‏ 1 Kings 2

Dawıttıń Sulaymanǵa bergen wásiyatları

1Dawıttıń ólimi jaqınlasqanda, ol ulı Sulaymanǵa mına wásiyatlardı berdi:

2– Basqalar sıyaqlı men de jaqın arada bul dúnyanı tárk etemen. Sen kúshli hám márt bol. 3Islegen hár bir isińde hám barǵan hár bir jerińde tabısqa erisiwiń ushın, Qudayıń Jaratqan Iyeniń tapsırmaların orınlap, Onıń jollarınan júr hám Muwsanıń Nızamında jazılǵanınday, Qudaydıń qaǵıydalarına, buyrıqlarına, nızamlarına hám qararlarına boysın. 4Sonda Jaratqan Iye maǵan bergen mına sózin orınlaydı: «Eger urpaqlarıń óz jollarınan adaspay, shın júrekten hám jan-táni menen Maǵan sadıq bolıp júrse, seniń urpaǵıńnan Izrail taxtında otıratuǵın er adamnıń izi úzilmeydi».

5Bunnan tısqarı sen Seruya ulı Ioabtıń maǵan neler islegenin bileseń. Ol Izraildıń eki sárkárdası Ner ulı Abner menen Eter ulı Amasanı óltirip, tınıshlıq waqtında urıstaǵıday qan tókti hám belindegi belbewi menen ayaǵındaǵı sandalların qanǵa bılǵadı. 6Sen aqıl menen is tut. Biraq onıń ǵarrı basınıń óliler mákanına tınıshlıq penen kiriwine jol qoyma.

7Giladlı Barzillaydıń ullarına jaqsılıq isle. Olarǵa dasturxanıńnan awqatlanatuǵınlar arasınan orın ber. Óytkeni men ájaǵań Abshalomnan qashıp júrgenimde, olar maǵan járdem berdi.

8Benyamin urıwınan bolǵan baxurimli Geranıń ulı Shimey de seniń janıńda. Ol Maxanayımǵa qaray qashıp baratırǵanımda, meni qattı ǵarǵaǵan edi. Biraq sońınan ol meni kútip alıw ushın Iordan dáryasınıń boyına keldi. Sonda men oǵan: «Seni qılısh penen óltirmeymen», – dep Jaratqan Iye haqı ant ishken edim. 9Degen menen, sen onı jazasız qaldırma. Sen aqıllı adamsań, oǵan ne islewdi óziń bileseń. Onıń ǵarrı basın óliler mákanına qanı menen jiber.

Dawıttıń ólimi

10Dawıt ólip, ata-babalarına qosılǵanda, ol óziniń atı menen atalǵan qalaǵa jerlendi. 11Dawıt Izrailda qırıq jıl patshalıq etip, onıń jeti jılın Xebronda, otız úsh jılın Erusalimde ótkizdi. 12Solay etip, Sulayman ákesi Dawıttıń taxtına otırdı hám onıń patshalıǵı júdá bekkem boldı.

Adoniyanıń ólimi

13Xaggit ulı Adoniya Sulaymannıń anası Bat-Shebanıń janına bardı. Bat-Sheba onnan:

– Amanlıq pa? – dep soradı.

Adoniya oǵan:

– Amanlıq, – dep juwap berdi.

14Sońınan ol:

– Sizge bir nárse aytpaqshı edim, – dedi.

Bat-Sheba oǵan:

– Ayta ber, – dedi.

15Adoniya Bat-Shebaǵa bılay dedi:

– Ózińiz bilesiz, patshalıq maǵan tiyisli edi hám pútkil Izrail meniń patsha bolıwımdı kútip júrgen edi. Biraq jaǵday ózgerip, patshalıq inimniń qolına ótti. Sebebi Jaratqan Iyeniń erki usı edi. 16Biraq meniń sizden bir tilegim bar. Ótinemen, qarsılıq bildirmeń.

