‏ 1 Kings 22

Payǵambar Mixanıń Axabtı eskertiwi

1Úsh jıl dawamında Aram hám Izrail arasında urıs bolmadı. 2Úshinshi jılı Yahuda patshası Ehoshafat Izrail patshasın kóriwge bardı. 3Izrail patshası Axab xızmetshilerine:

– Giladtaǵı Ramottıń bizlerge tiyisli ekenin bilmeysizler me? Bizler bolsaq, onı Aram patshasınan qaytarıp alıw ushın hesh nárse qılmadıq, – dedi. 4Sońınan Ehoshafattan:

– Giladtaǵı Ramotqa qarsı urısıw ushın meniń menen birge barasız ba? – dep soradı.

Ehoshafat Izrail patshasına:

– Meni ózińizdey, xalqımdı xalqıńızday, atlarımdı atlarıńızday kóriń, – dep juwap berdi. 5Sońınan Ehoshafat:

– Dáslep Jaratqan Iyeniń ne deytuǵının bilip alayıq, – dedi. 6Sonda Izrail patshası tórt júzge jaqın payǵambardı toplap, olarǵa:

– Giladtaǵı Ramotqa qarsı urısıw ushın barayın ba yamasa barmayın ba? – dep soradı.

Olar:

– Barıń, Iyemiz qalanı sizge táslim etedi, – dep juwap berdi.

7Biraq Ehoshafat:

– Bul jerde bulardan basqa Jaratqan Iyeniń payǵambarı bar ma? Onnan da sorayıq, – dedi.

8Izrail patshası Ehoshafatqa:

– Jaratqan Iyeniń erkin soraǵanday, jáne bir payǵambar bar. Ol Imla ulı Mixa. Biraq men onı jaman kóremen. Sebebi ol men tuwralı hesh jaqsı payǵambarshılıq aytpaydı, tek jaman payǵambarshılıq aytadı, – dep juwap berdi.

Ehoshafat patshaǵa:

– Patsha, bulay demeńiz, – dedi.

9Sonda Izrail patshası bir xızmetkerdi shaqırıp, oǵan:

– Imla ulı Mixanı tez alıp kel, – dep buyırdı.

10Izrail patshası Axab hám Yahuda patshası Ehoshafat patshalıq kiyimlerin kiyip, Samariyanıń dárwazasınıń kirer awzındaǵı maydanda, hár biri óz taxtında otırǵan edi. Barlıq payǵambarlar olardıń aldında payǵambarshılıq etip atırǵan edi. 11Kenaana ulı Sedekiya ózine temirden shaqlar islep:

– Jaratqan Iye bılay deydi: «Aramlılardı qırıp tawıspaǵansha, usı shaqlar menen súze beresiz», – dedi.

12Basqa payǵambarlardıń hámmesi de:

– Giladtaǵı Ramotqa hújim etiń, jeńiske erisesiz. Sebebi Jaratqan Iye olardı sizge táslim etedi, – dep, anıq sol sózdi qaytaladı.

13Mixanı shaqırıw ushın ketken xızmetker oǵan barıp:

– Mine, payǵambarlardıń hámmesi bir awızdan patshaǵa jaqsı boljawlardı aytıp atır. Siziń sózińiz de olardiki menen birdey bolsın, siz de jaqsı boljaw aytıń, – dedi.

14Biraq Mixa oǵan:

– Tiri Jaratqan Iye haqı ant ishemen: Jaratqan Iye maǵan ne dese, sonı aytaman, – dep juwap berdi.

15Mixa patshaǵa keldi. Patsha Mixadan:

– Mixa, bizler Giladtaǵı Ramotqa qarsı urısıw ushın barayıq pa yamasa barmayıq pa? – dep soradı.

Mixa patshaǵa:

– Bara berińler, jeńesizler. Sebebi Jaratqan Iye onı sizge táslim etedi, – dep juwap berdi.

16Degen menen, patsha Mixaǵa:

– Jaratqan Iyeniń atı menen tek haqıyqattı aytıwıń ushın, saǵan neshe márte ant ishkiziwim kerek? – dedi.

