‏ 1 Kings 16

1Jaratqan Iyeden Xananiy ulı Ehuǵa Izrail patshası Baasha haqqında mınaday sóz tústi: 2«Seni Men topıraqtan shıǵarıp alıp, xalqım Izrailǵa húkimdar etip qoydım. Biraq sen Yarobamnıń jolınan júrdiń hám xalqım Izraildı gúnaǵa baslap, olardıń gúnası arqalı Meniń ǵázebimdi keltirdiń. 3Sonlıqtan Nabat ulı Yarobamnıń urpaǵına uqsatıp, seniń hám seniń urpaǵıńnıń kúlin kókke suwıraman. 4Seniń urpaǵıńnan qalada ólgenleri iytlerge, dalada ólgenleri kóktegi quslarǵa jem boladı».

5Baashanıń basqa isleri, ol islegen hár bir nárse, onıń qaharmanlıqları Izrail patshalarınıń jılnama kitabında jazılǵan. 6Baasha ólip, ata-babalarına qosılǵanda, Tirsaǵa jerlendi hám onıń ornına ulı Ela patsha boldı.

7Jaratqan Iyeniń Baashaǵa hám onıń urpaǵına qarsı húkimi Xananiy ulı payǵambar Ehu arqalı aytılǵan edi. Óytkeni Baasha Jaratqan Iyeniń názerinde jawız bolǵan islerdi isledi, Yarobamnıń xojalıǵına eliklep ǵana qoymay, óz gúnaları menen Onıń ǵázebin oyattı hám Yarobamnıń pútkil áwladların qırıp tasladı.

Izrail patshası Ela

8Yahuda patshası Asanıń patshalıǵınıń jigirma altınshı jılında Baasha ulı Ela Tirsada Izrailǵa patsha boldı hám ol eki jıl patshalıq etti. 9Sawash arbalarınıń yarımına basshılıq etetuǵın Zimriy degen bir xızmetshisi Elaǵa qarsı til biriktirdi. Bir kúni Ela Tirsada saray basqarıwshısı Arsanıń úyinde iship, más bolıp qaldı. 10Sonda Zimriy ishke kirip, Elanı óltirdi hám onıń ornına taxtqa otırdı. Bul waqıya Yahuda patshası Asanıń patshalıǵınıń jigirma jetinshi jılında boldı.

11Zimriy patsha bolıp taxtqa otırıwdan-aq, Baashanıń urpaǵın tolıǵı menen qırıp tasladı. Onıń doslarınan da, tuwısqanlarınan da birde bir er adamdı tiri qaldırmadı. 12Jaratqan Iyeniń Baashanıń xojalıǵına qarsı payǵambar Ehu arqalı aytqan sózleri boyınsha, Zimriy Baashanıń urpaǵın pútkilley qırıp tasladı. 13Bul waqıya Baasha hám onıń ulı Elanıń gúnaları kóp bolıp, Izrail xalqın gúnaǵa batırǵanı, ózleriniń jaramsız butları menen Izraildıń Qudayı Jaratqan Iyeniń ǵázebin keltirgeni ushın júz bergen edi.

14Elanıń basqa isleri, ol islegen hámme nárse Izrail patshalarınıń jılnama kitabında jazılǵan.

Izrail patshası Zimriy

15Yahuda patshası Asanıń patshalıǵınıń jigirma jetinshi jılında Zimriy Tirsada tek jeti kún-aq patshalıq etti. Sol waqıtları Izrail áskerleri filistlerdiń Gibbeton qalasın qamal qılıp, ordada jatırǵan edi. 16Ordadaǵı izraillılar Zimriydiń til biriktirip, patshanı óltirgenin esitti hám sol kúni-aq olar sárkárda Omriydi Izrailǵa patsha etip járiyaladı. 17Omriy hám onıń qasındaǵı pútkil izraillılar Gibbetonnan kelip, Tirsanı qamal qıldı. 18Zimriy qalanıń qoldan ketkenin kórgende, patsha sarayınıń qorǵanına kirip, sol jerge ot berdi hám ózi de ottıń ishinde ólip ketti. 19Bul onıń Yarobamnıń gúnalı jolınan júrip, Izraildı gúnaǵa baslaǵanı hám Jaratqan Iyeniń názerinde jawız bolǵan islerdi islegeni sebepli boldı. 20Zimriydiń basqa isleri, onıń patshaǵa islegen qastıyanlıǵı Izrail patshalarınıń jılnama kitabında jazılǵan.

Izrail patshası Omriy

21Bunnan soń, Izrail xalqı ekige bólindi. Olardıń yarımı Ginat ulı Tibniydiń, al yarımı Omriydiń patsha bolıwın qáledi. 22Aqırında, Omriyge ergen xalıq Ginat ulı Tibniyge ergen xalıqtan ústin keldi. Tibniy ólip, Omriy patsha boldı.

23Yahuda patshası Asanıń patshalıǵınıń otız birinshi jılında Omriy Izrailǵa patsha boldı. Ol hámmesi bolıp on eki jıl patshalıq etip, sonıń dáslepki altı jılında Tirsada patshalıq etti. 24Omriy Shemer degen adamnan Samariya tóbeshigin eki talant gúmiske satıp alıp, onıń ústine qala qurdı. Qalanı tóbeshiktiń burınǵı iyesi Shemerdiń atı menen Samariya dep atadı.

25Omriy de Jaratqan Iyeniń názerinde jawız bolǵan islerdi islep, ózinen aldınǵı barlıq patshalardan da jamanıraq jawızlıqlardı isledi. 26Ol tolıq Nabat ulı Yarobamnıń jolınan júrdi hám onıń Izraildı baslaǵan gúnalarına qosılıp, ózleriniń jaramsız butları menen Izraildıń Qudayı Jaratqan Iyeniń ǵázebin keltirdi.

27Omriydiń basqa isleri hám onıń kórsetken qaharmanlıqları Izrail patshalarınıń jılnama kitabında jazılǵan. 28Omriy ólip, ata-babalarına qosılǵanda, Samariyaǵa jerlendi hám onıń ornına ulı Axab patsha boldı.

Izrail patshası Axab

29Yahuda patshası Asanıń patshalıǵınıń otız segizinshi jılında Omriy ulı Axab Izrailǵa patsha boldı hám Samariyada jigirma eki jıl patshalıq etti. 30Omriy ulı Axab Jaratqan Iyeniń názerinde jawız bolǵan islerdi isledi. Onıń bul isleri ózinen burın bolǵan patshalardıń hámmesinikinen de asıp tústi. 31Oǵan Nabat ulı Yarobamnıń gúnalarına sherik bolıw az bolǵanday, Sidon patshası Etbaaldıń qızı Izabelge úylendi hám Baalǵa xızmet etip, oǵan tabına basladı. 32Ol Samariyada Baalǵa arnap qurdırǵan butxanasınıń ishine Baal ushın qurbanlıq orın da qurdı. 33Bunıń ústine, ol kiyeli aǵash ta isletti. Axab ózinen burın ótken Izrail patshalarınıń barlıǵınan da artıǵıraq gúna islep, Izraildıń Qudayı Jaratqan Iyeniń qattı ǵázebin keltirdi.

34Axab patshalıq etken dáwirde, beyt-elli Xiel Erixo qalasın qayta qurdı. Jaratqan Iyeniń Nun ulı Eshua arqalı aldın ala aytqanınday, Xiel qalanıń tiykarın salǵanda, óziniń tuńǵısh ulı Abiramnan, al qalanıń dárwazasın qoyǵanda, genje ulı Segubtan ayırıldı.