‏ 1 Kings 3

Sulaymannıń Qudaydan danalıq sorawı

1Sulayman Mısır patshası faraonnıń qızlarınıń birine úylenip, faraon menen baylanıs dúzdi. Ol hayalın Dawıttıń qalasına alıp keldi. Sulayman óz sarayın, Jaratqan Iyeniń Úyin hám Erusalimniń átirapındaǵı diywallardı tiklegenshe, hayalı sol jerde jasadı. 2Xalıq ele sıyınıw orınlarında qurbanlıqlar beretuǵın edi. Sebebi sol waqıtqa shekem Jaratqan Iyeniń atına arnap Úy qurılmaǵan edi. 3Sulayman ákesi Dawıttıń kórsetpeleri menen júrip, Jaratqan Iyeni súyetuǵın edi. Degen menen, ol da sıyınıw orınlarında qurbanlıqlar berip, tútetkiler tútetetuǵın edi.

4Patsha qurbanlıq beriw ushın Gibon qalasına ketti, sebebi sıyınıw ornınıń eń baslısı sol jerde edi. Sulayman sol qurbanlıq orında mıń bas maldı jandırılatuǵın qurbanlıqqa berdi. 5Gibonda bolǵanda, Sulayman túnde tús kórdi. Túsinde Jaratqan Iye oǵan kórinip:

– Tile tilegińdi, soraǵanıńdı beremen, – dedi.

6Sulayman Oǵan bılay dedi:

– Sen qulıń bolǵan ákem Dawıtqa úlken jaqsılıq islediń. Sebebi ol haq hám Saǵan sadıq bolıp, Seniń aldıńda shın júrekten tuwrı islerdi islep júrdi. Sen búgin oǵan taxtına otıratuǵın bir ul inam etip, oǵan úlken jaqsılıq islewdi dawam ettiń. 7O Qudayım Jaratqan Iye, Sen Óz qulıńdı ákem Dawıttıń ornına patsha etip qoydıń. Biraq men ele júdá jaspan, basqarıwǵa ele tájiriybem joq. 8Qulıń Óziń tańlaǵan xalıqtıń, kópliginen sanap shıǵıw múmkin bolmaǵan ullı xalıqtıń ortasında tur. 9Sonlıqtan jaman menen jaqsını ayırıp bilip, xalqıńa biylik etiwim ushın, maǵan aqılǵa tolı bir júrek ber. Bolmasa, Seniń bul ullı xalqıńdı kim basqara aladı?

10Sulaymannıń bul tilegine Iyemizdiń kewli toldı. 11Quday Sulaymanǵa bılay dedi:

– Sen óziń ushın uzaq ómir, baylıq hám dushpanlarıńnıń ólimin tilemediń, al durıs húkim júrgiziw ushın danalıq soradıń. 12Men seniń tilegińdi orınlayman. Saǵan danalıqqa hám aqılǵa tolı júrek beremen. Saǵan uqsaǵanı sennen burın bolmaǵan hám sennen keyin de bolmaydı. 13Saǵan soramaǵanlarıńdı da: baylıq hám dańqtı da beremen. Ómiriń boyı patshalar arasında saǵan teń keletuǵını bolmaydı. 14Eger sen de ákeń Dawıt sıyaqlı qaǵıydalarıma hám buyrıqlarıma boysınıp, Meniń jollarım menen júrseń, saǵan uzaq ómir de beremen.

15Sulayman oyanǵanda, bunıń túsi ekenin ańladı. Sońınan Erusalimge keldi. Ol Iyemizdiń Kelisim sandıǵınıń aldında turıp, jandırılatuǵın qurbanlıqlar hám tatıwlıq qurbanlıqların berdi. Ol pútkil xızmetshileri ushın úlken zıyapat berdi.

Sulaymannıń dana húkimi

16Bir kúni eki buzıq hayal patshanıń aldına keldi. 17Hayallardıń biri patshaǵa bılay dedi:

– Taqsır! Men mına hayal menen bir úyde jasayman. Bizler birge qalǵan waqıtta, men bosandım. 18Men bosanǵannan keyin, úshinshi kúni mına hayal da bosandı. Bizler birge edik, úyde ekewimizden basqa hesh kim joq edi. 19Túnde mına hayal balasın astına basıp alıp, óltirip qoyıptı. 20Qulıńız bolǵan men uyıqlap atırǵanımda, tún ortasında ol ornınan turıp, meniń balamdı janımnan alıp, óziniń qoynına jatqarıptı. Al óziniń ólip qalǵan balasın bolsa, meniń qoynıma salıptı. 21Tańda balamdı emiziw ushın turǵanımda, ol jansız jatırǵan eken. Biraq azanda dıqqat penen qaraǵanımda, onıń meniń balam emes ekenin bildim.

22Ekinshi hayal:

– Yaq, tiri bala meniki, ólgeni seniki, – dedi.

Birinshi hayal:

– Yaq, ólgen bala seniki, al tirisi meniki, – dedi.

Olar patshanıń aldında usılay tartısıp turdı.

23Sonda patsha:

– Birewińiz: «Tiri bala meniki, al ólgeni seniki», – deysiz. Ekinshińiz: «Ólgen bala seniki, al tirisi meniki», – deysiz. 24Onda maǵan bir qılısh ákelińler! – dedi.

Qılısh alıp kelingende, 25patsha:

– Tiri balanı ekige bólip, yarımın birewine, qalǵan yarımın ekinshisine berińler, – dep buyırdı.

26Sonda balasına janı ashıp, júregi sızlaǵan tiri balanıń anası patshaǵa:

– Taqsır, ótinemen, tiri balanı óltirmeń, onı mına hayalǵa beriń, – dedi.

Al ekinshi hayal bolsa:

– Bala saǵan da, maǵan da joq, onı ekige bóliń, – dedi.

27Sonda patsha juwap berip:

– Toqtańlar, balanı óltirmeńler! Onı birinshi hayalǵa berińler. Balanıń anası – sol boladı, – dedi.

28Pútkil izraillılar patsha shıǵarǵan bul húkimdi esitip, patshanı húrmet etetuǵın boldı. Sebebi olar Sulaymanda ádil húkim shıǵarıw ushın, Qudaydan berilgen danalıq bar ekenin bildi.