‏ 1 Kings 20

Aramlılardıń Samariyaǵa hújim etiwi

1Aram patshası Ben-Hadad pútkil áskerlerin jıynadı. Ben-Hadadqa qaraslı otız eki patsha da atları hám sawash arbaları menen oǵan qosıldı. Olar bardı da, Samariyanı qorshap alıp, qalaǵa hújim etti. 2Ben-Hadad qalaǵa, Izrail patshası Axabqa xabarshılar jiberip, bılay dedi: «Ben-Hadad bılay deydi: 3„Seniń gúmis hám altınıń, hayallarıń hám ullarıńnıń eń jaqsıları meniki boladı“».

4Izrail patshası oǵan: «Taqsır, siziń aytqanıńızday bolsın. Ózim de, mendegi hámme nárse de siziki», – dep juwap berdi.

5Ben-Hadadtıń elshileri jáne qaytıp kelip, Axabqa bılay dedi: «Ben-Hadad bılay deydi: „Saǵan gúmis hám altınıńdı, hayallarıńdı hám ullarıńdı maǵan bereseń dep xabar jibergen edim. 6Endi erteń usı waqıtta seniń sarayıńdı hám xızmetshilerińniń úyin tintiw ushın adamlarımdı jiberemen. Olar saǵan qádirli bolǵan hámme nárseni alıp ketedi“».

7Sonda Izrail patshası eldegi barlıq aqsaqallardı jıynap, olarǵa:

– Oylap kórińler, bul adam qanday jamanlıq oylap qoyıptı? Ol mennen hayallarımdı, ullarımdı, gúmis hám altınımdı talap etkende, men qarsılıq bildirmedim, – dedi.

8Sonda aqsaqallar da, xalıq ta patshaǵa:

– Oǵan qulaq salmań, ırazı da bolmań, – dedi.

9Solay etip, Axab Ben-Hadadtıń elshilerine: «Taqsırǵa dáslepki tilegin orınlaytuǵınımdı, biraq keyingisine ırazı emesligimdi aytıp barıńlar», – dedi. Elshiler barıp, Ben-Hadadqa juwaptı jetkizdi.

10Sonda Ben-Hadad Axabqa xabarshıların jiberip: «Samariyada izime ergen áskerlerdiń uwısın toltırǵanday topıraq qaldırsam, qudaylar meni jazalaǵan ústine jazalasın», – dedi.

11Izrail patshası oǵan bılay dep juwap berdi: «Patshańızǵa barıp aytıń, sawıtın kiyip atırıp emes, al sheship atırıp maqtansın».

12Shatırda ózine qaraslı patshalar menen birge sharap iship otırǵan Ben-Hadad bunı esitkende, adamlarına: «Hújimge tayarlanıń», – dep buyırdı. Olar qalaǵa hújim qılıwǵa tayar turdı.

Axabtıń Ben-Hadad ústinen jeńiske erisiwi

13Sol waqıtta bir payǵambar Izrail patshası Axabqa kelip bılay dedi:

– Jaratqan Iye bılay deydi: «Mına úlken áskerler toparın kórip tursań ba? Búgin onı saǵan táslim etemen! Sonda sen Meniń Jaratqan Iye ekenimdi bilip alasań!»

14Axab payǵambardan:

– Kim arqalı? – dep soradı.

Payǵambar oǵan:

– Jaratqan Iye bılay deydi: «Wálayat hákimleriniń jas jawıngerleri arqalı», – dep juwap berdi.

Axab onnan:

– Sawashtı kim baslaydı? – dep soradı.

Payǵambar Axabqa:

– Siz baslaysız, – dep juwap berdi. 15Axab wálayat hákimleriniń jas jawıngerlerin shaqırıp sanadı. Olar eki júz otız edi. Sońınan pútkil xalıqtı, Izrail áskerlerin sanadı. Olar jeti mıń adam edi. 16Túste, Ben-Hadad ózine járdem berip atırǵan otız eki patsha menen birge shatırda waqtı xoshlıq etip atırǵan waqıtta, izraillılar hújimdi basladı. 17Dáslep wálayat hákimleriniń jas jawıngerleri sawashqa shıqtı. Ben-Hadad jibergen tıńshılar oǵan:

– Samariyadan adamlar shıǵıp kiyatır, – dep xabarladı.

18Ben-Hadad:

– Olar kelisim dúziw ushın kiyatırǵan bolsa da, urısıw ushın kiyatırǵan bolsa da, tiriley uslap alıńlar, – dedi.

19Dáslep wálayat hákimleriniń jas jawıngerleri, olardıń izinen basqa áskerler qaladan shıqtı. 20Olardıń hár biri óz qarsılasın óltirdi, aramlılar qasha basladı hám izraillılar olardıń izinen quwıp ketti. Aram patshası Ben-Hadad ta atına minip, atlıları menen birge qashıp qutıldı. 21Izrail patshası qaladan shıǵıp, atlar menen sawash arbalarına hújim jasadı hám aramlılardı úlken qırǵınǵa ushırattı.

22Bunnan keyin, payǵambar kelip, Izrail patshasına:

– Barıp, kúshińizdi jıynań hám ne isleytuǵınıńızdı bilip alıń. Sebebi kelesi jılı báhárde Aram patshası sizge jáne hújim qıladı, – dedi.