17Sonda Mixa patshaǵa bılay dedi:

– Maǵan pútkil izraillılar tawlar ústinde jayılıp júrgen shopansız qoylar sıyaqlı kórinip tur. Sonda Jaratqan Iye maǵan: «Bulardıń xojayını joq. Hár biri aman-esen úyine qaytsın», – dedi.

18Izrail patshası Ehoshafatqa:

– Bunıń men tuwralı jaqsı emes, al tek jaman payǵambarshılıq aytatuǵının sizge aytqan joq pa edim? – dedi.

19Mixa patshaǵa bılay dedi:

– Onda Jaratqan Iyeniń sózin tıńlań. Men Jaratqan Iyeniń Óz taxtında otırǵanın, pútkil aspan barlıqlarınıń Onıń oń hám shep tárepinde turǵanın kórdim. 20Sonda Jaratqan Iye: «Giladtaǵı Ramotqa barıp, sol jerde óliwi ushın, Axabtı kim kóndire aladı?» – dep soradı. Birewi anaw, birewi mınaw dep turǵanda, 21bir ruwx aldıǵa shıqtı da, Jaratqan Iyeniń aldında turıp: «Men kóndire alaman», – dedi. Jaratqan Iye onnan: «Qalay?» – dep soradı. 22Sol ruwx: «Men jalǵan ruwxqa aylanıp, Axabtıń barlıq payǵambarlarına jalǵan sóyletemen», – dep juwap berdi. Jaratqan Iye oǵan: «Sen onı kóndirip, bunı isleyseń. Barıp, solay isle», – dedi. 23Mine, házir Jaratqan Iye siziń sol payǵambarlarıńızdıń hámmesiniń awzına jalǵan ruwxtı salıp qoyǵan. Óytkeni Jaratqan Iye sizge jamanlıq islewge qarar etti.

24Kenaana ulı Sedekiya Mixaǵa jaqınlap, onıń betine shapalaq penen urıp jiberdi de:

– Jaratqan Iyeniń Ruwxı seniń menen sóylesiw ushın, mennen shıǵıp ketken be eken? – dedi.

25Mixa oǵan:

– Bunı sen jasırınıw ushın ishki bólmege tıǵılǵan waqtıńda kóreseń, – dedi.

26Sonda Izrail patshası bılay dedi:

– Mixanı qala hákimi Amon menen patshanıń ulı Ioashqa qaytıp alıp barıń. 27Olarǵa meniń mına sózimdi jetkiziń: «Men aman-esen qaytıp kelgenimshe, bul adamdı qamaqxanaǵa qamap qoyıp, nan menen suwdan basqa hesh nárse bermesin».

28Mixa patshaǵa:

– Eger aman-esen qaytıp kelseńiz, onda Jaratqan Iye meniń awzım arqalı sóylemegen boladı, – dedi, sońınan xalıqqa:

– Hámmeńiz bunı esitip qoyıńlar, – dedi.

Axabtıń ólimi

29Izrail patshası Axab hám Yahuda patshası Ehoshafat Giladtaǵı Ramotqa hújim jasaw ushın jolǵa shıqtı. 30Izrail patshası Ehoshafatqa:

– Men patshalıq kiyimlerin kiymey, urısqa shıǵaman, al siz patshalıq kiyimlerińizdi kiyip shıǵıń, – dedi. Solay etip, Izrail patshası kiyimlerin ózgertip, sawashqa shıqtı.

31Aram patshası óz sawash arbalarınıń otız eki áskerbasısına:

– Kishkenesi menen de, úlkeni menen de urısıp otırmay, tek Izrail patshası menen urısqa kirisiń, – dep buyırdı.

32Sawash arbalarınıń áskerbasıları Ehoshafattı kórgende: «Izrail patshası usı bolsa kerek», – dep oylap, oǵan qaray bas saldı. Ehoshafat baqırıp jibergende, 33sawash arbalarınıń áskerbasıları onıń Izrail patshası emesligin ańǵarıp, izge qayttı. 34Biraq bir adam tosattan oq jayın atıp jiberip, Izrail patshasın jaradar etti. Oq sawıttıń qosılǵan jerinen kirgen edi. Patsha arbakeshine:

– Izge aylanıp, meni sawash maydanınan alıp shıq, men jaraqatlandım, – dedi.