Bat-Sheba:

– Ayt, – dedi.

17Sonda Adoniya Bat-Shebaǵa:

– Ótinemen, patsha Sulayman menen sóylesiń. Ol sizge qarsılıq bildirmeydi. Maǵan shunemli Abishagtı hayallıqqa bersin, – dedi.

18Bat-Sheba oǵan:

– Yaqshı, sen tuwralı patsha menen sóylesip kóreyin, – dep juwap berdi.

19Bat-Sheba Adoniyanıń ótinishi tuwralı sóylesiw ushın patsha Sulaymanǵa ketti. Sulayman anasın kútip alıw ushın ornınan turıp, anasına tájim etti hám sońınan taxtına otırdı. Patsha óziniń oń tárepine bir taxt qoydırıp, oǵan anasın otırǵızdı. 20Anası taxtqa otırǵannan soń, patshaǵa:

– Sennen kishkene bir ótinishim bar edi, sózimdi jerde qaldırma, – dedi.

Patsha oǵan:

– Ayta beriń, anajan, sózińizdi jerde qaldırmayman, – dedi.

21Bat-Sheba patshaǵa:

– Shunemli Abishagtı ájaǵań Adoniyaǵa hayallıqqa berseń qáytedi? – dedi.

22Patsha Sulayman anasına:

– Ne ushın Adoniyaǵa tek shunemli Abishagtı sorap tursız? Ol ushın patshalıqtı da sorasańız bolar edi. Aqırı ol mennen úlken. Bunıń ústine, ruwxaniy Abiyatar menen Seruya ulı Ioab ta ol tárepte emes pe? – dedi.

23Sońınan patsha Sulayman Jaratqan Iyeniń atı menen ant iship bılay dedi:

– Eger Adoniyanı bul gápi ushın óltirtpesem, Quday meni jazalaǵan ústine jazalasın! 24Meni kúshke toltırıp, ákem Dawıttıń taxtına otırǵızǵan hám Izrail patshalarınıń meniń urpaǵımnan kelip shıǵatuǵının aytıp, wáde etken tiri Jaratqan Iye haqı ant ishemen: Adoniya búgin-aq óltiriledi.

25Solay etip, patsha Sulayman Ehoyada ulı Benayaǵa Adoniyanı óltiriwdi buyırdı. Ol barıp, Adoniyanı óltirdi.

Abiyatardıń súrgin etiliwi hám Ioabtıń ólimi

26Patsha ruwxaniy Abiyatarǵa:

– Sen Anatottaǵı óz jerińe bar. Negizinde, sen ólimge ılayıqlısań. Biraq házir seni óltirmeymen. Sebebi sen ákem Dawıttıń aldında Quday Iyeniń sandıǵın kóterip júrdiń hám ákem shekken hár bir azaptı onıń menen birge bastan keshirdiń, – dedi. 27Sulayman Abiyatardı Jaratqan Iyeniń ruwxaniyliginen shetletti. Solay etip, Jaratqan Iyeniń Shiloda Eliydiń úy-ishine qarsı aytqan sózi orınlandı ▼

▼ 1Pat 2:27-36.

.

28Bul xabar Ioabqa da jetti. Ioab Abshalomǵa qosılmaǵan bolsa da, Adoniyanı qollap quwatlaǵan edi. Sonlıqtan Ioab Jaratqan Iyeniń shatırına qashıp barıp, qurbanlıq orınnıń shaqlarına jabıstı. 29Ioabtıń Jaratqan Iyeniń shatırına qashıp barıp, qurbanlıq orınnıń janında turǵanı patsha Sulaymanǵa xabarlandı. Sulayman Ehoyada ulı Benayaǵa barıp, onı óltiriwdi buyırdı.

30Benaya Jaratqan Iyeniń shatırına barıp, Ioabqa:

– Patsha sırtqa shıǵıwıńdı buyıradı, – dedi.