Aramlılardıń ekinshi hújimi

23Aram patshasınıń xızmetkerleri oǵan bılay dedi:

– Izraildıń qudayı – tawlar Qudayı. Sonlıqtan olar bizlerdi jeńdi. Eger olar menen tegislikte urıssaq, bizler olardı sózsiz jeńemiz. 24Endi qol astıńızdaǵı patshalardıń hámmesin orınlarınan alıp taslap, orınlarına sárkárdalardı tayınlań. 25Qoldan ketken at ornına at, arba ornına arba toplap, burınǵıday ásker jıynań. Keyin izraillılar menen tegislikte sawash júrgizemiz hám sózsiz olardı jeńemiz.

Ben-Hadad olarǵa qulaq salıp, solay isledi.

26Kelesi jılı báhárde Ben-Hadad aramlılardı jıynap, Izrail menen urısıw ushın Afek qalasına ketti. 27Izraillılar da jıynalıp, azıq-awqatın aldı da, olar menen urısıw ushın jolǵa shıqtı hám olardıń qarsısına orda qurdı. Úlkeni toltırǵan aramlılardıń aldında izraillılar kishkene eki eshki súriwi sıyaqlı edi.

28Qudaydıń adamı Izrail patshasınıń janına kelip bılay dedi:

– Jaratqan Iye bılay deydi: «Aramlılar Jaratqan Iye tegisliklerdiń emes, al tawlardıń Qudayı degeni ushın, usı úlken áskerler toparın saǵan táslim etemen. Sonda Meniń Jaratqan Iye ekenimdi bilip alasızlar».

29Bir-birine qarsı orda qurǵan aramlılar menen izraillılar jeti kún turdı. Jetinshi kúni sawash baslandı. Bir kúnde izraillılar aramlılardıń júz mıń piyada áskerin óltirdi. 30Qalǵanları Afekke, qalanıń ishine qashtı. Ol jerde qalǵan jigirma jeti mıń adamnıń ústine qalanıń diywalı quladı.

Ben-Hadad ta qalanıń ishine qashıp barıp, ishki bir bólmege kirip aldı. 31Sonda xızmetshileri Ben-Hadadqa:

– Esitiwimizshe, Izrail patshaları rehimli patshalar qusaydı. Endi ústimizge aza kiyimin kiyip, moynımızǵa arqan salıp, Izrail patshasınıń aldına barayıq. Bálkim, ol bir qasıq qanıńızdan kesher, – dedi.

32Olar ústine aza kiyimin kiyip, moyınlarına arqan saldı hám Izrail patshasınıń aldına kelip:

– Qulıńız Ben-Hadad bir qasıq qanınan keshiwińizdi sorap jalbarınadı, – dedi.

Axab:

– Ben-Hadad ele tiri me? Ol meniń ájaǵam-ǵo, – dedi.

33Ben-Hadadtıń xızmetshileri bunı jaqsılıqqa jorıp, patshanıń awzındaǵı sózdi qaǵıp aldı da:

– Ben-Hadad siziń ájaǵańız! – dedi.

Patsha:

– Barıp, onı alıp kelińler, – dep buyırdı.

Ben-Hadad kelgende, patsha onı óz sawash arbasına mingizdi. 34Ben-Hadad Axabqa:

– Ákemniń siziń ákeńizden tartıp alǵan qalaların qaytıp beremen. Ákemniń Samariyada bazarlar qurǵanı sıyaqlı, siz de Damaskte bazarlar qurasız, – dedi.

Axab oǵan:

– Kelisim dúzgennen soń, seni bosatıp jiberemen, – dedi. Sońınan onıń menen kelisim dúzdi de, bosatıp jiberdi.

Bir payǵambardıń Axabqa qarsı sóylewi

35Sol arada payǵambarlar toparındaǵılardan biri Jaratqan Iyeniń sózi boyınsha joldasına:

– Ótinemen, meni ur, – dedi.

Biraq ol joldasın urıwdı qálemedi.

36Sonda payǵambar joldasına:

– Jaratqan Iyeniń buyrıǵın orınlamaǵanıń ushın, janımnan ketiwden-aq, seni bir arıslan óltiredi, – dedi. Sol adam payǵambardıń qasınan ketiwden-aq, bir arıslanǵa dus kelip, arıslan onı óltirdi.

37Sońınan payǵambar basqa bir adamǵa kelip:

– Ótinemen, meni ur, – dedi. Sol adam onı urıp, jaradar etti. 38Payǵambar ketti hám ózin tanıtpaw ushın kózin japqısh penen jawıp, jol boyında patshanı kúte basladı. 39Patsha sol jerden ótip baratırǵanda, payǵambar baqırıp, oǵan bılay dedi:

– Qulıńız bolǵan men urısqa barǵan edim. Sonda bir ásker arman bardı da, bir tutqındı maǵan ákelip: «Mına adamǵa qarap tur. Eger qashıp ketse, onıń ornına ózińniń janıń alınadı yamasa bir talant gúmis bereseń», – dedi. 40Biraq men anaw-mınaw menen bánt bolǵanımda, ol qashıp ketipti.

Izrail patshası oǵan:

– Ózińe óziń húkim shıǵarıp tursań-ǵo. Seniń jazań sol boladı, – dedi.

41Sol waqıtta payǵambar dárriw betindegi japqıshtı alıp tasladı. Sonda patsha onıń payǵambarlardan biri ekenin bildi. 42Payǵambar patshaǵa bılay dedi:

– Jaratqan Iye bılay deydi: «Men joq qılıwdı buyırǵan adamdı óz qolıńnan bosatıp jibergeniń ushın, onıń ornına ózińniń janıń alınadı. Al onıń xalqınıń basına túsetuǵın apat seniń xalqıńnıń basına túsedi».

43Izrail patshası qapa bolıp, tınıshsızlanǵan halda Samariyadaǵı sarayına keldi.