‏ 1 Kings 21

Nabottıń baǵı

1Aradan biraz waqıt ótip, mınaday waqıya júz berdi: Izreelde, Samariya patshası Axabtıń sarayınıń janında izreelli Nabottıń bir júzim baǵı bar edi. 2Bir kúni Axab Nabotqa:

– Júzim baǵıńdı maǵan ber. Ol meniń sarayıma jaqın bolǵanı ushın, onıń ornına palız eginlerin ósireyin. Baǵıńnıń ornına basqa jaqsıraq baǵ beremen. Eger qáleseń, baǵıńnıń bahasın gúmis penen tóleymen, – dedi.

3Biraq Nabot Axabqa:

– Ata-babalarımnan qalǵan miyrastı sizge beriwden meni Jaratqan Iyeniń Ózi saqlasın! – dedi.

4Izreelli Nabottıń: «Ata-babalarımnan qalǵan miyrastı sizge bermeymen», – degen sózine qattı ashıwlanǵan Axab úyine tunjırayıp keldi. Ol tósegine kirip, júzin teris qaratıp jatıp aldı hám duz tatpadı. 5Hayalı Izabel onıń janına kelip:

– Nege ruwxıńız túsken? Nege awqat jemey atırsız? – dedi. 6Axab hayalına:

– Men izreelli Nabotqa: «Júzim baǵıńdı maǵan gúmiske sat, eger qáleseń, onıń ornına saǵan basqa bir baǵ bereyin», – degenimde, ol maǵan: «Júzim baǵımdı saǵan bermeymen», – dep juwap berdi, – dedi.

7Hayalı Izabel Axabqa:

– Siz Izraildıń patshasına say is tutıp atırsız ba? Ornıńızdan turıp, nan jep alıń da, tınıshlanıń. Izreelli Nabottıń baǵın sizge ózim alıp beremen, – dedi.

8Izabel Axabtıń atınan xat jazıp, onı Axabtıń móri menen tastıyıqladı. Soń bul xattı Nabot jasaytuǵın qalanıń aqsaqalları menen aqsúyeklerine jiberdi. 9Xatta bılay dep jazılǵan edi:

«Oraza tutıwdı járiyalap, Nabottı xalıq arasındaǵı sıylı orınǵa otırǵızıńlar. 10Onıń aldına: „Háy Nabot, sen Qudayǵa hám patshaǵa til tiygizdiń“, – dep gúwalıq beretuǵın eki jalaxor adamdı otırǵızıńlar. Sońınan onı sırtqa alıp shıǵıp, tas boran qılıp óltirińler».

11Nabot jasaytuǵın qalanıń aqsaqalları menen aqsúyekleri Izabeldiń xat arqalı ózlerine jazǵan buyrıǵın orınladı. 12Olar oraza járiya etip, Nabottı xalıq arasındaǵı sıylı orınǵa otırǵızdı. 13Sońınan eki jaramas adam kelip, Nabottıń qarsı aldına otırdı hám xalıqtıń aldında: «Nabot Qudayǵa hám patshaǵa til tiygizdi», – dep gúwalıq berdi. Sonda Nabottı qalanıń sırtına alıp shıǵıp, tas boran qılıp óltirdi. 14Keyin Izabelge: «Nabot tas boran qılıp óltirildi», – dep xabar jiberdi. 15Izabel Nabottıń tas boran qılıp óltirilgenin esitiwden, dárriw Axabqa:

– Barıp, sizge gúmiske satqısı kelmegen izreelli Nabottıń júzim baǵına iyelik etiń. Sebebi ol endi joq, óldi, – dedi. 16Axab izreelli Nabottıń óltirilgenin esite sala, onıń baǵın múlik etip alıw ushın sol jerge ketti.

17Sol waqıtta Jaratqan Iyeden tishbeli Iliyas payǵambarǵa mınaday sóz tústi:

18– Samariyadaǵı Izrail patshası Axabtı kóriwge bar. Házir ol Nabottıń júzim baǵında, onı iyelep alıw ushın sol jerge keldi. 19Oǵan mına sózlerdi jetkiz: «Jaratqan Iye bılay deydi: Sen onı óltirip, múlkin de iyelep aldıń ba?» Jáne bılay dep ayt: «Jaratqan Iye bılay deydi: Iytler Nabottıń qanın jalaǵan jerde, seniń qanıńdı da jalaydı».

20Axab Iliyasqa:

– Háy, dushpanım, meni tawıp keldiń be? – dedi.

Iliyas oǵan bılay dedi:

– Awa, tawıp keldim. Óytkeni siz Jaratqan Iyeniń názerinde jawız bolǵan islerdi islewge berilip ketkensiz. 21Sol sebepli Jaratqan Iye bılay deydi: «Seni apatqa ushıratıp, kúlińdi kókke suwıraman. Izrailda Axabtıń násilinen bolǵan pútkil erkek zatın: ol qul bolsın, azat bolsın, hámmesin qırıp taslayman. 22Izraildı gúnaǵa baslap, Meniń ǵázebimdi keltirgeniń ushın, seniń úy-ishińdi Nabat ulı Yarobam hám Axiya ulı Baashanıń úy-ishi sıyaqlı qılaman». 23Jáne de, Jaratqan Iye Izabel haqqında bılay deydi: «Izabel Izreel qalasınıń diywalları ishinde iytlerge jem boladı. 24Axabtıń násilinen qalada ólgenleri iytlerge, dalada ólgenleri kóktegi quslarǵa jem boladı».

25Axabtay bolıp, Jaratqan Iyeniń názerinde jawız bolǵan islerdi islewge bunshelli berilgen adam bolmadı. Hayalı Izabel onı iytermelep turatuǵın edi. 26Axab Jaratqan Iye Izrail xalqı aldınan quwıp jibergen amorlarǵa uqsap, butlarǵa tabınıp, júdá jerkenishli islerdi isledi.

27Axab bul sózlerdi esitkende, kiyimlerin jırtıp, aza kiyimlerin kiydi. Oraza tuttı, aza kiyimi menen uyıqladı hám qayǵırıp júrdi.

28Sonda Jaratqan Iyeden tishbeli Iliyas payǵambarǵa mınaday sóz tústi:

29– Axabtıń Meniń aldımda qanday boysınıwshań bolıp qalǵanın kórdiń be? Ol Maǵan boysınǵanı ushın, Ózim aytqan bálelerdi onıń waqtında emes, al ulınıń waqtında onıń úy-ishiniń basına jawdıraman.