1Ki 5 | KaaIBT22L | STEP | Tir patshası Xiram Sulaymannıń maylanıp, ákesi Dawıttıń ornına patsha etip qoyılǵanın esitkende, Sulaymandı qutlıqlaw ushın elshilerin jiberdi. Sebebi Xiram ómir boyı Dawıtqa dos bolıp kelgen edi.

‏ 1 Kings 5

Qudaydıń Úyiniń qurılısına tayarlıq

1 Tir patshası Xiram Sulaymannıń maylanıp, ákesi Dawıttıń ornına patsha etip qoyılǵanın esitkende, Sulaymandı qutlıqlaw ushın elshilerin jiberdi. Sebebi Xiram ómir boyı Dawıtqa dos bolıp kelgen edi. 2 Sulayman da Xiramǵa óz elshilerin jiberip, bılay dedi: 3 «Ózińiz bilesiz, ákem Dawıt átirapındaǵı dushpanları menen sawash júrgizgenlikten, Qudayı Jaratqan Iyeniń atına arnap Úy qura almadı. Jaratqan Iye sawashlarda dushpanların onıń ayaǵınıń astına taslaǵanǵa shekem, ol bul isti qıla almadı. 4 Endi Qudayım Jaratqan Iye maǵan hár tárepleme tınıshlıq berdi. Házir birde bir dushpanım da, dónip turǵan qáwip te joq. 5 Jaratqan Iye ákem Dawıtqa: „Men seniń taxtıńa otırǵızatuǵın ulıń Meniń atıma arnap Úy quradı“, – degen edi. Sonlıqtan men Qudayım Jaratqan Iyeniń atına arnap Úy qurıwdı niyet ettim. 6 Endi men ushın Lebanon tawlarınan kedr aǵashların kesiw ushın adamlarıńızǵa buyrıq berseńiz. Meniń adamlarım da siziń adamlarıńız benen birge isleydi hám men siziń adamlarıńızǵa ózińiz belgilegen miynet haqını tóleymen. Bizlerde aǵash kesiwde sidonlılar sıyaqlı tájiriybeli adamlar joq ekenin ózińiz bilesiz».

7 Xiram Sulaymannıń bul sózlerin esitkende, qattı quwanıp: «Búgin bul ullı bir xalıqtı basqarıw ushın Dawıtqa dana bir ul bergen Jaratqan Iyege alǵıslar bolsın!» – dedi. 8 Sońınan ol Sulaymanǵa mına xabardı jiberdi: «Maǵan jibergen xabarıńızdı aldım. Kedr hám sárwi aǵashlarına baylanıslı barlıq tileklerińizdi orınlayman. 9 Adamlarım olardı Lebanon tawlarınan teńizge alıp keledi. Men olardı sal etip buwdırıp, teńiz arqalı aytqan jerińizge jetkizip beremen. Adamlarım sol jerde sallardı sheship, jıyıp beredi, sizler alıp ketesizler. Siz de tilegimdi orınlap, meniń úy-ishimdi azıq-awqat penen támiyinleseńiz».

10 Xiram Sulaymanǵa kereginshe kedr hám sárwi aǵashların berdi. 11 Sulayman bolsa, Xiramnıń úy-ishiniń azıq-awqatı ushın hár jılı jigirma mıń kor biyday, jigirma kor sapalı záytún mayın berip turdı. 12 Jaratqan Iye wáde etkenindey, Sulaymanǵa danalıq berdi. Sonlıqtan Sulayman menen Xiram arasında tatıwlıq bolıp, olar óz ara kelisim dúzdi.

13 Patsha Sulayman qara jumıs isletiw ushın pútkil Izraildan otız mıń adamdı márdikarǵa aldı. 14 Gezek penen hár ayda olardan on mıńın Lebanon tawlarına jiberdi. Olar bir ay Lebanon tawlarında, eki ay úylerinde bolatuǵın edi. Bul adamlarǵa Adoniram basshılıq etti. 15 Jáne de, Sulaymannıń júk tasıytuǵın jetpis mıń adamı hám tawlarda tas kesetuǵın seksen mıń adamı bar edi. 16 Bulardan tısqarı, Sulayman istiń barısın baqlap, jumısshılardı qadaǵalap turatuǵın úsh mıń úsh júz qadaǵalawshı tayınladı. 17 Patshanıń buyrıǵı boyınsha, jumısshılar Úydiń tiykarın jonılǵan taslardan qalaw ushın úlken hám sapalı taslardı kesip shıǵardı. 18 Sulaymannıń hám Xiramnıń adamları geballılar menen birge Úydiń qurılısı ushın aǵashlar menen taslardı jonıp tayarladı.