1Ki 6 | KaaIBT22L | STEP | Izrail xalqınıń Mısırdan shıqqanına tórt júz seksen jıl bolǵanda, Sulaymannıń Izrail taxtına otırǵanına tórt jıl bolǵan edi. Ol sol jıldıń ekinshi ayında, yaǵnıy ziw ayında Jaratqan Iyeniń Úyiniń qurılısın basladı.

‏ 1 Kings 6

Qudaydıń Úyiniń qurılıwı

1 Izrail xalqınıń Mısırdan shıqqanına tórt júz seksen jıl bolǵanda, Sulaymannıń Izrail taxtına otırǵanına tórt jıl bolǵan edi. Ol sol jıldıń ekinshi ayında, yaǵnıy ziw ayında Jaratqan Iyeniń Úyiniń qurılısın basladı.

2 Patsha Sulaymannıń Jaratqan Iyege arnap qurǵan Úyiniń uzınlıǵı alpıs shıǵanaq, eni jigirma shıǵanaq, al biyikligi otız shıǵanaq edi. 3 Ibadatxana imaratınıń aldınǵı jaǵındaǵı aywannıń uzınlıǵı Úy imaratınıń enindey, yaǵnıy jigirma shıǵanaq, al eni on shıǵanaq boldı. 4 Sulayman Úyge ayna tárizli oyıqlar isletti. 5 Ibadatxananıń sırtın, yaǵnıy úlken bólmeniń hám eń tórgi bólmeniń diywalların aylandırıp, úsh qabatlı qosımsha bólmeler isletti. 6 Eń tómengi qabattıń eni bes shıǵanaq, ortanǵı qabattıń eni altı shıǵanaq, úshinshi qabattıń eni jeti shıǵanaq edi. Úydiń diywallarına islew bermew ushın, bólmeler tekshege uqsatıp órilgen bóreneler arqalı Úydiń diywallarına biriktirildi.

7 Úydiń qurılısı ushın paydalanılatuǵın taslar kánniń ózinde jonıp tayarlandı. Úy qurılıp atırǵanda, shókkishtiń de, baltanıń da, basqa temir ásbabınıń da sesti esitilmedi. 8 Ortadaǵı qosımsha bólmeniń esigi Úydiń qubla tárepinde edi. Aylanba tekshe arqalı ortanǵı qabatqa, onnan úshinshi qabatqa ótetuǵın edi. 9 Sulayman Úydi qurıp tamamladı. Tóbesin kedr bóreneler hám kedr aǵashınan islengen taxtalar menen bastırdı. 10 Jáne de, ol pútkil Úydi aylandırıp, hár biriniń biyikligi bes shıǵanaq bolǵan qosımsha bólmeler saldırdı. Olar Úy diywalına kedr bóreneler menen bekitildi.

11 Jaratqan Iyeden Sulaymanǵa mınaday sóz tústi:

12 – Mine, sen Úy qurıp atırsań. Eger sen Meniń qaǵıydalarımdı, nızam hám buyrıqlarımdı orınlap júrseń, onda Men ákeń Dawıtqa bergen sózimdi sen arqalı orınlayman. 13 Men izraillılar arasında jasap, xalqım Izraildı hesh qashan tárk etpeymen.

14 Solay etip, Sulayman Úydi qurıp pitkerdi. 15 Ol Úydiń ishki diywalın edennen tóbege shekem kedr aǵashınan islengen taxtalar menen qapladı, al edenine sárwi aǵashınan islengen taxtalar tósetti. 16 Úydiń arqa tárepiniń eń tórin edennen tóbesine deyin kedr taxtalar menen bóldirip, uzınlıǵı jigirma shıǵanaq bolǵan bir bólme ajırattırdı. Ol jer Eń muxaddes bólme dep ataldı. 17 Eń muxaddes bólmeniń aldındaǵı úlken bólmeniń uzınlıǵı qırıq shıǵanaq edi. 18 Diywaldaǵı taslar kórinbewi ushın Úydiń ishin qaplap turǵan kedr taxtalarǵa asqabaqlar hám asılıp turǵan gúller oyıp salındı.

19 Úydiń ishindegi eń tórgi bólme Jaratqan Iyeniń Kelisim sandıǵın qoyıw ushın tayarlandı. 20 Bul bólmeniń uzınlıǵı jigirma shıǵanaq, eni jigirma shıǵanaq hám biyikligi de jigirma shıǵanaq edi. Sulayman usı bólmeni de, kedr aǵashınan islengen tútetki tútetiletuǵın orındı da sap altın menen qaplattı. 21 Sulayman Úydiń ishin de sap altın menen qaplatıp, altın menen qaplanǵan tórgi bólmeniń aldına altın menen qaplanǵan shınjırlar tarttırdı. 22 Úydiń ishi bastan-ayaq hám eń tórgi bólmeniń aldındaǵı tútetki tútetiletuǵın orın altın menen qaplandı. 23 Eń tórgi bólmege qoyıw ushın záytún aǵashınan islengen, hár biriniń biyikligi on shıǵanaq bolǵan eki kerub ^{▼▼ Kerub – qanatlı ruwxıy barlıq.} islendi. 24 Hár qanatı bes shıǵanaq bolǵan kerubtıń jayılǵan eki qanatınıń uzınlıǵı on shıǵanaq boldı. 25 Ekinshi kerubtıń da jayılǵan qanatı on shıǵanaq bolıp, eki kerubtıń ólshemi de, kórinisi de birdey edi. 26 Eki kerubtıń da biyikligi on shıǵanaq edi. 27 Sulayman kerublardı Úydiń Eń muxaddes bólmesiniń ortasına qoydı. Kerublardıń jayılǵan qanatlarınıń bir ushı bólmeniń diywallarına tiyip, ekinshi ushları bólmeniń ortasında bir-birine tiyisip turdı. 28 Sulayman kerublardı da altın menen qaplattı.

29 Úydiń ishki hám sırtqı bólmeleriniń hámme diywallarına aylandırıp kerublardıń, palma aǵashlarınıń hám ashılıp turǵan gúllerdiń kórinislerin oyıp saldırdı. 30 Usı eki bólmeniń edenlerin de altın menen qaplattı.

31 Eń tórgi bólmeniń kirer awzına záytún aǵashınan jaqlawı bes qırlı bolǵan jarma qapı isletti. 32 Ol záytún aǵashınan islengen jarma qapılarǵa kerublardıń, palma aǵashlarınıń hám ashılıp turǵan gúllerdiń kórinisin oyıp saldırıp, qapılardı altın menen qaplattı. Kerublar menen palma aǵashlarınıń súwretlerin de altın menen qaplattı. 33 Úlken bólmeniń kirer awzına da záytún aǵashınan tórt múyeshli jaqlaw isletip, 34 jaqlawǵa jıynalatuǵın eki jarma qapını sárwi aǵashınan isletti. 35 Bularǵa da kerublardıń, palma aǵashlarınıń hám ashılıp turǵan gúllerdiń kórinislerin oyıp saldırıp, olardı altın menen qaplattı.

36 Ol ishki háwli qurdırıp, onıń diywalların úsh qatar jonılǵan tastan hám bir qatar kedr aǵashınan isletti.

37 Sulayman óz patshalıǵınıń tórtinshi jılınıń ziw ayında Jaratqan Iyeniń Úyiniń tiykarın qoyǵan edi. 38 Al on birinshi jıldıń segizinshi ayı bolǵan buwl ayında Úy aldın ala belgilengenindey etip, barlıq mayda-shúydesine shekem qurıp bolındı. Sulayman Úydi jeti jılda qurıp boldı.