1Pe 2 | KaaIBT22L | STEP | Sonlıqtan hár qanday jamanlıqtı, hár qıylı ótirikti hám eki júzlilikti, kúnshillikti hám hár qanday ósekti qoyıńlar!

‏ 1 Peter 2

Tiri tas hám Qudaydıń xalqı

1 Sonlıqtan hár qanday jamanlıqtı, hár qıylı ótirikti hám eki júzlilikti, kúnshillikti hám hár qanday ósekti qoyıńlar! 2 Jańa tuwılǵan nárestelerdiń ana sútine qushtar bolǵanınday, sizler de ruwxıy taza sút bolǵan Qudaydıń sózine qushtar bolıńlar. Sonda azıq alıp ósip, qutqarılasızlar. 3 Sebebi sizler Iyemizdiń jaqsılıǵın tatıp kórdińler.

4 Adamlar kereksiz dep taslaǵan, biraq Quday tárepinen tańlanǵan biybaha tiri tasqa – Iyemiz Iysaǵa kelińler. 5 Sizler de tiri taslar sıyaqlısızlar. Sonlıqtan Quday sizlerdi ruwxıy Ibadatxana salıwda qollanıp, Iysa Masiyx arqalı Ózine unaytuǵın ruwxıy qurbanlıq beriwińiz ushın, muxaddes ruwxaniyler qılıp atır. 6 Óytkeni Muxaddes Jazıwda bılay delingen:

«Mine, Men Ózim tańlaǵan biybaha bir tastı, múyeshke qoyılatuǵın tiykarǵı tastı Sionda ornataman. Oǵan isengen adam hesh qashan uyatqa qalmaydı». ^{▼▼ Iysh 28:16.}

7 Isenetuǵın sizler ushın bul tas qımbatlı. Al isenbeytuǵınlar ushın Ol: «Qurılısshılardıń kereksiz dep taslaǵan tası,
Úydiń múyeshiniń tiykarǵı tası boldı». ^{▼▼ Zab 117:22.}

8 Jáne de, «Súrniktiretuǵın tas, qulatatuǵın jartas boldı». ^{▼▼ Iysh 8:14.}

Isenbeytuǵınlar Qudaydıń sózin tıńlamaǵanı ushın súrnigedi. Bul olardıń táǵdirine jazılǵan.

9 Biraq sizler Quday tárepinen tańlanǵan adamlar, Patshanıń ruwxaniyleri, muxaddes millet hám Qudayǵa tiyisli xalıqsız. Sizler ózlerińizdi qarańǵılıqtan Óziniń ájayıp nurına shaqırǵan Qudaydıń tań qalarlıq islerin járiyalaw ushın tańlandıńlar. 10 Bir waqıtları Qudaydıń xalqı emes edińler. Biraq endi Qudaydıń xalqısız. Bir waqıtları Qudaydıń miyrim-shápáátin bilmegen edińler, endi bolsa, Onıń miyrim-shápáátin aldıńlar.

11 Súyikli tuwısqanlarım, bul dúnyada jat jerli hám qonaq bolǵan sizlerge jalbarınaman, janıńızǵa hár qashan qarsı turatuǵın deneniń jaman qálewlerinen qashıńlar. 12 Isenbeytuǵınlar arasında hadal ómir súrińler. Olar sizlerdi jamanlıq islewshiler, dep ayıplasa da, jaqsı islerińizdi kórip, Quday keletuǵın kúni Onı alǵıslaydı.

Basshılarǵa boysınıńlar!

13 Iyemiz ushın, adamlar ornatqan hár qanday hákimshilikke boysınıńlar. Joqarı biylikke iye patshaǵa hám 14 jamanlıq islewshilerdi jazalaw, jaqsılıq islewshilerdi xoshametlew ushın patsha tárepinen jiberilgen hákimlerge boysınıńlar. 15 Sebebi Quday sizlerdiń jaqsı islerińiz arqalı aqılsız adamlardıń ósek sózleriniń toqtawın qáleydi. 16 Al sizler azat adamlarsız. Biraq azatlıǵıńızdı jamanlıq islew ushın paydalanbay, Qudaydıń qulları bolıp jasańlar. 17 Hámme adamlarǵa húrmet kórsetińler. Iseniwshi tuwısqanlarıńızdı súyińler. Qudaydan qorqıńlar, patshanı sıylańlar.

Qullarǵa násiyat

18 Háy qullar, xojayınlarıńızǵa boysınıńlar! Olardıń tek jaqsı hám miyrimlilerin ǵana emes, al qatalların da tolıq húrmet etip, boysınıńlar. 19 Eger kim de kim nahaq azap shekkende Qudaydı oylap, azaplarǵa shıdasa, bul Qudayǵa unaydı. 20 Eger gúna islegenińiz ushın tayaq jegenińizde shıdasańız, bul sizlerge abıray áperer me eken? Biraq, jaqsılıq isley tura azap shekkenińizde shıdasańız, bul Qudayǵa unaydı. 21 Óytkeni Quday sizlerdi usı ushın shaqırdı. Masiyxtıń Ózi sizler ushın azap shegip, Onıń izinen júriwińiz ushın órnek kórsetti.

22 «Ol gúna islemedi, awzınan jalǵan sóz de shıqpadı». ^{▼▼ Iysh 53:9.} 23 Xorlanǵanda, hesh kimge qarsı shıǵıp, kewline tiymedi. Ol azap shekkende de hesh kimdi qorqıtpadı, al Ózin ádillik penen húkim etiwshi Qudaydıń qolına tapsırdı. 24 Bizlerdiń gúna ushın ólip, haq bolıp jasawımız ushın, Ol gúnalarımızdı atanaq aǵashta Óz denesine júkledi. Onıń jaraqatları arqalı shıpa taptıńız. 25 Burın adasqan qoylar sıyaqlı edińiz, endi bolsa, janlarıńızdıń Shopanına hám Baǵıwshısına qaytıp keldińler.