Biraq Ioab:

– Yaq, men usı jerde ólmekshimen, – dep juwap berdi.

Sonda Benaya barıp, Ioabtıń bergen juwabın patshaǵa jetkizdi.

31Patsha Benayaǵa bılay dedi:

– Onıń aytqanınday isle. Onı óltirip, jerle. Usılayınsha, Ioabtıń jazıqsız tókken qanlarınıń qunın meniń hám ákemniń urpaqlarınıń moynınan alıp tasla. 32Jaratqan Iye onıń tókken qanı ushın ózin jazalasın. Sebebi ol ákem Dawıtqa bildirmesten, ózinen ádilirek hám ózinen jaqsıraq bolǵan eki adamdı: Izraildıń sárkárdası Ner ulı Abnerdi hám Yahudanıń sárkárdası Eter ulı Amasanı qılısh penen óltirdi. 33Solay etip, olardıń qanı máńgige Ioabtıń hám onıń urpaqlarınıń moynında qaladı. Al Jaratqan Iye Dawıtqa, onıń urpaqlarına, úy-ishine hám taxtına máńgige tınıshlıq beredi.

34Ehoyada ulı Benaya barıp, Ioabtı óltirdi hám ol shóldegi óz úyine jaqın jerge jerlendi. 35Patsha Ioabtıń ornına Ehoyada ulı Benayanı sárkárda etip, al Abiyatardıń ornına Sadoqtı ruwxaniy etip tayınladı.

Shimeydiń ólimi

36Bunnan keyin patsha adam jiberip, Shimeydi shaqırttı hám oǵan bılay dedi:

– Erusalimde bir úy qurıp alıp, sol jerde jasa. Hesh jaqqa ketpe. 37Ol jerden shıǵıp, Kidron sayınan ótken kúniń-aq sózsiz óltiriletuǵınıńdı bilip qoy. Óz qanıń ushın óziń juwapker bolasań.

38Shimey patshaǵa:

– Taqsır, qullıq. Siz ne deseńiz, qulıńız bolǵan men sonı orınlayman, – dedi.

Solay etip, Shimey uzaq waqıt Erusalimde jasadı.

39Biraq aradan úsh jıl ótkennen soń, Shimeydiń eki qulı Gat patshası Maaxa ulı Axishtiń janına qashıp ketti. Shimeyge qullarınıń Gatta ekenligi tuwralı xabar keldi. 40Sonda Shimey eshegin ertlep, qulların izlew ushın Gatqa, Axishtiń janına ketti. Ol qulların qaytarıp ákeldi.

41Shimeydiń Erusalimnen shıǵıp, Gatqa barıp qaytqanı tuwralı Sulaymanǵa xabar jetti. 42Sonda Sulayman Shimeydi shaqırtıp, oǵan bılay dedi:

– Saǵan Jaratqan Iye haqı ant ishtirgen joq pa edim? «Bilip qoy, qaladan shıǵıp, qanday da bir jerge barǵan kúniń-aq sózsiz óltirileseń», – dep eskertpegen be edim? Sen de maǵan: «Qullıq, ırazıman», – demegen be ediń? 43Onda nege Jaratqan Iyeniń aldında ishken antıńa hám meniń buyrıǵıma boysınbadıń?

44Patsha sózin dawam etip, Shimeyge jáne bılay dedi:

– Sen ákem Dawıtqa islegen barlıq jamanlıqlarıńdı jaqsı bileseń. Bul islegen jamanlıqlarıńdı Jaratqan Iye ózińe qaytaradı. 45Biraq Jaratqan Iye meni jarılqasın hám Dawıttıń taxtı Jaratqan Iyeniń aldında máńgige bekkem bolsın.

46Patsha Ehoyada ulı Benayaǵa buyrıq berdi. Ol Shimeydi alıp shıǵıp, óltirdi.

Solay etip, Sulaymannıń patshalıǵı bekkemlendi.