1 Kings 4
Sulaymannıń qol astındaǵı hámeldarları
1Sulayman pútkil Izraildıń patshası edi. 2Onıń qol astındaǵı hámeldarları mınalar edi: Sadoq ulı Azariya – ruwxaniy;3Shishanıń ulları Elixoref penen Axiya – xatkerler;
Axilud ulı Ehoshafat – diywanbegi;
4Ehoyada ulı Benaya – sárkárda;
Sadoq hám Abiyatar – ruwxaniyler;
5Natan ulı Azariya – úlke hákimleriniń baslıǵı;
Natan ulı Zabud – ruwxaniy hám patshanıń másláhátshisi;
6Axishar – saray basqarıwshısı;
Abda ulı Adoniram – márdikarǵa alınǵanlar ústinen juwapker.
7Sulaymannıń pútkil Izrail úlkelerin basqaratuǵın on eki hákimi bar edi. Olar patshanı hám onıń úy-ishin azıq-awqat penen támiyinlep turatuǵın bolıp, olardıń hár biri jılına bir ay patshanı hám onıń úy-ishin azıq-awqat penen támiyinlewi shárt edi. 8Olardıń atları mınalar: Efrayımnıń tawlı úlkesiniń hákimi Ben-Xur;
9Maqas, Shaalbim, Beyt-Shemesh, Elon-Beyt-Xanan qalalarınıń hákimi Ben-Deker;
10Soxo hám pútkil Xefer jerlerin óz ishine alǵan Arubbot úlkesiniń hákimi Ben-Xesed;
11Pútkil Nafat-Dor úlkesiniń hákimi Sulaymannıń qızı Tafattıń kúyewi Ben-Abinadab;
12Taanax, Megiddo, Izreeldiń qublasındaǵı Saretannıń janındaǵı pútkil Beyt-Shean hám Beyt-Sheannan Abel-Mexola menen Ioqmeamnıń arǵı jaǵına deyin sozılıp jatırǵan úlkelerdiń hákimi Axilud ulı Baana;
13Giladtaǵı Menashshe urpaǵınan bolǵan Yairge tiyisli qalalardı hám Bashandaǵı Argob dógeregindegi diywallar menen qorshalıp, dárwazasına qola támbi basılǵan úlken alpıs qalanı óz ishine alǵan Gilad jerindegi Ramot qalasınıń hákimi Ben-Geber;
14Maxanayım úlkesiniń hákimi Iddo ulı Axinadab;
15Naftaliy úlkesiniń hákimi Sulaymannıń qızı Basemattıń kúyewi Aximaas;
16Asher hám Bealot úlkeleriniń hákimi Xushay ulı Baana;
17Issaxar úlkesiniń hákimi Paruax ulı Ehoshafat;
18Benyamin úlkesiniń hákimi Ela ulı Shimey;
19Gilad jeriniń, yaǵnıy amorlardıń patshası Sixonnıń hám Bashan patshası Ogtıń eski jerleriniń hákimi Uriy ulı Geber. Ol sol úlkeniń jalǵız hákimi edi.
Sulaymannıń bir kúnlik kerek-jaraǵı
20Yahuda hám Izrail xalqı teńizdiń qumınday kóp bolıp, olar jep-iship shadlıq ishinde jasadı. 21Sulayman Evfrat dáryasınan filistlerdiń jerine hám Mısır shegaralarına shekemgi barlıq patshalıqlar ústinen húkimdarlıq etti. Olar Sulaymannıń ómiri dawamında oǵan salıq tólep, xızmet etti. 22Sulaymannıń sarayınıń bir kúnlik azıq-awqatı otız kor ▼▼ Otız kor – bir kor shama menen 220 l.
sapalı biyday unı, alpıs kor iri tartılǵan biyday unı, 23semirtilgen on buǵa, jaylawdan alınǵan jigirma buǵa, júz qoy, jáne de, suwınlar, jeyranlar, antilopalar hám semiz quslardan ibarat edi. 24Sulayman Tifsaxtan Gazaǵa shekemgi, Evfrat dáryasınıń batısındaǵı pútkil patshalıqlar ústinen húkimdarlıq etti. Ol átiraptaǵı barlıq eller menen tınıshlıqta jasadı. 25Sulaymannıń dáwirinde Dannan Beer-Shebaǵa shekemgi Yahuda hám Izrail xalqınıń hár biri ózleriniń ánjir hám júzim aǵashları astında tınısh ómir súrdi. 26Sulaymannıń sawash arbaları ushın tórt mıń ▼ at qorası hám on eki mıń atı bar edi. 27Sol on eki hákimniń hár biri ózi ushın belgilengen bir ay dawamında patsha Sulaymandı hám onıń dasturxanınan awqat jeytuǵınlardıń hámmesin azıq-awqat penen támiyinleytuǵın edi. Olar birde bir kemshilikke jol qoymaytuǵın edi. 28Hár bir hákim belgilengen jerge sawash arbalarınıń atları hám shapqır atlar ushın arpa menen saban jetkizip turatuǵın edi. Sulaymannıń danalıǵı
29Quday Sulaymanǵa mol danalıq, aqıl hám teńiz jaǵasındaǵı qum sıyaqlı sheksiz tereń túsiniwshilik berdi. 30Sulaymannıń danalıǵı pútkil shıǵıs xalıqlarınıń danalıǵınan hám Mısırdıń pútkil danalıǵınan da ústin edi. 31Ol barlıq adamlardan ótken dana bolıp, Ezrax násilinen bolǵan Etannan, Maxoldıń ulları Heman, Kalkol hám Dardadan da dana edi. Onıń dańqı átiraptaǵı pútkil xalıqlarǵa jayıldı. 32Ol úsh mıń naqıl-maqal ayttı hám onıń bir mıń bes qosıǵı bar edi. 33Sulayman Lebanon tawlarındaǵı kedr aǵashınan baslap, diywalda ósip turatuǵın mayoran shóbine shekem sóz etti. Ol haywanatlar, quslar, jer bawırlawshılar hám balıqlar tuwralı da ayttı. 34Hámme xalıqlardan adamlar kelip, Sulaymannıń dana sózlerin tıńlaytuǵın edi. Olar Sulaymannıń danalıǵı tuwralı esitken dúnyanıń barlıq patshalarınan jiberilgen edi.
Copyright information for
KaaIBT22L