1Ki 9 | KaaIBT22L | STEP | Sulayman Jaratqan Iyeniń Úyin hám óziniń sarayın salıp, niyetlegen isiniń hámmesin tamamlaǵannan soń,

‏ 1 Kings 9

Jaratqan Iyeniń Sulaymanǵa jáne kóriniwi

1 Sulayman Jaratqan Iyeniń Úyin hám óziniń sarayın salıp, niyetlegen isiniń hámmesin tamamlaǵannan soń, 2 Gibonda kóringeni sıyaqlı, Jaratqan Iye oǵan jáne kórindi. 3 Ol Sulaymanǵa bılay dedi:

– Men seniń duwalarıńdı hám jalbarınıwlarıńdı esittim. Atımnıń máńgige sol jerde bolıwı ushın, sen Maǵan arnap qurǵan mına Úydi muxaddes qıldım. Meniń kózlerim hám júregim bárqulla sol jerde boladı.

4 Saǵan kelsek, ákeń Dawıt sıyaqlı Meniń aldımda hadal júrek hám ádillik penen júrseń, barlıq buyrıqlarımdı orınlap, qaǵıyda hám nızamlarıma boysınıp jasasań, 5 onda: «Izrail taxtınan seniń urpaǵıńnıń izi úzilmeydi» – dep ákeń Dawıtqa bergen sózimde turıp, Izrail eli ústinen seniń patshalıǵıńdı máńgige turatuǵın qılaman.

6 Biraq eger sen hám seniń urpaqlarıń Mennen júz burıp, sizlerge bergen buyrıq hám qaǵıydalarıma boysınbay, ketip qalsańız hám basqa qudaylarǵa xızmet etip, olarǵa tabınsańız, 7 onda Men Izraildı Ózim bergen jerden shıǵarıp taslayman hám Óz atım ushın muxaddes qılǵan mına Úydi tárk etemen. Sonda Izrail pútkil xalıqlar arasında ápsanaǵa aylanıp, masqara boladı. 8 Al mına kórkem Úy qarabaqanaǵa aylanadı. Sonda onıń janınan ótip baratırǵan hár bir adamnıń júregi suwlap, janı túrshigip: «Jaratqan Iye bul eldi hám mına Úydi ne ushın bul awhalǵa saldı eken?» – dep soraytuǵın boladı. 9 Keyin olar: «Izrail xalqı ata-babaların Mısırdan alıp shıqqan Qudayı Jaratqan Iyeni tárk etip, basqa qudaylarǵa jabısıp aldı hám olarǵa tabınıp, xızmet etti. Sonlıqtan Jaratqan Iye olardı usı apatshılıqqa duwshar etti», – deydi.

Sulaymannıń pitim dúziwi

10 Sulayman eki imarattı: Jaratqan Iyeniń Úyi menen óziniń sarayın jigirma jılda pitkerdi. 11 Bul isler ushın Tir patshası Xiram Sulaymanǵa kereginshe kedr menen sárwi aǵashların hám altın jetkerip berdi. Sol sebepli Sulayman Xiramǵa Galila úlkesindegi jigirma qalanı berdi. 12 Biraq Xiram Tirden kelip, Sulaymannıń ózine bergen qalaların kórgende, bul qalalar oǵan unamadı. 13 Sonda Xiram Sulaymanǵa:

– Tuwısqanım, maǵan bergen qalalarıń qanday qalalar ózi? – dedi hám bul jerdi Kabul ^{▼▼ Kabul – «jaramsız» degendi bildiredi.} dep atadı. Olar házir de solay ataladı. 14 Xiram Sulayman patshaǵa bir júz jigirma talant ^{▼▼ Bir júz jigirma talant – bir talant shama menen 34 kg.} altın jibergen edi.

15 Patsha Sulayman Jaratqan Iyeniń Úyin, óziniń sarayın, Millonı, Erusalimniń diywalların, Xasor, Megiddo hám Gezer qalaların qurdırıw ushın márdikarǵa adam jıynaǵan edi. 16 Gezer qalasın Mısır patshası faraon qolǵa alıp, órtep jibergen edi. Al sol jerde jasap atırǵan qananlılardı bolsa, qırıp taslap, qalanı Sulaymanǵa hayallıqqa bergen qızına enshige bergen edi. 17 Sol sebepli Sulayman Gezer qalasın qayta qurǵan edi. Ol jáne tómengi Beyt-Xorondı, 18 Baalattı hám Yahuda jerindegi shóldegi Tamardı ^{▼▼ Tamar – Bazı qoljazbalarda «Tadmor».}, 19 ózine tiyisli pútkil telekleri bar qalalardı, sawash arbaları menen atları turatuǵın qalalardı qayta qurıp, bekkemledi. Bunnan tısqarı, Sulayman Erusalimde, Lebanon tawlarında hám qol astındaǵı hámme qalalarda qálegen nárselerin qurdı.

20 Úlkede Izrail xalqınan bolmaǵan xalıqlar: amor, xet, periz, xiw hám ebus xalıqları qalıp ketken edi. 21 Izrail xalqı olardı tolıq joq qıla almaǵan edi. Sulayman bul xalıqlardıń urpaqların márdikarǵa alıp, qul etti. Bul házir de dawam etpekte. 22 Biraq Sulayman Izrail xalqınıń birewin de qara jumısqa salmadı. Olardı ásker, xızmetker, basshı, áskerbası, arbalı áskerlerdiń basshısı etip qoydı. 23 Sulayman júrgizip atırǵan islerdiń basında jumıs islep atırǵan xalıqtı basqarıp turǵan bes júz eliw qadaǵalawshı basshı bar edi.

24 Faraonnıń qızı Dawıttıń qalasınan Sulaymannıń ózi ushın qurdırǵan sarayına kóship ótkennen soń, Sulayman Millonı saldırdı.

25 Sulayman Jaratqan Iye ushın arnap qurdırǵan qurbanlıq orında jılına úsh ret jandırılatuǵın qurbanlıqlar hám tatıwlıq qurbanlıqların beretuǵın hám sonıń menen birge Jaratqan Iyeniń aldında tútetki tútetetuǵın edi. Solay etip, ol Úydiń qurılısın tamamladı.

26 Patsha Sulayman Edom jerinde, Qızıl teńiz jaǵasında jaylasqan Elat janındaǵı Esion-Geberde kemeler soqtırdı. 27 Xiram teńizdi jaqsı biletuǵın kemeshilerin Sulaymannıń adamları menen birge kemede Ofirge jiberdi. 28 Olar Ofirge barıp, patsha Sulaymanǵa tórt júz jigirma talant altın ákelip berdi.