patshası Abiyam

1Izrail patshası Nabat ulı Yarobamnıń patshalıǵınıń on segizinshi jılında Abiyam Yahudaǵa patsha boldı. 2Ol Erusalimde úsh jıl patshalıq etti. Abiyamnıń anası Abshalomnıń qızı Maaxa edi. 3Abiyam da ákesiniń burın islegen barlıq gúnaların dawam etti. Ol Qudayı Jaratqan Iyege júregin tolıq baǵıshlaǵan babası Dawıtqa uqsamadı. 4Solay bolsa da, Qudayı Jaratqan Iye Dawıttıń húrmeti ushın oǵan Erusalimde bir shıraq jaǵıp berdi: ózinen keyin ulın onıń ornına otırǵızdı hám Erusalimdi bekkemledi. 5Sebebi xet xalqınan bolǵan Uriyaǵa islegen isin esapqa almaǵanda, Dawıt Jaratqan Iyeniń názerinde durıs bolǵan islerdi islep, pútkil ómiri boyı Onıń buyrıqlarınıń hesh birin orınlawdan bas tartpaǵan edi.

6Rexabam menen Yarobam arasındaǵı sawash Abiyamnıń ómiriniń aqırına shekem dawam etti. 7Abiyamnıń basqa isleri hám ol islegen barlıq isler Yahuda patshalarınıń jılnama kitabında jazılǵan. Abiyam menen Yarobam arasında sawash úzliksiz dawam etken edi. 8Abiyam ólip, ata-babalarına qosılǵanda, Dawıttıń qalasına jerlendi. Onıń ornına ulı Asa patsha boldı.

Yahuda patshası Asa

9Izrail patshası Yarobamnıń patshalıǵınıń jigirmalanshı jılında Asa Yahudaǵa patsha boldı. 10Ol Erusalimde qırıq bir jıl patshalıq etti. Onıń kempir apası Abshalomnıń qızı Maaxa edi. 11Asa babası Dawıt sıyaqlı Jaratqan Iyeniń názerinde durıs bolǵan islerdi isledi. 12Ol sıyınıw orınlarındaǵı buzıqshılıq penen shuǵıllanatuǵın erkeklerdi quwıp jiberdi hám ata-babaları islegen barlıq butlardı alıp tasladı. 13Kempir apası Maaxa Asheraǵa arnap jerkenishli bir but soqtırǵanı ushın, patsha Asa onnan xanbiykelik ataǵın tartıp aldı. Asa bul jerkenishli buttı shawıp taslap, Kidron sayında jaǵıp jiberdi. 14Ol tek sıyınıw orınların joq qılmadı, biraq ómir boyı Jaratqan Iyege sadıq qaldı. 15Asa ákesiniń hám óziniń ataǵan nárselerin: gúmisti, altındı hám buyımlardı Jaratqan Iyeniń Úyine alıp keldi.

16Yahuda patshası Asa menen Izrail patshası Baasha arasındaǵı sawash olardıń ómiriniń aqırına shekem dawam etti. 17Izrail patshası Baasha Yahudaǵa qarsı shıǵıp, Yahuda patshası Asanıń jerlerine hesh kimniń kirip-shıqpawı ushın, Rama qalasınıń bekinisin kúsheytti.

18Sonda Asa Jaratqan Iyeniń Úyindegi hám saray qaznasındaǵı qalǵan barlıq gúmis penen altındı aldı da, olardı xızmetshileri arqalı Damaskte jasaytuǵın Aram patshasına, Xezyonnıń aqlıǵı Tabrimmonnıń ulı Ben-Hadadqa jiberip, oǵan bılay dedi: 19«Ákelerimiz arasında bolǵanı sıyaqlı, bizlerdiń aramızda da kelisim bolsın. Sizge sawǵaǵa gúmis hám altın jiberip atırman. Izrail patshası Baasha meniń jerimnen ketiwi ushın, siz onıń menen dúzgen kelisimińizdi buzsańız».

20Ben-Hadad patsha Asanıń usınısın qabıl etip, Izrail qalalarına qarsı áskerbasıların jiberdi. Olar Iyyon, Dan, Abel-Beyt-Maaxa qalaların, pútkil Naftaliy jeri menen birge pútkil Kinneretti basıp aldı. 21Baasha bunı esitkende, Ramanıń bekinisiniń qurılısın toqtatıp, Tirsaǵa qaytıp keldi. 22Patsha Asa birde bir adamdı qaldırmay, pútkil yahudalılardı shaqırdı. Olar Ramanıń bekinisin qurǵanda, Baasha qollanǵan tas hám aǵashlardı Ramadan tasıp alıp ketti hám patsha Asa olardan Benyamin jerindegi Geba hám Mispa qalalarınıń bekinisin kúsheytti.

23Asanıń basqa barlıq isleri, barlıq qaharmanlıqları, barlıq islegen isleri hám ol qurdırǵan barlıq qalalar Yahuda patshalarınıń jılnama kitabında jazılǵan. Ol qartayǵanda ayaq awırıwına shalındı. 24Asa ólip, ata-babalarına qosılǵanda, babası Dawıttıń qalasına, ata-babalarınıń janına jerlendi. Onıń ornına ulı Ehoshafat patsha boldı.

Izrail patshası Nadab

25Yahuda patshası Asanıń patshalıǵınıń ekinshi jılında Yarobamnıń ulı Nadab Izrailǵa patsha boldı hám Izrailda eki jıl patshalıq etti. 26Ol da Jaratqan Iyeniń názerinde jawız bolǵan islerdi islep, ákesiniń jolı hám Izrailǵa isletken gúnaları izinen ketti.

27Nadab hám pútkil izraillılar filistlerdiń Gibbeton qalasın qamal qılıp atırǵanda, Issaxar urıwınan shıqqan Axiya ulı Baasha til biriktirip, Nadabtı Gibbetonda óltirdi. 28Yahuda patshası Asanıń patshalıǵınıń úshinshi jılında Baasha Nadabtı óltirip, onıń ornına patsha boldı. 29Ol taxtqa otırıwdan-aq, Yarobamnıń urpaǵın tolıǵı menen qırıp tasladı. Yarobamnıń xojalıǵı pútkilley joq etilip, birde bir tiri jan qalmadı. Solay etip, Jaratqan Iyeniń Óz qulı shilolı Axiya arqalı aytqan sózi orınlandı. 30Bulardıń hámmesi Yarobamnıń ózi gúna islep, Izrail xalqına da gúna isletip, Izraildıń Qudayı Jaratqan Iyeniń ǵázebin keltirgeni sebepli júz berdi.

31Nadabtıń basqa isleri hám ol islegen barlıq isler Izrail patshalarınıń jılnama kitabında jazılǵan. 32Yahuda patshası Asa menen Izrail patshası Baasha arasındaǵı sawash olardıń ómiriniń aqırına deyin dawam etti.

Izrail patshası Baasha

33Yahuda patshası Asanıń patshalıǵınıń úshinshi jılında Axiya ulı Baasha pútkil Izrail ǵa patsha boldı hám Tirsada jigirma tórt jıl patshalıq etti. 34Baasha Jaratqan Iyeniń názerinde jawız bolǵan islerdi isledi. Ol Yarobamnıń jolın quwıp, oǵan uqsap gúnaǵa battı, Izraildı da gúnaǵa batırdı.