1Ki 19 | KaaIBT22L | STEP | Patsha Axab Iliyastıń islegen hámme islerin, barlıq payǵambarlardı qalay qılıshtan ótkergenin xanbiyke Izabelge aytıp berdi.

‏ 1 Kings 19

Iliyastıń qashıp ketiwi

1 Patsha Axab Iliyastıń islegen hámme islerin, barlıq payǵambarlardı qalay qılıshtan ótkergenin xanbiyke Izabelge aytıp berdi. 2 Sonda Izabel Iliyasqa: «Erteń anıq usınday waqıtqa shekem seniń payǵambarlarǵa islegenińdi ózińe islemesem, qudaylar meni jazalaǵan ústine jazalasın», – dep xabar jiberdi.

3 Iliyas bunı esitkende qorqıp, jan saqlaw ushın Yahudadaǵı Beer-Sheba qalasına qashıp barıp, xızmetshisin sol jerde qaldırdı. 4 Al ózi bolsa, shólde bir kún jol júrdi. Aqırında, bir terektiń astına kelip otırdı da, ózine ólim sorap:

– Jaratqan Iye, jeter endi! Janımdı al, meniń ata-babalarımnan artıq jerim joq, – dep duwa etti. 5 Sońınan terektiń shaqaları astına jatıp, uyqıǵa ketti. Tosattan bir perishte onı túrtip:

– Turıp, jep al, – dedi.

6 Iliyas turıp qarasa, bas betinde tasqa qoyıp pisirilgen ıssı shórek penen bir gúze suw turǵan eken. Ol iship-jep bolıp, jáne uyqıǵa ketti.

7 Jaratqan Iyeniń perishtesi ekinshi ret qaytıp keldi de, onı túrtip:

– Turıp, jep al, aldıńda uzaq jol turıptı, – dedi. 8 Iliyas turıp, iship-jedi. Sol awqattan kúsh alǵan Iliyas Qudaydıń tawı bolǵan Xoreb tawına shekem qırıq kún, qırıq tún jol júrdi. 9 Ol sol jerdegi bir úńgirge kirip túnedi.

Jaratqan Iyeniń Iliyasqa kóriniwi

Mine, Jaratqan Iyeden Iliyasqa sóz tústi. Ol Iliyasqa:

– Iliyas, bul jerde ne qılıp atırsań? – dep soradı.

10 Iliyas Oǵan:

– Álemniń Qudayı, Jaratqan Iye, men Saǵan shın ıqlas penen xızmet ettim. Biraq Izrail xalqı Seniń menen dúzgen kelisimnen júz burıp, qurbanlıq orınlarıńdı buzıp tasladı hám payǵambarlarıńdı qılıshtan ótkizdi. Jalǵız men qaldım, olar óltiriw ushın meni de izlep atır, – dep juwap berdi.

11 Jaratqan Iye Iliyasqa:

– Tawǵa shıǵıp, kóz aldımda tur. Men seniń janıńnan ótemen, – dedi.

Jaratqan Iyeniń aldında tawlardı jarıp, jartaslardı maydalaǵan qattı hám kúshli samal esti. Biraq Jaratqan Iye samal ishinde emes edi. Samaldan keyin jer silkindi, biraq Jaratqan Iye jer silkiniw ishinde de emes edi. 12 Jer silkiniwden keyin, ot tústi, biraq Jaratqan Iye ottıń da ishinde emes edi. Ottan keyin ólpeń dawıs esitildi. 13 Iliyas bul dawıstı esitkende, betin shapanı menen jawıp aldı da, sırtqa shıǵıp, úńgirdiń awzında turdı. Sol waqıtta bir dawıs:

– Iliyas, bul jerde ne qılıp atırsań? – dep soradı.

14 Iliyas Oǵan:

15 Sonda Jaratqan Iye Iliyasqa:

– Kelgen jolıń menen izińe qaytıp, shól arqalı Damaskke bar. Ol jerge barǵanıńda, Xazaeldi maylap, Aramǵa patsha etip qoy, 16 Nimshiy ulı Ehudı maylap, Izrailǵa patsha etip, al abel-mexolalı Shafat ulı Elishanı maylap, ózińniń ornıńa payǵambar etip qoy. 17 Xazaeldiń qılıshınan qashıp qutılǵandı Ehu, Ehudıń qılıshınan qashıp qutılǵandı Elisha óltiredi. 18 Degen menen, Izrailda Baalǵa tájim etip, onı súymegen jeti mıń adamdı tiri qaldıraman.

Elishanıń shaqırılıwı

19 Solay etip, Iliyas sol jerden ketip, Shafat ulı Elishanı tawıp aldı. Ol on eki jup ógiz benen jer aydap atırǵanlardıń on ekinshisi bolıp jer aydap atır eken. Iliyas Elishanıń janına jaqınlap, shapanın onıń ústine atıp jiberdi. 20 Elisha ógizlerdi qaldırıp, Iliyastıń izinen juwırdı hám oǵan:

– Ata-anamdı súyip, xoshlasıp qaytıwıma ruxsat berseńiz, sońınan izińizden jetip alaman, – dedi.

– Iliyas Elishaǵa:

– Yaqshı, kete ber, biraq saǵan ne qılǵanımdı umıtpa, – dedi.

21 Solay etip, Elisha izine qaytıp barıp, bir jup ógizin soydı. Olardıń moyıntırıqların otın etip jaǵıp, góshin pisirdi hám adamlarǵa tarqattı. Adamlar da jedi. Keyin Elisha Iliyastıń izinen ketti hám oǵan xızmet ete basladı.