35Sol kúni ǵıjlaǵan sawash boldı. Patsha óziniń sawash arbası menen tıǵılısta qalıp, aramlılarǵa qarap turdı hám keshte jan tapsırdı. Onıń sawash arbası jaralanǵan jerinen aqqan qanǵa bılǵandı. 36Kún bata Izrail ordası ishinde: «Hár kim óz qalasına, óz jerine qaytsın!» – dep jar salındı. 37Patsha óldi. Onı Samariyaǵa ákelip, sol jerde jerledi. 38Arbanı Samariyadaǵı buzıqlar juwınatuǵın háwizge juwdı. Jaratqan Iyeniń aytqanınday, iytler onıń qanın jaladı.

39Axabtıń basqa isleri, ol islegen barlıq isler, onıń pil súyeginen qaplaǵan sarayı hám ol qurdırǵan barlıq qalalar haqqında Izrail patshalarınıń jılnama kitabında jazılǵan. 40Axab ólip, ata-babalarına qosıldı. Onıń ornına balası Axaziya patsha boldı.

Yahuda patshası Ehoshafat

41Izrail patshası Axabtıń patshalıǵınıń tórtinshi jılında Asa ulı Ehoshafat Yahudaǵa patsha bolǵan edi. 42Ehoshafat otız bes jasında patsha bolıp, Erusalimde jigirma bes jıl patshalıq etti. Onıń anasınıń atı Azuba bolıp, ol Shilxiydiń qızı edi. 43Ehoshafat ákesi Asanıń jolınan júrip, sol joldan shıqpay, Jaratqan Iyeniń názerinde tuwrı bolǵan islerdi isledi. Biraq sıyınıw orınları joq qılınbadı hám xalıq ele sol orınlarda qurbanlıqlar berip, tútetkiler tútetetuǵın edi. 44Ehoshafat Izrail patshası menen tınıshlıq kelisimin dúzdi.

45Ehoshafattıń basqa isleri, ol islegen qaharmanlıqlar hám júrgizgen sawashları Yahuda patshalarınıń jılnama kitabında jazılǵan. 46Ehoshafat ákesi Asanıń waqtınan qalǵan sıyınıw orınlarındaǵı buzıqshılıq islewshi erkeklerdi jer betinen joq qıldı. 47Sol waqıtları Edomda patsha joq edi, eldi Yahuda patshası qoyǵan hákim basqaratuǵın edi. 48Ehoshafat Ofirden altın alıp keliw ushın, úlken sawda kemelerin soqtırdı. Biraq kemeler Esion-Geberden shıqpay atırıp-aq apatqa ushırap, Ofirge kete almadı. 49Sol waqıtta Axabtıń ulı Axaziya Ehoshafatqa: «Meniń adamlarım kemede siziń adamlarıńız benen birge barsın», – degen edi. Biraq Ehoshafat buǵan kelisim bermegen edi.

50Ehoshafat ólip, ata-babalarına qosıldı hám babası Dawıttıń qalasına, ata-babalarınıń janına jerlendi. Onıń ornına ulı Ehoram patsha boldı.

Izrail patshası Axaziya

51Yahuda patshası Ehoshafattıń patshalıǵınıń on jetinshi jılında Axab ulı Axaziya Samariyada Izrailǵa patsha boldı. Ol eki jıl patshalıq etti. 52Axaziya Jaratqan Iyeniń názerinde jawız bolǵan islerdi isledi. Ol ata-anasınıń hám Izraildı gúnaǵa batırǵan Nabat ulı Yarobamnıń jolınan júrdi. 53Axaziya ákesi sıyaqlı Baalǵa xızmet etip, oǵan tabındı hám Izraildıń Qudayı Jaratqan Iyeniń ǵázebin keltirdi.